Read kinyarwanda Icya kabiri cy'Abami 15 Bible Online

Icya kabiri cy'Abami 15 - kinyarwanda bible

Icya kabiri cy'Abami 15

¹Mu mwaka wa makumyabiri n’irindwi w’ingoma ya Yerobowamu, umwami wa Israheli, Hoziya mwene Amasiya, umwami wa Yuda, yima ingoma.

²Icyo gihe yari amaze imyaka cumi n’itandatu avutse, ategeka imyaka mirongo itanu n’ibiri i Yeruzalemu. Nyina yitwaga Yekoliyahu w’i Yeruzalemu.

³Yakoze ibitunganiye Uhoraho, mbese akurikiza se Amasiya muri byose.

⁴Icyakora ntiyashenye amasengero y’ahirengeye; abantu bakomeje kuhaturira ibitambo no kuhatwikira imibavu.

⁵Uhoraho ahana umwami, amuteza indwara y’ibibembe iramuhitana. Atarapfa bamuhaye akato aba mu nzu ya wenyine. Ubwo umuhungu we Yotamu wari ushinzwe iby’ingoro y’umwami, aba ari we utegeka igihugu.

⁶Ibindi bigwi bya Hoziya, ibyo yakoze byose, ntibyanditswe se mu gitabo cy’Amateka y’abami ba Yuda?

⁷Hoziya aratanga asanga abasekuruza be, umurambo we ushyingurwa hamwe n’abasekuruza be, mu Murwa wa Dawudi. Umuhungu we Yotamu amuzungura ku ngoma.

⁸Mu mwaka wa mirongo itatu n’umunani w’ingoma ya Azariya, umwami wa Yuda, Zakariya mwene Yerobowamu aba umwami wa Israheli i Samariya, amara amezi atandatu ari ku ngoma.

⁹Yakoze ibidatunganiye Uhoraho, akurikiza abasekuruza be muri byose. Ntiyirinze ibyaha Yerobowamu, mwene Nebati yakoresheje Abayisraheli.

¹⁰Nuko Shalumi mwene Yabeshi aramugomera, amukubitira mu maso ya rubanda aramwica, hanyuma afata ubutegetsi.

¹¹Ibindi bigwi bya Zakariya byanditswe mu gitabo cy’Amateka y’abami ba Israheli.

¹²Iryo ni rya jambo Uhoraho yari yarabwiye Yehu, agira ati «Abana bawe bazicara ku ntebe y’ubwami bwa Israheli kugeza ku gisekuru cya kane.» Koko kandi ni ko byagenze.

¹³Shalumi mwene Yabeshi yima ingoma mu mwaka wa mirongo itatu n’icyenda w’ingoma ya Hoziya, umwami wa Yuda, nuko amara ukwezi kumwe ari ku ngoma i Samariya.

¹⁴Uwitwa Menahemu mwene Gadi ava i Tirisa ajya i Samariya; atera Shalumi mwene Yabeshi aramwica, hanyuma yima ingoma mu kigwi cye.

¹⁵Ibindi Shalumi yakoze n’ubugome bwe, byanditswe mu gitabo cy’Amateka y’abami ba Israheli.

¹⁶Nuko Menahemu atera umugi wa Tapuwa yica abaturage b’aho, kandi atsemba n’abo mu karere ko hagati ya Tirisa na Tapuwa. Yateye uwo mugi kubera ko bari banze kumufungurira amarembo, maze afomoza abagore bose bari batwite.

¹⁷Mu mwaka wa mirongo itatu n’icyenda w’ingoma ya Hoziya, umwami wa Yuda, Menahemu mwene Gadi aba umwami wa Israheli i Samariya, amara imyaka cumi ari ku ngoma.

¹⁸Yakoze ibidatunganiye Uhoraho; mu buzima bwe bwose ntiyirinze ibyaha Yerobowamu mwene Nebati yakoresheje Abayisraheli.

¹⁹Pulu[49], umwami w’Abanyashuru, atera igihugu, ariko Menahemu amuhongera amatalenta igihumbi ya feza, kugira ngo amutize amaboko maze ubwami bwe bukomere.

²⁰Menahemu asoresha Abayisraheli bakize, buri wese agatanga amasikeli mirongo itanu ya feza, kugira ngo ayahe umwami w’Abanyashuru. Umwami w’Abanyashuru asubira iwe, ntiyaba akigumye mu gihugu cya Israheli.

²¹Ibindi bigwi bya Menahemu, ibyo yakoze byose, ntibyanditswe se mu gitabo cy’Amateka y’abami ba Israheli?

²²Menahemu aratanga asanga abasekuruza be, maze umuhungu we Pekahiya amuzungura ku ngoma.

²³Mu mwaka wa mirongo itanu w’ingoma ya Hoziya, umwami wa Yuda, Pekahiya mwene Menahemu aba umwami wa Israheli i Samariya, amara imyaka ibiri ari ku ngoma.

²⁴Yakoze ibidatunganiye Uhoraho, ntiyirinda ibyaha Yerobowamu mwene Nebati yakoresheje Abayisraheli.

²⁵Umutware we Peka mwene Remaliyahu aramugomera, amuterera inkota mu munara w’ingoro y’umwami, i Samariya. Nuko Peka, ari kumwe n’abagabo mirongo itanu b’Abagilihadi, yica umwami, maze amuzungura ku ngoma.

²⁶Ibindi bigwi bya Pekahiya, ibyo yakoze byose, byanditswe mu gitabo cy’Amateka y’abami ba Israheli.

²⁷Peka mwene Remaliyahu aba umwami wa Israheli i Samariya, mu mwaka wa mirongo itanu n’ibiri w’ingoma ya Hoziya, umwami wa Yuda. Yamaze imyaka makumyabiri ari ku ngoma.

²⁸Yakoze ibidatunganiye Uhoraho, kuko atirinze ibyaha Yerobowamu mwene Nebati yakoresheje Abayisraheli.

²⁹Ku ngoma ya Peka, umwami wa Israheli, ni bwo Tegalati‐Falazari, umwami w’Abanyashuru, yateye imigi ya Iyoni, Abeli‐Betimaka, Yaniwa, Kedeshi, Hasori; atera na Gilihadi, Galileya n’igihugu cyose cya Nefutali. Aho hose arahigarurira, abaturage b’aho abajyana bunyago[50] muri Ashuru.

³⁰Hozeya mwene Ela agomera Peka mwene Remaliyahu aramwica, maze amuzungura ku ngoma. Ubwo hari mu mwaka wa makumyabiri w’ingoma ya Yotamu, mwene Hoziya.

³¹Ibindi bigwi bya Peka, ibyo yakoze byose, byanditswe mu gitabo cy’Amateka y’abami ba Israheli.

³²Mu mwaka wa kabiri w’ingoma ya Peka mwene Remaliyahu, umwami wa Israheli, Yotamu mwene Hoziya, aba umwami wa Yuda.

³³Yimitswe amaze imyaka makumyabiri n’itanu avutse, amara imyaka cumi n’itandatu ari ku ngoma i Yeruzalemu. Nyina yitwaga Yerusha, umukobwa wa Sadoki.

³⁴Yakoze ibitunganiye Uhoraho, mbese akurikiza se Hoziya muri byose.

³⁵Ariko amasengero y’ahirengeye ntiyayavanyeho; abantu bakomeje kujya kuhaturira ibitambo no kuhatwikira imibavu. Ni we wubatse irembo rya ruguru ry’Ingoro y’Uhoraho.

³⁶Ibindi bigwi bya Yotamu, ibyo yakoze, ntibyanditswe se mu gitabo cy’Amateka y’abami ba Yuda?

³⁷Muri icyo gihe ni bwo Uhoraho yatangiye kohereza Rasoni, umwami w’Abaramu, na Peka mwene Remaliyahu, kurwanya[51] igihugu cya Yuda.

³⁸Yotamu aratanga asanga abasekuruza be, umurambo we ushyingurwa hamwe n’abasekuruza be, mu Murwa wa Dawudi. Umuhungu we Akhazi amuzungura ku ngoma.