Read kinyarwanda Icya mbere cy'Amateka 16 Bible Online

Icya mbere cy'Amateka 16 - kinyarwanda bible

Icya mbere cy'Amateka 16

¹Binjiza Ubushyinguro bw’Imana maze babushyira aho bwateguriwe hagati mu ihema Dawudi yari yarabwubakiye, hanyuma batura ibitambo bitwikwa n’iby’ubuhoro imbere y’Imana.

²Dawudi amaze gutura ibitambo bitwikwa n’iby’ubuhoro, aha umugisha rubanda mu izina ry’Uhoraho.

³Hanyuma agaburira Abayisraheli bose, abagabo n’abagore; buri wese amuha akagati, umurwi w’inyama n’iseri ry’umuzabibu.

⁴Dawudi ashyiraho bamwe mu balevi imbere y’Ubushyinguro kugira ngo bajye bibutsa ibigwi by’Uhoraho, Imana ya Israheli, bamusingize banamurate.

⁵Abo ni aba: Asafu w’umutware, Zekariya, umufasha we; hagakurikiraho Uziyeli, Shemiramoti, Yehiyeli, Matatiya, Eliyabu, Benayahu, Obededomu na Yehiyeli. Bari bafite inanga ntoya n’inini, naho Asafu yacurangaga ibyuma birangira.

⁶Abaherezabitambo Benayahu na Yahaziyeli ntibahwemaga kuvugiriza amakondera imbere y’Ubushyinguro bw’Imana.

⁷Ni uwo munsi Dawudi yategetse bwa mbere Asafu n’abavandimwe be gusingiza Uhoraho, muri aya magambo[14]:

⁸Nimusingize Uhoraho, mwamamaze izina rye, mumenyeshe amahanga ibigwi bye!

⁹Nimumuririmbire, mumukinire; mwongere muvuge ibitangaza bye byose!

¹⁰Mwishimire izina rye ritagatifu, kandi umutima w’abashakashaka Uhoraho unezerwe!

¹¹Nimushakashake Uhoraho Nyir’ububasha, mushake uruhanga rwe ubudahwema!

¹²Mwiyibutse ibintu by’agatangaza yakoze, ibitangaza bye n’amateka amuva mu kanwa,

¹³mwebwe, bwoko bwa Israheli umugaragu we, mwebwe, bene Yakobo intore ze!

¹⁴Ni we Uhoraho Imana yacu, utegeka isi yose!

¹⁵Nimwiyibutse iteka isezerano rye, itegeko yatanze mu bisekuruza igihumbi,

¹⁶isezerano yagiranye na Abrahamu, rigakomezwa n’indahiro ya Izaki,

¹⁷akarigira ihame kuri Yakobo, isezerano rihoraho ku Bayisraheli,

¹⁸igihe avuze ati «Nguhaye ubutaka bwa Kanahani; ni wo munani ugabanye!»

¹⁹Icyo gihe bashoboraga kubarwa, bari icigata ry’abantu binjiye mu gihugu,

²⁰bazereraga mu bihugu no mu mahanga, bakava hamwe bajya ahandi,

²¹ariko Uhoraho ntiyaretse hagira umuntu ubarenganya, ahana abami kubera bo, ati

²²«Ntimugakore ku ntore zanjye, abahanuzi banjye ntimukabagirire nabi!»

²³Isi yose, nimuririmbire Uhoraho! Mwamamaze ugukiza kwe uko bukeye,

²⁴mumenyeshe abanyamahanga icyubahiro cye, mwogeze ibitangaza bye mu mahanga yose!

²⁵Kuko Uhoraho akomeye kandi akwiye gusingizwa, akaba ateye ubwoba kandi akaruta imana zose.

²⁶Imana zose z’abanyamahanga ni ubusa, Uhoraho ni we waremye ijuru!

²⁷Icyubahiro n’igitinyiro biri mu ruhanga rwe; imbaraga n’ubutungane bikaba iwe.

²⁸Miryango y’amahanga, nimuhe Uhoraho, nimumuhe icyubahiro n’imbaraga,

²⁹izina rye murihe icyubahiro. Muzane amaturo yanyu, muze imbere ye; mwunamire Uhoraho, mu Ngoro ye ntagatifu!

³⁰Namwe, isi yose nimuhinde umushyitsi imbere ye! Koko yaremye isi, nta cyayinyeganyeza.

³¹Ijuru nirinezerwe, isi yishime, mu mahanga nibavuge bati «Uhoraho ni Umwami!»

³²Inyanja n’ibiyirimo byose nibyorome, iby’imusozi byose nibyishime;

³³ibiti byose by’amashyamba nibisabagizwe n’umunezero, imbere y’Uhoraho, kuko aje gutegeka isi!

³⁴Nimuhimbaze Uhoraho kuko ari umugwaneza, n’ubudahemuka bwe bugahoraho iteka ryose!

³⁵Nimugire muti «Dukize, Mana y’umukiro wacu, dukoranye udukure hagati y’amahanga, kugira ngo duhimbaze izina ryawe ritagatifu, twishimire kugusingiza.»

³⁶Nihasingizwe Uhoraho, Imana ya Israheli, iteka ryose ubuziraherezo! Nuko abantu bose baravuga bati «Amen! Alleluya!»

³⁷Dawudi asiga aho, imbere y’Ubushyinguro bw’Isezerano ry’Uhoraho, Asafu n’abavandimwe be bagombaga guhora bakorera imbere y’Ubushyinguro nk’uko byari itegeko rya buri munsi;

³⁸ahasiga na Obededomu hamwe n’abavandimwe be mirongo itandatu n’umunani. Obededomu mwene Yedutuni na Hosa ni bo bari abanyanzugi.

³⁹Dawudi asiga umuherezabitambo Sadoki hamwe n’abandi bavandimwe be b’abaherezabitambo imbere y’ihema ry’Uhoraho, mu isengero ry’ahirengeye i Gibewoni[15],

⁴⁰kugira ngo mu gitondo na nimugoroba bajye batura ubutitsa Uhoraho ibitambo bitwikwa ku rutambiro rubigenewe, no kugira ngo bajye batunganya ibyanditswe mu itegeko Uhoraho yahaye Abayisraheli.

⁴¹Hamwe na bo hari Hemani na Yedutuni n’abasigaye mu bari batoranyijwe kandi bakavugwa mu mazina yabo ngo bahimbaze Uhoraho: «Kuko ubudahemuka bwe ari ubw’iteka ryose».

⁴²Kandi, Hemani na Yedutuni bari kumwe na bo bafite amakondera n’ibyuma birangira n’ibyuma biherekeza indirimbo z’Imana. Bene Yedutuni bari bashinzwe irembo.

⁴³Abantu bose bataha buri wese iwe, na Dawudi asubira iwe gusabira urugo rwe umugisha.