Read kinyarwanda Icya kabiri cy'Abami 1 Bible Online

Icya kabiri cy'Abami 1 - kinyarwanda bible

Icya kabiri cy'Abami 1

¹Nyuma y’urupfu rw’umwami Akabu, igihugu cya Mowabu cyagomeye Israheli.

²Okoziya ahanuka mu idirishya ry’icyumba cye cyo mu nzu yo hejuru i Samariya, yitura hasi arakomereka bikomeye. Yohereza intumwa arazibwira ati «Mujye kundaguriza kwa Behali‐Zebubu[1], imana y’i Ekironi, kugira ngo menye niba nzakira ibi bikomere byanjye!»

³Ubwo Malayika w’Uhoraho abwira Eliya w’Umutishibi, ati «Haguruka! Usanganire intumwa z’umwami w’i Samariya, maze uzibaze uti ’Nta Mana iba muri Israheli, ku buryo mugomba kujya kuraguza kwa Behali‐Zebubu, imana y’i Ekironi?’

⁴Uti ’Ni cyo gitumye Uhoraho avuze ngo: Uburiri uryamyeho, nta bwo uzabubyukaho, uzapfa nta kabuza.’» Nuko Eliya arigendera.

⁵Intumwa zirahindukira, umwami arazibaza ati «Kuki mugarutse?»

⁶Ziramusubiza ziti «Twahuye n’umuntu aratubwira ati ’Nimugende musubire ku mwami wabohereje, maze mumubwire muti ’Uhoraho aravuze ngo: Mbese kohereza abantu kuraguza kwa Behali‐Zebubu, imana y’i Ekironi, ni uko nta Mana iba muri Israheli? Ngo ni yo mpamvu utazabyuka ku buriri uryamyeho, ngo uzapfa nta kabuza.’»

⁷Umwami abaza intumwa, ati «Uwo muntu mwahuye akababwira ayo magambo ameze ate?»

⁸Ziramusubiza ziti «Ni umugabo wari witeye umwenda w’ubwoya, akenyeye n’uruhu.» Nuko arababwira ati «Ni Eliya w’Umutishibi!»

⁹[2] Umwami yohereza kuri Eliya umutegeka w’umutwe w’abasirikare mirongo itanu, ajyana n’abo basirikare be. Uwo mutware arazamuka, asanga Eliya aho yari yicaye mu mpinga y’umusozi, maze aramubwira ati «Muntu w’Imana, umwami aravuze ngo: Manuka!»

¹⁰Eliya asubiza wa mutegeka w’umutwe w’abasirikare mirongo itanu, ati «Niba ndi umuntu w’Imana, umuriro nuve mu ijuru ugutwikane n’abantu bawe mirongo itanu!» Uwo mwanya umuriro uva mu ijuru, umutwikana n’umutwe w’abasirikare mirongo itanu yayoboraga.

¹¹Umwami arongera atuma kuri Eliya undi mutware w’umutwe w’abasirikare mirongo itanu, ajyana na bo. Umutware afata ijambo, aramubwira ati «Muntu w’Imana, umwami aravuze ngo: Gira vuba umanuke!»

¹²Ariko Eliya aramusubiza ati «Niba ndi umuntu w’Imana, umuriro nuve mu ijuru, ugutwikane n’abantu bawe mirongo itanu!» Umuriro w’Imana uva mu ijuru, umutwikana n’umutwe w’abasirikare mirongo itanu.

¹³Umwami yohereza umutware wa gatatu w’abasirikare mirongo itanu. Ageze imbere ya Eliya arapfukama, aramwinginga ati «Muntu w’Imana, girira impuhwe ubuzima bwanjye n’ubw’abagaragu bawe, ari bo aba basirikare mirongo itanu!

¹⁴Dore umuriro wavuye mu ijuru, utwika abatware babiri ba mbere hamwe n’abasirikare babo mirongo itanu. None ubu ngubu ndagusaba kubabarira ubuzima bwanjye!»

¹⁵Malayika w’Uhoraho abwira Eliya, ati «Manukana na we! Wimutinya!» Eliya arahaguruka, amanukana na wa mutware basanga umwami, aramubwira ati

¹⁶«Uhoraho aravuze ngo: Ko watumye abantu kujya kuraguza kwa Behali‐Zebubu, imana y’i Ekironi, ni uko nta Mana iba muri Israheli wagisha inama? Kubera iyo mpamvu, ntuzabyuka kuri ubwo buriri uryamyeho, uzapfa nta kabuza!»

¹⁷Okoziya arapfa nk’uko byari byavuzwe na Eliya, atumwe n’Uhoraho. Bitewe n’uko atagiraga umwana w’umuhungu, yazunguwe na Yoramu murumuna we, mu mwaka wa kabiri w’ingoma ya Yoramu mwene Yozafati, umwami wa Yuda.

¹⁸Ibindi bigwi bya Okoziya, ibyo yakoze, ntibyanditswe se mu gitabo cy’Amateka y’abami ba Israheli?