Read kinyarwanda Icya mbere cy'Abami 14 Bible Online

Icya mbere cy'Abami 14 - kinyarwanda bible

Icya mbere cy'Abami 14

¹Muri icyo gihe Abiya mwene Yerobowamu ararwara.

²Yerobowamu abwira umugore we, ati «Haguruka, wiyoberanye hatagira umenya ko uri muka Yerobowamu, maze ujye i Silo. Ni ho umuhanuzi Ahiya aba, akaba ari we wampanuriye[54] ko nzaba umwami w’iyi mbaga.

³Witwaze imigati cumi, udutsima tundi n’ikibindi cy’ubuki, umusange; na we azakubwira uko uyu mwana azamera.»

⁴Umugore wa Yerobowamu abikora atyo; arahaguruka ajya i Silo kwa Ahiya. Icyo gihe Ahiya ntiyari akibona, ntiyari akibasha no guhunyereza kubera ubusaza bwe.

⁵Nyamara Uhoraho yari yabwiye Ahiya, ati «Dore muka Yerobowamu ari mu nzira, aje kukubaza iby’umwana we urwaye. Uzamubwire utya n’utya; kandi araza yiyoberanyije, yiyita undi mugore.»

⁶Ahiya yumvise imirindi y’ibirenge by’uwo mugore acyinjira mu muryango, aramubwira ati «Injira, mugore wa Yerobowamu! Kuki wihinduye undi mugore? Ngutumweho amagambo akomeye cyane.

⁷Genda ubwire Yerobowamu, uti ’Uhoraho, Imana ya Israheli aravuze ngo: Nagukuye muri rubanda nkugira umutware w’umuryango wanjye Israheli,

⁸nanyaze ubwami inzu ya Dawudi ndabuguha; ariko ntiwambereye nk’umugaragu wanjye Dawudi witonderaga amategeko yanjye, akankurikirana n’umutima we wose, akora gusa ibitunganiye amaso yanjye.

⁹Wakoze ibyaha kurusha abakubanjirije bose: uragenda wihimbira izindi mana z’amashusho abajwe ku buryo wansuzuguye; naho jyewe unjugunya hirya uranzinukwa.

¹⁰Ni yo mpamvu inteye guteza inzu ya Yerobowamu ibyago, nkica abantu b’igitsinagabo bo kwa Yerobowamu, baba abacakara cyangwa se abigenga muri Israheli; nkavanaho abakomoka mu nzu ya Yerobowamu nk’uko bakubura umwanda bakawumaraho.

¹¹Umuntu wese wo mu muryango wa Yerobowamu uzapfira mu mugi azaribwa n’imbwa; naho uzagwa ku gasozi azaribwa n’ibisiga byo mu kirere, kuko ari ko Uhoraho yavuze.’

¹²Naho wowe, mugore, haguruka utahe, nyamara uraba ugishinga ibirenge mu mugi, maze umwana wawe ahite apfa.

¹³Israheli yose izamuririra imuhambe, kuko ari we wenyine mu bo kwa Yerobowamu uzahambwa mu mva; ni na we wenyine mu bo mu nzu ya Yerobowamu wabonyweho ibyiza bishimisha Uhoraho, Imana ya Israheli.

¹⁴Uhoraho azishyiriraho undi mwami[55] muri Israheli, abe ari we urimbura inzu ya Yerobowamu. Ni iby’uyu munsi! Mbivuge nte? Ni ibya nonaha!

¹⁵Uhoraho azakubita Israheli ibe nk’urubingo runyeganyezwa n’amazi. Azarandura Abayisraheli muri iki gihugu cyiza yahaye abasekuruza kandi abatatanyirize hakurya y’uruzi, kuko biremeye ibiti byeguriwe ibimana byabo, bagacumura ku Uhoraho.

¹⁶Azahana Israheli abahoye ibyaha Yerobowamu yakoze n’ibyo yakoresheje Israheli.»

¹⁷Umugore wa Yerobowamu arahaguruka, aragenda agera i Tirisa[56]. Akigera ku muryango w’inzu, umwana arapfa.

¹⁸Baramuhamba, Abayisraheli bose baramuririra nk’uko Uhoraho yari yabivuze, abitumye umugaragu we Ahiya w’umuhanuzi.

¹⁹Ibindi bigwi bya Yerobowamu, uko yarwanye n’uko yategetse, ibyo byose byanditswe mu gitabo cy’Amateka[57] y’abami ba Israheli.

²⁰Yerobowamu yamaze imyaka makumyabiri n’ibiri ku ngoma, aratanga. Umuhungu we Nadabu ni we wamuzunguye.

²¹Robowamu mwene Salomoni yimikirwa kuba umwami wa Yuda; Robowamu yimye amaze imyaka mirongo ine n’umwe avutse, amara ku ngoma imyaka cumi n’irindwi, ategekera i Yeruzalemu, umugi Uhoraho yitoranyirije mu miryango yose ya Israheli, kugira ngo bahubahirize izina rye. Nyina wa Robowamu yitwaga Nahama, akaba Umuhamonikazi.

²²Abantu bo mu muryango wa Yuda bakoze ibyo Uhoraho yanga: ibyaha byabo bituma Uhoraho abarakarira kuruta uko yarakariye abasekuruza babo.

²³Kimwe n’abo basekuruza, biyubakira ahirengeye inkingi z’amabuye n’ibiti byeguriwe ibimana byabo, ku misozi yose ihanitse no mu nsi y’igiti cyose kibisi; —

²⁴hadutse kandi mu gihugu abasore n’abakobwa b’amahabara biyegurira ibigirwamana! — bagakora ibibi byose by’abanyamahanga Uhoraho yari yarirukanye imbere y’Abayisraheli.

²⁵Robowamu amaze imyaka itanu ari ku ngoma, Shishaki, umwami wa Misiri, yagabye igitero i Yeruzalemu.

²⁶Yasahuye umutungo wo mu Ngoro y’Uhoraho, asahura n’umutungo wo mu ngoro y’umwami. Atwara byose abimaraho, ndetse yatwaye n’ingabo zose umwami Salomoni yari yaracurishije muri zahabu.

²⁷Umwami Robowamu akoresha izindi ngabo mu miringa zo kuzisimbura, maze aziha abatware b’abasirikare barindaga amarembo y’ibwami.

²⁸Buri gihe umwami yabaga yinjiye mu Ngoro y’Uhoraho, abasirikare bamugendagaho bafite izo ngabo, yasohoka bakajya kuzibika mu nzu yabo.

²⁹Ibindi bigwi bya Robowamu, ibyo yakoze byose, ntibyanditswe se mu gitabo cy’Amateka y’abami ba Yuda?

³⁰Hakomeje kubaho intambara ziteranya Robowamu na Yerobowamu.

³¹Umwami Robowamu amaze gutanga, umurambo we washyinguwe mu Murwa wa Dawudi, hamwe n’abasekuruza be. Umuhungu we Abiyamu ni we wamuzunguye ku ngoma.