Read kinyarwanda Icya mbere cy'Amateka 15 Bible Online

Icya mbere cy'Amateka 15 - kinyarwanda bible

Icya mbere cy'Amateka 15

¹[13] Dawudi yiyubakira amazu mu Murwa wa Dawudi; agena ahantu h’Ubushyinguro bw’Imana kandi abushingira Ihema.

²Nuko aravuga ati «Abalevi bonyine ni bo bazajya baheka Ubushyinguro kuko ari bo Uhoraho yitoreye ngo bajye baheka Ubushyinguro bw’Uhoraho kandi banabukorere ubuziraherezo.»

³Dawudi akoranyiriza Abayisraheli bose i Yeruzalemu kugira ngo bazamure Ubushyinguro bw’Uhoraho babujyane ahantu yabuteganyirije.

⁴Akoranya na bene Aroni n’abalevi:

⁵muri bene Kehati hari Uriyeli w’umutware n’abavandimwe be ijana na makumyabiri;

⁶muri bene Merari hari Asaya w’umutware n’abavandimwe be magana abiri na makumyabiri;

⁷muri bene Gerishomu hari Yoweli w’umutware n’abavandimwe be ijana na mirongo itatu;

⁸muri bene Elisafani hari Shemaya w’umutware n’abavandimwe be magana abiri;

⁹muri bene Heburoni hari Eliyeli w’umutware n’abavandimwe be mirongo inani;

¹⁰muri bene Uziyeli hari Aminadabu w’umutware n’abavandimwe be ijana na cumi na babiri.

¹¹Dawudi atumiza abaherezabitambo Sadoki na Abiyatari, hamwe n’abalevi Uriyeli, Asaya, Yoweli, Shemaya, Eliyeli na Aminadabu.

¹²Maze arababwira ati «Muri abatware b’amazu y’abalevi; nimwitagatifuze mwebwe n’abavandimwe banyu, maze muzamure Ubushyinguro bw’Uhoraho, Imana ya Israheli, mubujyane ahantu nabuteganyirije.

¹³Amambere koko ntimwari muhari, Uhoraho yaduciyemo icyuho, kuko tutari twamutunganirije uko bikwiye.»

¹⁴Nuko Abaherezabitambo n’abalevi bitagatifuriza kuzamura Ubushyinguro bw’Uhoraho, Imana ya Israheli.

¹⁵Abalevi baheka Ubushyinguro bw’Imana bashyize imijishi yabwo ku ntugu zabo, nk’uko Musa yabitegetse akurikije ijambo ry’Uhoraho.

¹⁶Maze Dawudi abwira abatware b’abalevi gushyira abavandimwe babo b’abaririmbyi mu mwanya wabo, bitwaje ibikoresho byabo, ari byo inanga, imiduri n’ibyuma birangira, kugira ngo babivuze cyane maze amajwi yabyo arangurure yuzuye ibyishimo.

¹⁷Nuko abalevi bahashyira Hemani mwene Yoweli, no mu bavandimwe be Asafu mwene Berekiyahu; muri bene Merari abavandimwe babo bahashyira Etani mwene Kushayahu;

¹⁸hamwe na bo bahashyira na bene wabo, ari bo Zekariyahu mwene Yahaziyeli, Shemiramoti, Yehiyeli, Uni, Eliyabu, Benayahu, Maseyahu, Matitiyahu, Elifilehu na Mikineyahu, Obededomu na Yeweli; abo bose bari abanyanzugi.

¹⁹Mu baririmbyi, Hemani, Asafu na Etani bari bafite ibyuma birangira byo kurangurura amajwi;

²⁰Sekariya, Yahaziyeli, Shemiramoti, Yehiyeli, Uni, Yehiyeli, Maseyahu na Benayahu bari bafite inanga nini,

²¹naho Matitiyahu, Elifilehu, Mikineyahu, Obededomu, Yeweli na Azaziyahu bakagira inanga ntoya, kugira ngo bayobore indirimbo.

²²Kenaniyahu we yategekaga abalevi bari bashinzwe guheka Ubushyinguro, kuko yari abishoboye.

²³Berekiya na Elikana bari abanyanzugi hafi y’Ubushyinguro.

²⁴Abaherezabitambo Shebaniyahu, Yoshafati, Netaneli, Amasayi, Zekariyahu, Benayahu na Eliyezeri bavuzaga amakondera imbere y’Ubushyinguro bw’Imana. Naho Obededomu na Yahiya na bo bakaba abanyanzugi hafi y’Ubushyinguro.

²⁵Nuko Dawudi, n’abakuru b’Abayisraheli, n’abatware bategekaga ibihumbi, bagenda bishimye bazamuye Ubushyinguro bw’Isezerano ry’Uhoraho babuvanye mu rugo rwa Obededomu.

²⁶Imana yari kumwe n’abalevi bari bahetse Ubushyinguro bw’Isezerano ry’Uhoraho, nuko batura ibitambo by’amapfizi arindwi n’amasekurume y’ihene arindwi.

²⁷Dawudi yari yambaye igishura cy’ihariri, kimwe n’abalevi bose bari bahetse Ubushyinguro, n’abaririmbyi, na Kenaniya wayoboraga abahetsi b’Ubushyinguro. Dawudi yari akenyeye agatambaro kaboshye muri hariri.

²⁸Nuko Abayisraheli bose bazamura Ubushyinguro bw’Isezerano ry’Uhoraho bakoma mu mashyi, kandi bavuza amahembe, amakondera n’ibyuma birangira, kandi bacuranga inanga zirangira.

²⁹Nuko Ubushyinguro bw’Isezerano ry’Uhoraho butaha mu Murwa wa Dawudi. Mikali, umukobwa wa Sawuli, arebera mu idirishya, abona umwami Dawudi wasimbukaga, yiyereka imbere y’Uhoraho, maze amugayira mu mutima.