Read kinyarwanda Icya kabiri cy'Abami 8 Bible Online

Icya kabiri cy'Abami 8 - kinyarwanda bible

Icya kabiri cy'Abami 8

¹Elisha yari yarabwiye wa mugore yazuriye umwana, ati «Haguruka ugende, wowe n’umuryango wawe, musuhukire aho muzabona hose, kuko Uhoraho ateje inzara izamara imyaka irindwi mu gihugu!»

²Umugore arahaguruka abigenza uko umuntu w’Imana yari yamubwiye: aragenda ajyana n’abo mu rugo rwe, basuhukira mu gihugu cy’Abafilisiti, bamarayo imyaka irindwi.

³Imyaka irindwi irangiye, umugore ava mu gihugu cy’Abafilisiti, asanga umwami wa Israheli, amubwira amutakambira ku byerekeye inzu ye n’imirima[22] ye.

⁴Muri uwo mwanya, umwami yavuganaga na Gehazi, umugaragu w’umuntu w’Imana, aramubwira ati «Ntekerereza ibintu byose bitangaje Elisha yakoze!»

⁵Gehazi atekerereza umwami ukuntu Elisha yazuye umwana wari wapfuye; mu gihe akibimubwira haza wa mugore n’umwana we Elisha yazuye!

⁶Umwami abibaza uwo mugore, arabimutekerereza. Nuko umwami ahamagaza umwe mu batware be, aramubwira ati «Hesha uyu mugore ibye byose n’umusaruro wose wavuye mu mirima ye, uhereye ku munsi yaviriye muri iki gihugu kugera ubu agarutse.»

⁷Elisha ajya i Damasi mu gihe Beni‐Hadadi, umwami wa Aramu, yari arwaye. Babwira umwami, bati «Umuntu w’Imana yaje hano.»

⁸Umwami abwira Hazayeli[23], ati «Fata amaturo maze uyashyire umuntu w’Imana, umunsabire kumbariza Uhoraho niba nzakira iyi ndwara.»

⁹Hazayeli ajya kureba Elisha, ajyana amaturo avuye mu byiza byose biri i Damasi, ayo maturo yari imizigo ihetswe n’ingamiya mirongo ine. Amugezeho amuhagarara imbere, maze aramubwira ati «Umwana wawe Beni‐Hadadi, umwami wa Aramu, akuntumyeho ngo nkubaze niba azakira indwara arwaye.»

¹⁰Elisha aramusubiza ati «Genda umubwire ngo: Uzakira nta kabuza, ariko mu by’ukuri, Uhoraho yanyeretse ko agomba gupfa[24].»

¹¹Hanyuma umuntu w’Imana aramutumbira ubutanyeganyega, ararira.

¹²Hazayeli arabaza ati «Databuja ararizwa n’iki?» Elisha aramusubiza ati «Ndarizwa n’uko menye ibibi uzakorera Abayisraheli: uzatwika amazu yabo, wicishe inkota abana babo b’abasore, utwana duto uduhonyore, abagore babo batwite ubafomoze.»

¹³Hazayeli aravuga ati «Jye umugaragu wawe, imbwa itagira icyo imaze, nashobora nte gukora bene ibyo?» Elisha aramusubiza ati «Uhoraho yanyeretse ko uzaba umwami w’Abaramu.»

¹⁴Nuko Hazayeli asezera kuri Elisha, asanga shebuja. Beni‐Hadadi aramubaza ati «Elisha yakubwiye iki?» Hazayeli aramusubiza ati «Yambwiye ko uzakira nta kabuza.»

¹⁵Bukeye Hazayeli afata uburingiti, abwinika mu mazi, abupfukisha umwami. Umwami aratanga, Hazayeli amuzungura ku ngoma.

¹⁶Yoramu mwene Yozafati yimye ingoma muri Yuda, mu mwaka wa gatanu w’ingoma ya Yoramu mwene Akabu, umwami wa Israheli.

¹⁷Yimitswe amaze imyaka mirongo itatu n’ibiri avutse, amara imyaka munani ari ku ngoma i Yeruzalemu.

¹⁸Yakurikiye inzira mbi y’abami ba Israheli agenza nk’abo mu nzu ya Akabu muri byose, kuko yari yarashatse umukobwa wa Akabu[25]. Yakoze ibidatunganiye Uhoraho.

¹⁹Ariko Uhoraho ntiyashaka kurimbura Yuda agiriye umugaragu we Dawudi, kuko yamusezeranyije kutavana abazamukomokaho ku ntebe y’ubwami i Yeruzalemu.

²⁰Ku gihe cye, Edomu igomera Yuda, yiyimikira uwayo mwami.

²¹Yoramu ajya i Sayiri hamwe n’amagare ye yose. Abanyedomu barahamugotera, we n’abatware b’amagare be, nyamara mu gicuku Yoramu abacamo icyuho, abantu be barahunga basubira iwabo.

²²Bityo, Abanyedomu bagomera Yuda kugeza na n’ubu. Icyo gihe Libuna na yo iragoma.

²³Ibindi bigwi bya Yoramu, ibyo yakoze byose, ntibyanditswe se mu gitabo cy’Amateka y’abami ba Yuda?

²⁴Yoramu aratanga, asanga abasekuruza be, umurambo we ushyingurwa hamwe n’abasekuruza be, mu Murwa wa Dawudi. Umuhungu we Okoziya aramuzungura.

²⁵Okoziya mwene Yoramu yimye ingoma muri Yuda, mu mwaka wa cumi n’ibiri w’ingoma ya Yoramu mwene Akabu, umwami wa Israheli.

²⁶Yimitswe amaze imyaka makumyabiri n’ibiri avutse, amara umwaka umwe ari ku ngoma i Yeruzalemu. Nyina yitwaga Ataliya, umukobwa wa Omari[26], umwami wa Israheli.

²⁷Yakurikiye inzira mbi yo mu muryango wa Akabu, kandi akora ibidatunganiye Uhoraho nk’uko abo mu nzu ya Akabu bagenzaga, kuko yari mwishywa wabo.

²⁸Atabarana na Yoramu mwene Akabu batera Hazayeli, umwami wa Aramu, barwanira i Ramoti y’i Gilihadi. Abaramu bakomeretsa Yoramu.

²⁹Umwami Yoramu ajya i Yizireyeli kwivurizayo ibikomere yari yatewe n’Abaramu, ubwo yarwaniraga i Rama na Hazayeli, umwami wa Aramu. Nuko Okoziya mwene Yoramu, umwami wa Yuda, aramanuka ajya i Yizireyeli gusura Yoramu mwene Akabu, wari wakomeretse.