Read kinyarwanda Icya mbere cy'Amateka 14 Bible Online

Icya mbere cy'Amateka 14 - kinyarwanda bible

Icya mbere cy'Amateka 14

¹Bukeye Hiramu, umwami wa Tiri, yohereza intumwa kwa Dawudi, hamwe n’ibiti by’amasederi, ababaji b’amabuye n’abubatsi kugira ngo bamwubakire inzu.

²Nuko Dawudi amenyeraho ko Uhoraho yamugize umwami w’Abayisraheli, kandi ko yari akujije ubwami bwe agiriye Israheli, umuryango we.

³Dawudi ashakira abandi bagore i Yeruzalemu, arongera abyara abahungu n’abakobwa.

⁴Ngaya amazina y’abana be bavukiye i Yeruzalemu: ni Shamuwa, Shobabu, Natani, Salomoni,

⁵Yibuhari, Elishuwa, Elipaleti,

⁶Noga, Nefegi, Yafiya,

⁷Elishama, Behaliyada na Elifeleti.

⁸Bukeye, Abafilisiti bamenya ko Dawudi yasizwe amavuta kugira ngo abe umwami w’Abayisraheli bose. Nuko Abafilisiti bose barazamuka, bajya gushakashaka Dawudi. Dawudi na we arabimenya, aza kubasanganira.

⁹Ubwo Abafilisiti baraza, badendeza mu kibaya cy’Abarefayimu.

¹⁰Dawudi ni ko kubaza Uhoraho, ati «Mbese nzamuke ntere Abafilisiti? Uri bubagabize ibiganza byanjye?» Uhoraho aramusubiza ati «Zamuka! Ndabagabiza ibiganza byawe.»

¹¹Nuko bazamuka i Behali‐Perasimu, Dawudi abatsinda aho. Dawudi aravuga ati «Imana yacishije ikiganza cyanjye icyuho mu banzi banjye, kimeze nk’igiciwe n’amazi ahombotse.» Ni yo mpamvu aho hantu bahise Behali‐Perasimu, ari byo kuvuga ngo ’Umutware w’ibyuho.’

¹²Abafilisiti basiga amashusho y’ibigirwamana byabo aho ngaho; Dawudi ategeka ko bayatwika.

¹³Abafilisiti bongera kudendeza mu kibaya.

¹⁴Dawudi yongera kubaza Imana, maze Imana iramubwira iti «Ntubatere ubaturutse imbere, ahubwo hindukira uturuke inyuma yabo, ahateganye n’ishyamba.

¹⁵Niwumva ikiriri gihinda giturutse hejuru y’ishyamba, uhutireho! Ubwo Imana iraba iri bujye imbere yawe, kugira ngo utsinde Abafilisiti.»

¹⁶Dawudi abigenza uko Imana yamutegetse, atsinda Abafilisiti kuva i Gibewoni kugeza i Gezeri.

¹⁷Dawudi aramamara mu bihugu byose, kandi Uhoraho atuma atinywa n’amahanga yose.