Read kinyarwanda Icya kabiri cy'Abami 3 Bible Online

Icya kabiri cy'Abami 3 - kinyarwanda bible

Icya kabiri cy'Abami 3

¹Mu mwaka wa cumi n’umunani w’ingoma ya Yozafati, umwami wa Yuda, ni bwo Yoramu mwene Akabu yimye ingoma ya Israheli i Samariya, amara imyaka cumi n’ibiri ku ngoma.

²Yakoze ibidatunganiye Uhoraho, icyakora ntiyari ahwanye na se na nyina, kuko yashenye inkingi y’ibuye se yari yarubakiye Behali.

³Ibyo ari byo byose, yibanze ku cyaha Yerobowamu mwene Nebati yari yarakoresheje Abayisraheli, ntiyakizibukira.

⁴Mesha, umwami w’i Mowabu, yari umutunzi akajya atura umwami w’Abayisraheli utwana tw’intama ibihumbi ijana n’amapfizi y’intama z’ubwoya bwinshi ibihumbi ijana.

⁵Ariko Akabu amaze gutanga, umwami w’i Mowabu yagomeye umwami wa Israheli.

⁶Umwami Yoramu ahita ava i Samariya, akoranya Abayisraheli bose.

⁷Hanyuma aragenda yohereza intumwa kwa Yozafati, umwami wa Yuda kumubwira ngo «Umwami w’i Mowabu yangomeye, ese ntiwaza tukajya kumurwanya?» Na we arasubiza ati «Nzazamuka; maze jyewe nawe bizatugendekere kimwe, umuryango wanjye ube nk’uwawe, ingabo zanjye zibe nk’izawe, kandi n’amafarasi yanjye abe nk’ayawe.»

⁸Yongeraho ati «Tuzaca mu yihe nzira?» Aramusubiza ati «Tuzanyura inzira y’ubutayu bwa Edomu.»

⁹Umwami wa Israheli, umwami wa Yuda n’uwa Edomu bafata inzira, bagenda iminsi irindwi hanyuma amazi arabura, ingabo zirayabura, kimwe n’amatungo yari abikorereye imitwaro.

¹⁰Umwami wa Israheli aravuga ati «Ayiwe! Ko ubanza Uhoraho yadutumije, uko turi abami batatu, ngo atugabize Abamowabu!»

¹¹Yozafati arabaza ati «Nta muhanuzi w’Uhoraho uri hano ngo tumugishe inama y’Uhoraho?» Umwe mu bagaragu b’umwami wa Israheli arabasubiza ati «Hano hari Elisha mwene Shafati wagendanaga na Eliya.»

¹²Yozafati aravuga ati «Koko ijambo ry’Uhoraho rimurimo.» Uwo mwanya, umwami wa Israheli amanukana na Yozafati n’umwami wa Edomu, basanga Elisha.

¹³Elisha abaza umwami wa Israheli, ati «Mpuriye he nawe? Sanga abahanuzi ba so na nyoko.» Umwami wa Israheli aramusubiza ati «Oya, kuko Uhoraho yadutumije, uko turi abami batatu, kugira ngo adutererane mu maboko y’Abamowabu.»

¹⁴Elisha aravuga ati «Ndahiye Uhoraho, Umugaba w’ingabo nkorera, ko iyo nza kuba ntubaha Yozafati, umwami wa Yuda, wowe simba nkumvise, nta n’ubwo mba nkuroye!

¹⁵None ubu nzanira umucuranzi!» Mu gihe wa mucuranzi yacurangaga, ikiganza cy’Uhoraho kiza kuri Elisha.

¹⁶Elisha aravuga ati «Uhoraho aravuze ngo: Nibacukure imyobo myinshi kuri iki kibaya!»

¹⁷Arongera ati «Uhoraho aravuze ngo: Nta muyaga muzumva uhuha, nta n’imvura muzabona igwa, nyamara iki kibaya kizasendera amazi maze munywe, mwuhire amashyo yanyu n’amatungo abikorereye imitwaro.

¹⁸Ariko kandi hari n’ikindi kirenzeho Uhoraho azabakorera: azagabiza Abamowabu mu biganza byanyu!

¹⁹Muzasenya imigi yabo yose ikomeye, muzatema ibiti byose byera imbuto ziribwa, muzasiba amasoko yose y’amazi kandi mwangize imirima yose ihinze muyijugunyamo amabuye.»

²⁰Bukeye, isaha yo gutura igitambo igeze, amazi atemba ava muri Edomu, asendera igihugu cyose[9].

²¹Abamowabu bose bari bamenye ko abami baje kubatera: ubwo batumira ingabo zabo zose zimenyereye kurwanisha inkota, ndetse n’abari bararengeje imyaka yo kurwana, maze bategera ku mupaka.

²²Bahagurutse mu gitondo, babona izuba rirasiye ku mazi imbere yabo, ayo mazi atukura nk’amaraso[10].

²³Nuko barabwirana bati «Ni amaraso! Ni ukuri, ba bami basubiranyemo barwanisha inkota, none bicanye. Twebwe Bamowabu, reka tujye kwisahurira!»

²⁴Begera ingando y’Abayisraheli. Nuko Abayisraheli barabahindukirana, barabanesha barahunga. Abayisraheli binjira mu gihugu cya Mowabu, baragitsinda.

²⁵Abayisraheli basenya imigi, buri muntu akajugunya amabuye mu mirima ihinze barayuzuza, basiba amasoko yose y’amazi, batema ibiti byera imbuto ziribwa, hasigara gusa inkike z’amabuye z’i Kiri‐Heresi[11], ariko na ho abanyamihumetso barahagota, barahasenya.

²⁶Umwami w’Abamowabu amaze kubona ko yaneshejwe, afata abagabo magana arindwi bitwaje inkota, ajyana na bo gutera umwami wa Edomu, ariko ntibabishobora.

²⁷Noneho afata umuhungu we w’imfura wagombaga kuzamuzungura ku ngoma, amuturaho igitambo gitwikwa ku nkike y’amabuye yari izengurutse umugi. Abayisraheli babibonye, baradagadwa, nuko bava i Mowabu basubira mu gihugu cyabo.