Read kinyarwanda Icya mbere cy'Abami 15 Bible Online

Icya mbere cy'Abami 15 - kinyarwanda bible

Icya mbere cy'Abami 15

¹Abiyamu yimitswe kuba umwami wa Yuda, mu mwaka wa cumi n’umunani w’ingoma ya Yerobowamu mwene Nebati.

²Yamaze imyaka itatu ari ku ngoma i Yeruzalemu. Nyina yitwaga Mahaka, akaba umukobwa wa Abusalomu.

³Yakoze ibibi byose byakozwe na se mbere ye; umutima we ntiwatunganira Uhoraho, Imana ye, nk’uko uw’umubyeyi we Dawudi wamutunganiraga.

⁴Ariko kubera Dawudi, Uhoraho Imana ye yamusigiye urumuri muri Yeruzalemu, ihamishaho umwe mu bana be ngo akomeze Yeruzalemu,

⁵bitewe n’uko Dawudi yakoraga ibitunganiye amaso y’Uhoraho, ntiyateshuka ku byo Uhoraho yamutegetse gukora, keretse mu bya Uriya w’Umuhiti.

⁶Ibindi bigwi bya Abiyamu, ibyo yakoze byose, ntibyanditswe se mu gitabo cy’Amateka y’abami ba Yuda? Habaye intambara y’urudaca hagati ya Abiyamu na Yerobowamu.

⁸Abiyamu yaratanze, umurambo we ushyingurwa mu Murwa wa Dawudi. Umuhungu we Asa ni we wamuzunguye ku ngoma.

⁹Yerobowamu, umwami wa Israheli, amaze imyaka makumyabiri ari ku ngoma, Asa yimikiwe kuba umwami wa Yuda.

¹⁰Yamaze imyaka mirongo ine n’umwe i Yeruzalemu ari ku ngoma; nyirakuru yitwaga Mahaka, akaba umukobwa wa Abusalomu.

¹¹Asa yakoze ibitunganiye Uhoraho, nk’uko sekuruza Dawudi yabigenje.

¹²Yaciye ubuhabara mu gihugu kandi akuraho amashusho y’ibigirwamana ba sekuruza bari baradukanye.

¹³Ndetse yavanye na nyirakuru Mahaka ku rwego rw’ubugabekazi kuko yari yikoreshereje ishusho ry’ikigirwamana Ashera; Asa yatemye icyo kigirwamana agitwikira mu kibaya cya Sedironi.

¹⁴Ariko amasengero y’ahirengeye ntiyavuyeho. Nyamara umutima wa Asa wakomeje gutunganira Uhoraho mu gihe cyose yabayeho.

¹⁵Yashyize mu Ngoro ibintu se na we ubwe beguriye Imana; nka feza, zahabu, n’ibindi bikoresho.

¹⁶Asa na Bayesha, umwami wa Israheli, barwanye mu gihe cyose babayeho.

¹⁷Bayesha, umwami wa Israheli, atera Yuda maze urugo rw’umugi wa Rama ararwubaka ararukomeza kugira ngo azibire inzira Asa, umwami wa Yuda.

¹⁸Asa afata feza na zahabu byari bisigaye byo mu mutungo w’Ingoro y’Uhoraho no mu mutungo w’ingoro y’umwami, abiha abagaragu be kugira ngo babyoherereze Beni‐Hadadi mwene Tibirimoni, umwuzukuru wa Heziyoni, akaba umwami wa Aramu kandi akaba yari atuye i Damasi. Asa abwira Beni‐Hadadi ati

¹⁹«Reka tugirane isezerano, nk’uko data na so barigiranye. Nkohorereje amaturo ya feza na zahabu, maze uce ku isezerano wagiranye na Bayesha, umwami wa Israheli, areke gukomeza kuntera.»

²⁰Beni‐Hadadi yumvira umwami Asa; agaba ibitero bitera imigi ya Israheli, atsinda umugi wa Iyoni, uwa Dani, uwa Abeli‐Betimaka, akarere kose ka Kineroti n’igihugu cyose cya Nefutali.

²¹Bayesha amaze kumva iyo nkuru, ahita areka gukomeza umugi wa Rama, ajya kwibera i Tirisa.

²²Umwami Asa atumira Abayuda bose, hatagize n’umwe usigara, barikora bajya i Rama aho Bayesha yubakaga, bahakura amabuye n’ibiti. Umwami Asa abyubakisha Geba y’Ababenyamini na Misipa.

²³Ibindi bikorwa byose bya Asa, ubutwari bwe, ibyo yakoze byose, imigi yubatse, ntibyanditswe se mu gitabo cy’Amateka y’abami ba Yuda, uretse ko ageze mu zabukuru yarwaye ibirenge?

²⁴Nuko Asa aratanga, umurambo we ushyingurwa mu Murwa wa sekuruza Dawudi. Umuhungu we Yozafati aba ari we umuzungura ku ngoma.

²⁵Nadabu mwene Yerobowamu yabaye umwami wa Israheli, mu mwaka wa kabiri w’ingoma ya Asa, umwami wa Yuda; yamaze imyaka ibiri ategeka Israheli.

²⁶Yakoze ibidatunganiye Uhoraho; agendera mu nzira za se kandi akurikiza icyaha se yari yarakoresheje Israheli[58].

²⁷Bayesha mwene Ahiya wo mu muryango wa Isakari, aramugambanira. Bayesha amwicira i Gibetoni y’Abafilisti, mu gihe Nadabu n’Abayisraheli bose bari bagose Gibetoni.

²⁸Bayesha yishe Nadabu mu mwaka wa gatatu w’ingoma ya Asa, umwami wa Yuda, aba ari we umuzungura ku ngoma.

²⁹Akimara kwimikwa, yishe abo mu muryango wa Yerobowamu bose, arabatsemba, ntiyagira n’umwe asiga, nk’uko Uhoraho yari yabivuze[59] atumye umugaragu we Ahiya w’i Silo.

³⁰Abica abahoye ibyaha bya Yerobowamu n’ibyo yoheje Abayisraheli ngo bakore, bagacumura kuri Uhoraho, Imana ya Israheli.

³¹Ibisigaye by’ibikorwa bya Nadabu, ibyo yakoze byose, ibyo ntibyanditswe se mu gitabo cy’Amateka y’abami ba Israheli? (32)[60]

³³Mu mwaka wa gatatu w’ingoma ya Asa, umwami wa Yuda, Bayesha mwene Ahiya yima ingoma, ategeka Israheli yose atuye i Tirisa mu gihe cy’imyaka makumyabiri n’ine.

³⁴Yakoze ibidatunganiye amaso y’Uhoraho, akurikiza imigenzereze ya Yerobowamu, n’icyaha yari yarakoresheje Abayisraheli.