Read kinyarwanda Icya kabiri cya Samweli 23 Bible Online

Icya kabiri cya Samweli 23 - kinyarwanda bible

Icya kabiri cya Samweli 23

¹Aya ni yo magambo ya nyuma ya Dawudi: «Uwo ni Dawudi mwene Yese ubivuze, uwo ni umugabo w’igikomangoma ubivuze, uwasizwe amavuta n’Imana ya Yakobo, uwo indirimbo za Israheli zikunda gusingiza.

²Umwuka w’Uhoraho wamvugiyemo, n’ijambo rye riri ku rurimi rwanjye.

³Imana ya Israheli yarabivuze, Urutare rwa Israheli yarabimbwiye: Ugenga amahanga akurikije ubutabera, agategeka mu gitinyiro cy’Imana.

⁴Asa n’umuseke ukebye mu gitondo izuba rirashe, agasa n’igitondo kitagira igicu ku muhituko w’imvura, ubwo ibyatsi bibengeranishwa n’urumuri.

⁵Inzu yanjye se, si ko imeze ku Mana, kuko yanyemereye isezerano ritazashira, ritunganye muri byose kandi ryubahirizwa? Imitsindo yanjye, n’ibinyura umutima byose, si yo mbikesha?

⁶Ariko abagome bose, bo bameze nk’amahwa bajugunye; hari uwatinyuka se kuyafata n’intoki?

⁷Ahubwo bayigirishayo umuhunda w’icumu n’uruti rwaryo, akazatwikwa, akazakongokera aho ngaho.»

⁸Aya ni yo mazina y’Intwari mu ngabo za Dawudi: Ishibehali, Umuhakemoni, wategekaga abitwa «Intwari eshatu». Umunsi umwe ni we wateye icumu abantu magana inani icyarimwe.

⁹Akurikirwa na Eleyazari mwene Dodo, w’i Ahoti. Yari umwe muri za Ntwari eshatu, kandi yari kumwe na Dawudi i Pasi‐Damimu ubwo bashotoraga Abafilisiti bari bateraniye kurwana. Abayisraheli barahunze,

¹⁰ariko we arakomeza yica Abafilisiti, kugeza ubwo ikiganza cye kinanirwa cyumirana n’inkota, maze uwo munsi Uhoraho amuha ugutsinda gukomeye. Imbaga yose iramugarukira, ariko ari ukugira ngo bitwarire iminyago gusa.

¹¹Ukurikiyeho ni Shama, mwene Aga w’Umuharari. Abafilisiti bari bibumbiye hamwe, aho hantu hakaba umurima urimo inkori, maze imbaga ihunga Abafilisiti.

¹²Ariko we ahagarara hagati mu murima, arawigarurira, yica Abafilisiti, maze Uhoraho amuha ugutsinda gukomeye.

¹³Igihe cy’isarura, batatu bo mu bitwa «Ba Mirongo Itatu b’imena», baramanuka basanga Dawudi mu buvumo bw’i Adulamu. Ingabo z’Abafilisiti zikaba zaciye ingando mu Kibaya cy’Abarefayimu[76].

¹⁴Icyo gihe Dawudi yari mu buhungiro, naho ingabo z’Abafilisiti ziri i Betelehemu.

¹⁵Dawudi avuga icyifuzo cye, agira ati «Ni nde uzansomya ku mazi y’iriba riri ku irembo ry’i Betelehemu?»

¹⁶Maze abo bagabo batatu b’intwari, banyura mu ngando y’Abafilisiti barwana, bavoma amazi mu iriba riri hafi y’irembo ry’i Betelehemu, bayazanira Dawudi. We ariko yanga kuyanywa, ahubwo ayanyanyagiza imbere y’Uhoraho.

¹⁷Aravuga ati «Uhoraho arandinde gukora kuri aya mazi! Aya ni amaraso y’abantu bahaze amagara yabo, bakajya hariya hantu!» Nuko yanga kuyanywa. Ibyo ni byo byakozwe na ba bagabo b’intwari uko ari batatu.

¹⁸Abishayi, murumuna wa Yowabu, mwene Seruya, yategekaga abitwa «Ba Mirongo Itatu b’imena».» Yakaraze icumu rye yica abantu magana atatu icyarimwe, bituma aba ikirangirire muri za Ntwari mirongo itatu.

¹⁹Ikuzo rye ryasumbaga iry’abandi bose muri ba Mirongo Itatu, nyamara ntiyigeze asingira Intwari eshatu za mbere.

²⁰Benayahu mwene Yehoyada, umugabo w’intwari, wabarirwaga mu bakoze ibikorwa bikomeye, akaba akomoka i Kabuseli. Ni we wishe abahungu bombi ba Ariyeli Umumowabu; kandi aramanuka yica intare yari mu mwobo igihe cy’urubura.

²¹Ni we kandi wishe Umunyamisiri w’intwari. Uwo Munyamisiri yari afite icumu mu ntoki, nuko Benayahu aramanuka amusanga yitwaje inkoni, yambura uwo Munyamisiri icumu rye, ararimwicisha.

²²Ngibyo ibyakozwe na Benayahu mwene Yehoyada, maze aba ikirangirire muri Ba Mirongo Itatu b’imena.

²³Yarubashywe kurusha Ba Mirongo Itatu b’imena, ariko ntiyashyikira Intwari eshatu za mbere. Maze Dawudi amugira umutware w’abamurindaga.

²⁴Asaheli, murumuna wa Yowabu, na we yabarirwaga muri Ba Mirongo Itatu b’imena, kimwe na Elihanani mwene Dodo w’i Betelehemu.

²⁵Babarirwagamo kandi Shama na Elika b’i Harodi;

²⁶Helesi w’i Paliti, Ira mwene Ikeshi w’i Tekowa,

²⁷Abiyezeri w’i Anatoti, Mebunayi w’i Husha,

²⁸Salumoni w’i Aho, Maharayi w’i Netofa,

²⁹Helebu mwene Bana w’i Netofa, Itayi mwene Ribayi w’i Gibeya mu Babenyamini,

³⁰Benayahu w’i Pireyatoni, Hidayi wo ku bidendezi by’i Gashi,

³¹Abi‐Aluboni w’i Aruba, Azimaweti w’i Bahurimu,

³²Eliyahiba w’i Shaluboni na Yasheni w’i Gimizo.

³³Barimo kandi Yehonatani mwene Shama w’i Harari, Ahiyamu mwene Sharari w’i Arari,

³⁴Elifeleti mwene Ahasibayi w’i Betimaka, Eliyamu mwene Ahitofeli w’i Gilo,

³⁵Hesirayi w’i Karumeli, Parayi w’i Arabi,

³⁶Yigali mwene Natani w’i Soba, Bani w’i Gadi,

³⁷Seleki w’Umuhamoni, Naharayi w’i Beroti, watwaraga intwaro za Yowabu mwene Seruya,

³⁸Ira w’i Yatiri, Garebu w’i Yatiri

³⁹na Uriya w’Umuhiti. Bose bakaba mirongo itatu na barindwi.