Read kinyarwanda Icya kabiri cy'Abami 13 Bible Online

Icya kabiri cy'Abami 13 - kinyarwanda bible

Icya kabiri cy'Abami 13

¹Mu mwaka wa makumyabiri n’itatu w’ingoma ya Yowasi mwene Okoziya, umwami wa Yuda, Yowakazi arimikwa aba umwami w’Abayisraheli i Samariya, ingoma ayimaraho imyaka cumi n’irindwi.

²Yakoze ibidatunganiye Uhoraho, ntiyareka gukurikiza ibyaha Yerobowamu mwene Nebati yakoresheje Abayisraheli, ntiyabigendera kure.

³Uhoraho yarakariye cyane Abayisraheli, akajya abagabiza Hazayeli, umwami w’Abaramu, n’umuhungu we Beni‐Hadadi.

⁴Ariko Yowakazi yinginga Uhoraho ngo areke kurakara, aramwumvira kuko yari abonye uko Abayisraheli barenganywa n’umwami w’Abaramu.

⁵Uhoraho yoherereza Abayisraheli umukiza[41]; Abayisraheli bava mu nzara z’Abaramu bongera kujya gutura mu mahema yabo nka mbere.

⁶Ariko ntibaca ukubiri n’ibyaha Yerobowamu yabakoresheje; bakomeje kubyibandaho, ndetse bakomera no ku biti byeguriwe ibigirwamana byabo, byari bishinze i Samariya.

⁷Ingabo Yowakazi yari asigaranye, bari abagabo mirongo itanu bagendaga ku mafarasi, amagare cumi, n’abagabo ibihumbi cumi bagendaga ku maguru, kuko abandi bose, umwami w’Abaramu yari yabatsembye abagira nk’umukungugu banyukanyutse.

⁸Ibindi bigwi bya Yowakazi, ibyo yakoze byose n’ubutwari bwe, ntibyanditswe se mu gitabo cy’Amateka y’abami ba Israheli?

⁹Yowakazi aratanga asanga abasekuruza be, umurambo we ushyingurwa i Samariya. Umuhungu we Yowasi amuzungura ku ngoma.

¹⁰Mu mwaka wa mirongo itatu n’irindwi w’ingoma ya Yowasi, umwami wa Yuda, Yowasi mwene Yowakazi, yima ingoma ya Israheli i Samariya, ayimaraho imyaka cumi n’itandatu.

¹¹Yakoze ibidatunganiye Uhoraho, akora ibyaha byose Yerobowamu mwene Nebati yakoreshereje Abayisraheli, ntiyagira na kimwe asiga inyuma.

¹²Ibindi bigwi bya Yowasi, ibyo yakoze n’ubutwari bwe, intambara yarwanye na Amasiya, umwami wa Yuda, ntibyanditswe se mu gitabo cy’Amateka y’abami ba Israheli?

¹³Yowasi aratanga asanga abasekuruza be, Yerobowamu yicara ku ntebe ye y’ubwami. Umurambo wa Yowasi ushyingurwa i Samariya, hamwe n’abami ba Israheli.

¹⁴[42] Elisha afatwa n’indwara yagombaga kumuhitana. Yowasi, umwami wa Israheli, aramanuka ajya iwe. Amugezeho aramuririra atera hejuru, ati «Ayiwe Mubyeyi! Ayiwe Mubyeyi! Amagare n’amafarasi bya Israheli!»

¹⁵Elisha aramubwira ati «Fata umuheto n’imyambi!» Yowasi afata umuheto n’imyambi.

¹⁶Elisha abwira umwami wa Israheli, ati «Fora umuheto!» Undi arawufora. Elisha ashyira ibiganza bye ku by’umwami,

¹⁷maze aravuga ati «Kingura idirishya rireba iburasirazuba[43]!» Yowasi ararikingura. Elisha aramubwira ati «Rasa!» Undi ararasa. Elisha aravuga ati «Uwo mwambi ni wo gutsinda k’Uhoraho, ni umwambi wo kunesha ingabo z’Abaramu. Uzatsindira Abaramu kuri Afeki ugeze ubwo ubatsemba.»

¹⁸Yongera kubwira Yowasi, ati «Fata imyambi!» Yowasi arayifata. Elisha abwira umwami wa Israheli, ati «Yikubitishe hasi!» Yowasi ayikubitisha hasi gatatu, hanyuma arekera aho.

¹⁹Umuntu w’Imana aramurakarira, aramubwira ati «Iyo ukubita gatanu cyangwa gatandatu, wari kuzatsinda Abaramu kugeza ubwo ubatsembyeho, none ubwo wakubise gatatu gusa, uzabatsinda gatatu gusa.»

²⁰Elisha arapfa, baramuhamba. Uko umwaka utashye ibitero by’abagome bigaturuka mu gihugu cya Mowabu bigakwira mu gihugu.

²¹Umunsi umwe abantu bari bagiye guhamba umupfu, babonye kimwe muri ibyo bitero, bajugunya iyo ntumbi mu mva yahambwemo Elisha, nuko barahunga. Intumbi ye igwira amagufa ya Elisha, wa muntu ahita azuka[44] maze arahaguruka, arahagarara.

²²Hazayeli, umwami w’Abaramu, yahoraga arenganya Abayisraheli mu gihe cyose cy’ingoma ya Yowakazi.

²³Ariko Uhoraho yagiriye imbabazi Abayisraheli, abagaragariza impuhwe ze, arabababarira, arabagarukira kubera isezerano yasezeranyije Abrahamu, Izaki na Yakobo, nuko arivuguruza ntiyahita abatsemba.

²⁴Hazayeli, umwami w’Abaramu, aratanga, umuhungu we Beni‐Hadadi amuzungura ku ngoma.

²⁵Yowasi, mwene Yowakazi, agarura imigi yose Beni‐Hadadi, umuhungu wa Hazayeli, yari yaranyaze se Yowakazi mu ntambara. Yowasi atsinda Beni‐Hadadi gatatu, hanyuma agarura imigi ya Israheli.