Read kinyarwanda Icya mbere cy'Abami 18 Bible Online

Icya mbere cy'Abami 18 - kinyarwanda bible

Icya mbere cy'Abami 18

¹Hashize iminsi myinshi, mu mwaka wa gatatu, Uhoraho abwira Eliya, ati «Genda wiyereke Akabu; ngiye kugusha imvura ku butaka.»

²Eliya aragenda ajya kwiyereka Akabu. Ubwo inzara yacaga ibintu i Samariya.

³Akabu ahamagara Obadiyahu w’umunyarugo we. — Obadiyahu uwo yatinyaga cyane Uhoraho;

⁴bityo, ubwo Yezabeli yicaga[69] abahanuzi b’Uhoraho, Obadiyahu yafashemo ijana ajya kubahisha mu buvumo bubiri, ashyira mirongo itanu muri buri buvumo, akajya abagemurirayo umugati wo kurya n’amazi yo kunywa.—

⁵Akabu abwira Obadiyahu, ati «Genda mu gihugu, ugere ku masoko yose y’amazi no ku tugezi twose: yenda ahari twabona ubwatsi tugaburira amafarasi n’inyumbu, tutavaho dupfusha igice cy’amatungo yacu.»

⁶Bigabanya igihugu ngo bakigende. Akabu anyura iye nzira, Obadiyahu na we anyura indi.

⁷Obadiyahu akigenda, ahura na Eliya. Obadiyahu aramumenya, amwikubita imbere yubamye, aramubwira ati «Ni wowe koko, shobuja Eliya?»

⁸Undi aramusubiza ati «Ni jye! Genda ubwire shobuja, uti ’Eliya yaje!’»

⁹Obadiyahu aramusubiza ati «Nacumuye iki cyatuma ungabiza Akabu, jye umugaragu wawe, kugira ngo anyice?

¹⁰Ndahiye ubuzima bw’Uhoraho, Imana yawe, ko nta hanga cyangwa igihugu databuja atakwijemo abantu ngo bagushakashake; mu gihe bamuhakaniye ko udahari, akarahiza abo bami b’amahanga ko batakubonye koko.

¹¹None ubu urambwiye ngo ngende mbwire databuja ko Eliya ari hano!

¹²Ariko nimara gutandukana nawe, umwuka w’Uhoraho urakujyana ahandi ntazi, maze nimenyesha Akabu akaza ntakubone, anyice. Nyamara kandi kuva mu bwana bwanjye, jye umugaragu wawe, nubahaga Uhoraho.

¹³Nta bwo babwiye databuja icyo nakoze, ubwo Yezabeli yicaga abahanuzi b’Uhoraho? Nahishe abahanuzi ijana b’Uhoraho mu buvumo bubiri, mirongo itanu muri buri buvumo, maze nkajya mbagaburira umugati nkabaha n’amazi yo kunywa.

¹⁴None ubu urambwiye ngo ngende mbwire databuja ngo Eliya ari hano! Aranyica[70]!»

¹⁵Eliya aramusubiza ati «Ndahiye ubuzima bw’Uhoraho, Umugaba w’ingabo nkorera, ko uyu munsi niyereka Akabu.

¹⁶Obadiyahu ajya kubonana na Akabu arabimubwira; Akabu na we ajya kubonana na Eliya.

¹⁷Akabu abonye Eliya aramubwira ati «Uratinyutse uraje, kandi ari wowe wateje ibi byago[71] muri Israheli!»

¹⁸Eliya aramusubiza ati «Si jye wateje ibyago, ahubwo ni wowe n’inzu ya so, kuko mwirengagije amategeko y’Uhoraho mukiyegurira Behali.

¹⁹Noneho ntumirira Abayisraheli bose bateranire ku musozi wa Karumeli, kimwe n’abahanuzi magana ane na mirongo itanu ba Behali, barira ku meza ya Yezabeli.»

²⁰Akabu atumiza Abayisraheli bose n’abahanuzi, abakoranyiriza ku musozi wa Karumeli.

²¹Eliya yegera rubanda rwose maze aravuga ati «Muzahereza he gucumbagirira ku maguru yombi[72]? Niba Uhoraho ari we Mana, nimumukurikire; niba kandi ari Behali, abe ari we mukurikira!» Ariko abantu ntibagira ijambo na rimwe bamusubiza.

²²Eliya arongera abwira rubanda, ati «Ni jyewe muhanuzi w’Uhoraho usigaye jyenyine, naho abahanuzi ba Behali ni magana ane na mirongo itanu.

²³Nibaduhe ibimasa bibiri; bihitiremo icyabo, bakibage maze bagishyire hejuru y’inkwi, ariko ntibacane umuriro. Nanjye ndabigenza ntyo ku kindi kimasa; ndakibaga ngishyire hejuru y’inkwi, ariko sincana umuriro.

²⁴Hanyuma muze kwiyambaza izina ry’imana yanyu, nanjye ndiyambaza izina ry’Uhoraho. Imana iza gusubirisha umuriro, iraba ari yo Mana.» Abantu bose baramusubiza bati «Iryo jambo ni ryiza.»

²⁵Eliya abwira abahanuzi ba Behali, ati «Nimwihitiremo icyanyu kimasa, mube ari mwe mubanza kubaga kuko muri na benshi; hanyuma mwiyambaze izina ry’imana yanyu, ariko ntimucane umuriro.»

²⁶Bafata ikimasa bahawe, barakibaga, maze biyambaza izina rya Behali kuva mu gitondo kugera ku manywa y’ihangu, bavuga bati «Behali, dusubize!» Ariko ntihagira ijwi ryumvikana cyangwa ubasubiza n’umwe. Nuko babyinira iruhande rw’urutambiro bari bubatse.

²⁷Bagejeje ku manywa y’ihangu, Eliya abashinyagurira, avuga ati «Nimuhamagare cyane kuko ari imana mubwira. Wenda ubu yaba yiherereye, cyangwa se yaba idahari, cyangwa se ikaba hari aho yazindukiye; wenda yaba isinziriye ikaba ikwiye gukangurwa!»

²⁸Barongera barangurura amajwi, maze ku buryo bw’imihango yabo, bisharambuza n’amacumu, kugeza ubwo bivushije amaraso.

²⁹Amanywa arangiye, bakomeza guhanura kugeza igihe cyo gutura igitambo cya nimunsi. Ariko ntihagira ijwi ryumvikana, cyangwa ijambo, cyangwa se ikindi kimenyetso cy’uko bitaweho.

³⁰Eliya abwira abantu bose, ati «Nimunyegere!» Bose baramusanga. Asana urutambiro rw’Uhoraho rwari rwarasenyutse.

³¹Afata amabuye cumi n’abiri, nk’uko imiryango ya bene Yakobo yanganaga, ari we Uhoraho yari yarabwiye ati «Uzitwa Israheli.»

³²Ayo mabuye Eliya ayubakisha urutambiro rw’Uhoraho, maze iruhande rw’urwo rutambiro ahacukura umuferege uruzengurutse, ukaba wari ufite intambwe ebyiri z’intoke z’ubujyakuzimu.

³³Eliya agereka inkwi ku rutambiro, hanyuma abaga ikimasa, inyama zacyo azirambika hejuru y’inkwi.

³⁴Abwira rubanda, ati «Nimwuzuze amazi mu bibindi bine, maze muyasuke hejuru y’igitambo no hejuru y’inkwi!» Babigenza batyo. Arababwira ati «Nimwongere!» Babikora incuro ya kabiri. Arakomeza arababwira, ati «Nimwongere ubwa gatatu!» Babigira incuro ya gatatu.

³⁵Amazi asendera urutambiro, ndetse yuzura na wa muferege.

³⁶Isaha yo gutura igitambo igeze, umuhanuzi Eliya yegera urutambiro, asenga agira ati «Uhoraho, Mana ya Abrahamu, na Izaki, na Israheli, erekana uyu munsi ko ari wowe Mana muri Israheli, naho jyewe nkaba umugaragu wawe, kandi ko ibyo byose nabikoze nkurikije ijambo ryawe.

³⁷Ngaho nsubiza, Uhoraho, nsubiza kugira ngo iyi mbaga imenye ko wowe Uhoraho uri Imana, kandi ko ari wowe wigaruriye imitima yabo!»

³⁸Ubwo umuriro w’Imana[73] uramanuka, utwika igitambo, inkwi, amabuye n’umukungugu, kandi ukamya amazi yari mu muferege.

³⁹Abantu bose babibonye bikubita hasi bubamye, baravuga bati «Uhoraho ni we Mana! Uhoraho ni we Mana!»

⁴⁰Nuko Eliya arababwira ati «Nimufate abahanuzi ba Behali, ntihagire n’umwe ubacika!» Barabafata. Eliya abamanurira ku mugezi wa Kishoni, arahabicira[74].

⁴¹Eliya abwira Akabu, ati «Zamuka urye kandi unywe[75], kuko numvise umuhindo w’imvura y’impangukano.»

⁴²Akabu ajya kurya no kunywa, naho Eliya ajya mu mpinga y’umusozi wa Karumeli, maze arapfukama, umutwe awukoza ku mavi ye.

⁴³Abwira umugaragu we, ati «Ngaho genda witegereze mu cyerekezo cy’inyanja!» Arazamuka aritegereza, maze aravuga ati «Nta cyo mbonye.» Eliya aramubwira ati «Subirayo», bigera ku ncuro ndwi.

⁴⁴Ku ncuro ya karindwi, umugaragu aravuga ati «Dore mbonye igicu gito kingana n’ikiganza cy’umuntu, kizamuka kiva mu nyanja.» Eliya aramubwira ati «Zamuka ubwire Akabu, uti ’Shumika amafarasi ku igare, maze umanuke imvura itaza kugufatirana.’»

⁴⁵Mu mwanya muto ijuru rirahinduka, ryuzura ibicu n’umuyaga, maze hagwa imvura y’umurindi. Nuko Akabu yurira igare rye, ajya i Yizireyeli.

⁴⁶Naho Eliya yuzura imbaraga z’Uhoraho, aracebura maze yiruka imbere ya Akabu, kugera mu marembo ya Yizireyeli[76].