Read kinyarwanda Icya mbere cy'Amateka 11 Bible Online

Icya mbere cy'Amateka 11 - kinyarwanda bible

Icya mbere cy'Amateka 11

¹Imiryango yose ya Israheli isanga Dawudi i Heburoni, maze iramubwira iti «Ngaho twitegereze, turi amagufa yawe n’umubiri wawe.

²Kera, igihe Sawuli yari akiri umwami wacu, ni wowe watabaranaga na Israheli kandi ugatabarukana na yo. Ikindi kandi, Uhoraho Imana yawe yarakubwiye ati ’Ni wowe uzaragira umuryango wanjye Israheli, kandi ni wowe uzaba umutware wa Israheli.’»

³Nuko abakuru b’imiryango ya Israheli bose basanga umwami i Heburoni, maze Dawudi agirana na bo isezerano i Heburoni, imbere y’Uhoraho. Nuko basiga Dawudi amavuta, aba umwami wa Israheli, nk’uko Uhoraho yari yarabivugishije Samweli.

⁴Dawudi n’Abayisraheli bose bajya gutera Yeruzalemu, ari yo Yebuzi, no kurwanya Abayebuzi bari batuye icyo gihugu.

⁵Abaturage b’i Yebuzi babwira Dawudi, bati «Ntuzinjira hano!» Ariko Dawudi yigarurira ikigo cya Siyoni, ari na cyo cyabaye umurwa wa Dawudi.

⁶Koko rero Dawudi yari yavuze ati «Utanga abandi kwica Umuyebuzi azaba umutware n’igikomangoma.» Nuko Yowabu mwene Seruya ababanziriza imbere, aba ari we uba umutware.

⁷Dawudi atura muri icyo kigo, bituma bacyita Umurwa wa Dawudi.

⁸Hanyuma yubaka umugi n’ahakikije i Milo, mu mpande zose, naho Yowabu asana ahari hasigaye.

⁹Dawudi agenda arushaho gukomera, kandi Uhoraho Nyir’ububasha yari kumwe na we.

¹⁰Ngaba abatware b’intwari za Dawudi; ni bo bamuteye inkunga mu gihe cyose yari ku ngoma, kandi ni na bo bamwimitse, bafatanyije na Israheli yose, nk’uko Uhoraho yari yarabivugiye kuri Israheli.

¹¹Ngiri irondora ry’intwari za Dawudi: Yashobeyamu mwene Hakumoni, umutware w’abitwa Abatatu b’imena. Ni we wabanguriye icumu rye ku bantu magana atatu abicira icyarimwe.

¹²Umukurikira ni Eleyazari mwene Dodo w’Umwahohi wari mu Batatu b’imena.

¹³Ni we wari hamwe na Dawudi i Pasidamimu igihe Abafilisiti bari bahakoraniye kugira ngo barwane. Aho hari umurima wa za bushoki nyinshi, nuko abantu bahunga Abafilisiti.

¹⁴Eleyazari uwo ahagarara hagati mu murima, arawurinda, maze atsinsura Abafilisiti. Bityo Uhoraho atsindira Israheli bikomeye.

¹⁵Batatu bo muri Ba Mirongo Itatu b’imena baramanuka basanga Dawudi ku rutare ruri hafi y’ubuvumo bwa Adulamu, mu gihe Abafilisiti bari baciye ingando mu kibaya cy’Abarefayimu.

¹⁶Ubwo Dawudi yari mu buhungiro, naho igico cy’Abafilisiti kiri i Betelehemu.

¹⁷Dawudi avuga icyifuzo cye, agira ati «Ni nde uzampa ku mazi yo mu iriba riri ku irembo rya Betelehemu, nkayanywa?»

¹⁸Ba batatu banyura mu ngando y’Abafilisiti barwana, bavoma amazi mu iriba riri ku irembo rya Betelehemu, barayajyana, bayashyikiriza Dawudi. We ariko yanga kuyanywa ahubwo ayaturaho Uhoraho ituro riseswa.

¹⁹Aravuga ati «Imana yanjye irandinde gukora kuri aya mazi! Aya ni amaraso y’abantu bahaze amagara yabo, bagira ngo bayanzanire!» Nuko yanga kuyanywa. Ibyo ni byo byakozwe na ba bagabo b’intwari, uko ari batatu.

²⁰Abishayi murumuna wa Yowabu, ni we wategekaga Ba Mirongo Itatu b’imena. Ni we kandi wakaraze icumu rye, rihinguranya abantu magana atatu, bituma aba ikirangirire muri Ba Mirongo Itatu b’imena.

²¹Yarubashywe kurusha Ba Mirongo Itatu b’imena, ndetse aba umutware wabo, ariko ntiyashyikira Intwari eshatu za mbere.

²²Benaya mwene Yehoyada, umwana w’umugabo w’intwari ukomoka i Kabuseli, yagaragaje ubutwari bwe kenshi. Ni we wishe abahungu bombi ba Ariyeli w’i Mowabu, ni na we wamanutse yicira intare ku iriba, ku munsi w’urubura.

²³Ni we kandi wishe Umunyamisiri wari ufite uburebure bw’imikono itanu. Uwo Munyamisiri yari yitwaje icumu ringana n’igiti cy’ababoshyi b’imyenda. Amanuka amusanga yitwaje inkoni, ashikuza icumu Umunyamisiri, amwicisha icumu rye bwite!

²⁴Ngibyo ibyo Benayahu mwene Yehoyada yakoze; yamamaye muri Ba Mirongo Itatu b’imena;

²⁵yagize icyubahiro kurusha izo Ntwari mirongo itatu, ariko ntiyahwanye n’Intwari eshatu za mbere. Maze Dawudi amugira umurinzi we.

²⁶Dore n’abandi babaye intwari zikomeye: ni Asaheli umuvandimwe wa Yowabu, Eluhanani mwene Dodo w’i Betelehemu,

²⁷Shamoti w’i Harodi, Helesi w’i Paloni,

²⁸Ira mwene Ikeshi w’i Tekowa, Abiyezeri w’i Anatoti,

²⁹Sibekayi w’i Husha, Ilayi w’i Ahoha,

³⁰Mahurayi w’i Netofa, Heledi mwene Bahana w’i Netofa,

³¹Itayi mwene Ribayi w’i Gibeya y’Ababenyamini, Benaya w’i Pireyatoni,

³²Hurayi wo ku tugezi tw’i Gashi, Abiyeli w’i Aruba,

³³Azumaweti w’i Bahurimu, Eliyahuba w’i Shaluboni,

³⁴Hashemu w’i Gizoni, Yonatani mwene Shage w’i Harani,

³⁵Ahiya mwene Sakari w’i Harari, Elifali mwene Uri,

³⁶Heferi w’i Mekerati, Ahiya w’i Peloni,

³⁷Hesiro w’i Karumeli, Narayi mwene Ezubayi,

³⁸Yoweli umuvandimwe wa Natani, Mibuhari mwene Haguri,

³⁹Seleki w’Umuhamoni, Nahurayi w’i Beroti, watwaraga intwaro za Yowabu mwene Seruya,

⁴⁰Ira w’i Yatiri, Garebu w’i Yatiri,

⁴¹Uriya w’Umuhiti, Zabadi mwene Ahulayi,

⁴²Adina mwene Shiza w’Umurubeni, umutware w’Abarubeni wagendanaga n’abantu mirongo itatu,

⁴³Hanani mwene Mayaka na Yoshafati w’i Mituni,

⁴⁴Uziya w’i Ashitaroti, Shama na Yeweli bene Yotamu w’i Aroweri,

⁴⁵Yediyaweli mwene Shimuri na Yoha, umuvandimwe we w’i Tisi,

⁴⁶Eliyeli w’i Mahawi, Yeribayi na Yoshaweya bene Elinahamu, Yituma w’Umumowabu,

⁴⁷Eliyeli, Obedi na Yasiyeli b’i Soba.