Read kinyarwanda Icya kabiri cy'Abami 12 Bible Online

Icya kabiri cy'Abami 12 - kinyarwanda bible

Icya kabiri cy'Abami 12

¹Yowasi yabaye umwami amaze imyaka irindwi avutse.

²Yowasi yimitswe mu mwaka wa karindwi w’ingoma ya Yehu, amara imyaka mirongo ine i Yeruzalemu ari ku ngoma. Nyina yitwaga Sibiya w’i Berisheba.

³Yowasi yakoze ibitunganiye Uhoraho mu gihe cy’ubuzima bwe bwose, kuko yari yararezwe neza n’umuherezabitambo Yehoyada.

⁴Nyamara kandi ntiyakuyeho amasengero y’ahirengeye; abantu bakomeje kuhaturira ibitambo no kuhatwikira imibavu.

⁵Yowasi abwira abaherezabitambo, ati «Feza yose rubanda begurira Uhoraho bakayizana mu Ngoro ye, imisoro buri muntu atanga akurikije umutungo we, feza yose buri muntu azana ku bwe abyibwirije akayishyira mu Ngoro y’Uhoraho,

⁶abaherezabitambo bazabyakire, buri wese amenye ibyo abaturanyi be bamuhaye, maze bazabisanishe Ingoro y’Uhoraho aho bazasanga yarangiritse hose.»

⁷Ariko mu mwaka wa makumyabiri n’itatu w’ingoma ya Yowasi, abaherezabitambo bari batarasana ibyangiritse ku Ngoro y’Uhoraho.

⁸Umwami Yowasi atumiza umuherezabitambo Yehoyada, n’abandi baherezabitambo, arababaza ati «Kuki mudasana ahangiritse ku Ngoro y’Uhoraho? Guhera ubu ntimuzongera gufata feza y’abo muri kumwe, kuko mwagombaga kuyitanga kugira ngo isane ibyangiritse kuri iriya Ngoro.»

⁹Abaherezabitambo bemera ko batazongera kwakira feza ya rubanda, kandi ko batakigomba gusana aho Ingoro y’Uhoraho yangiritse.

¹⁰Umuherezabitambo Yehoyada afata isanduku, atobora umwenge mu gipfundikizo cyayo, hanyuma ayitereka iruhande rw’urutambiro, mu ruhande rw’iburyo umuntu yinjira[38] mu Ngoro y’Uhoraho. Abaherezabitambo barindaga irembo, bakajya bashyiramo feza yose baturaga mu Ngoro y’Uhoraho.

¹¹Kandi iyo babonaga ko isanduku irimo feza nyinshi, umunyamabanga w’umwami n’umuherezabitambo mukuru barazaga bakayikuramo, bakabara iyo feza igenewe Ingoro y’Uhoraho.

¹²Bamara kuyibara bakayishyira abagombaga gukoresha imirimo, ari bo bari bashinzwe kumenya Ingoro y’Uhoraho, na bo bakayihemba ababaji n’abubatsi,

¹³abafundi n’ababazaga amabuye, ndetse bakayiguramo ibiti n’amabuye abajwe byo gusana ahangiritse ku Ngoro y’Uhoraho.

¹⁴Nyamara iyo feza baturaga mu Ngoro y’Uhoraho, si yo bakoreshagamo ibikombe bya feza, cyangwa ibyuma, cyangwa ibyungo, cyangwa amakondera, cyangwa se ikindi gikoresho cya zahabu cyangwa feza kigenewe Ingoro y’Uhoraho.

¹⁵Iyo feza yahabwaga abashinzwe imirimo, bakayikoresha mu gusana Ingoro y’Uhoraho.

¹⁶Abo bakoreshaga imirimo, ntibagenzurwaga ku buryo bahembaga abakozi, kuko bakoranaga umurava.

¹⁷Naho feza yatangwagaho ibitambo byo kwigorora n’iby’impongano z’ibyaha, nta bwo yajyaga mu isanduku y’Ingoro y’Uhoraho, ahubwo yajyanwaga n’abaherezabitambo.

¹⁸Nuko Hazayeli, umwami w’Abaramu, arazamuka ajya gutera umugi wa Gati, arawigarurira. Arangije afata umugambi wo gutera Yeruzalemu[39].

¹⁹Yowasi, umwami wa Yuda, afata ibintu byose byatuwe Uhoraho n’abasekuruza be Yozafati, Yoramu na Okoziya, abami ba Yuda, afata n’ibyo we ubwe yari yaratuye, na zahabu yose yo mu mutungo w’Ingoro y’Uhoraho n’iyo mu ngoro y’umwami, nuko abyoherereza Hazayeli, umwami w’Abaramu, bituma areka umugambi wo gutera Yeruzalemu.

²⁰Ibindi bigwi bya Yowasi, ibyo yakoze byose ntibyanditswe se mu gitabo cy’Amateka y’abami ba Yuda?

²¹Abagaragu ba Yowasi baramugomera, baramugambanira, bamwicira i Betimilo[40] . . .

²²Yishwe na Yozakari mwene Shimeyati, na Yehozabadi mwene Shomeri, abagaragu be. Umurambo we bawushyingura mu mva y’abasekuruza be mu Murwa wa Dawudi. Azungurwa ku ngoma n’umuhungu we Amasiya.