Read kinyarwanda Icya mbere cy'Amateka 27 Bible Online

Icya mbere cy'Amateka 27 - kinyarwanda bible

Icya mbere cy'Amateka 27

¹Dore intondeke y’Abayisraheli bakoreraga umwami mu kintu icyo ari cyo cyose cyerekeye imitwe y’ingabo; bari abatware b’amazu bategekaga ingabo igihumbi cyangwa ijana, hamwe n’abanditsi babo. Koko imitwe y’ingabo yarakurikiranaga mu mwaka, buri kwezi umutwe umwe ukaza, undi ugataha, kandi buri mutwe warimo abagabo ibihumbi makumyabiri na bine.

²Umutware w’umutwe w’ingabo wa mbere wo mu kwezi kwa mbere yari Yashobeyamu mwene Zabudiyeli, kandi umutwe w’ingabo ze wabaraga abagabo ibihumbi makumyabiri na bine.

³Yari uwo muri bene Pereshi kandi agategeka abagaba bose b’ingabo zo mu kwezi kwa mbere.

⁴Umutware w’ingabo w’umutwe wa kabiri wo mu kwezi kwa kabiri ni Dodayi w’i Aho; umutwe w’ingabo ze warimo abagabo ibihumbi makumyabiri na bine.

⁵Umutware w’umutwe wa gatatu w’ingabo zo mu kwezi kwa gatatu yari Benayahu, umuhungu w’umuherezabitambo mukuru Yehoyada; umutwe w’ingabo ze warimo abagabo ibihumbi makumyabiri na bine.

⁶Uwo Benayahu yari umugabo w’intwari wo muri Ba Mirongo itatu b’imena, kandi akaba umutware wabo. Umuhungu we Amizabadi na we yari mu mutwe w’ingabo ze.

⁷Umutware wa kane wo mu kwezi kwa kane yari Asaheli murumuna wa Yowabu, yazunguwe n’umuhungu we Zebadiya. Umutwe w’ingabo ze warimo abagabo ibihumbi makumyabiri na bine.

⁸Umutware wa gatanu wo mu kwezi kwa gatanu yari Shamuhuti w’i Yizurahi; umutwe w’ingabo ze warimo abagabo ibihumbi makumyabiri na bine.

⁹Umutware wa gatandatu wo mu kwezi kwa gatandatu yari Ira mwene Ikeshi w’i Tekowa; umutwe w’ingabo ze warimo abagabo ibihumbi makumyabiri na bine.

¹⁰Umutware wa karindwi wo mu kwezi kwa karindwi yari Heleshi w’i Peloni, muri bene Efurayimu; umutwe w’ingabo ze warimo abagabo ibihumbi makumyabiri na bine.

¹¹Umutware wa munani wo mu kwezi kwa munani yari Sibekayi w’i Husha, muri bene Zarihi; umutwe w’ingabo ze warimo abagabo ibihumbi makumyabiri na bine.

¹²Umutware wa cyenda, wo mu kwezi kwa cyenda, yari Abiyezeri w’i Anatoti, muri bene Benyamini; umutwe w’ingabo ze warimo abagabo ibihumbi makumyabiri na bine.

¹³Umutware wa cumi wo mu kwezi kwa cumi yari Mahurayi w’i Netofa, muri bene Zerahi; umutwe w’ingabo ze warimo abagabo ibihumbi makumyabiri na bine.

¹⁴Umutware wa cumi n’umwe wo mu kwezi kwa cumi na kumwe yari Benaya w’i Pereyatoni, muri bene Efurayimu; umutwe w’ingabo ze warimo abagabo ibihumbi makumyabiri na bine.

¹⁵Umutware wa cumi na kabiri wo mu kwezi kwa cumi na kabiri yari Helidayi w’i Netofa, muri bene Otiniyeli; umutwe w’ingabo ze warimo abagabo ibihumbi makumyabiri na bine.

¹⁶Mu miryango y’Abayisraheli, umutegeka w’abo kwa Rubeni ni Eliyezeri mwene Zikuri; uw’abo kwa Simewoni ni Shefatiyahu mwene Mayaka;

¹⁷uw’Abalevi ni Hashabiya mwene Kemuweli; uw’abo kwa Aroni ni Sadoki;

¹⁸uw’abo kwa Yuda ni Elihu wo mu bavandimwe ba Dawudi; uw’abo kwa Isakari ni Omari mwene Mikayeli;

¹⁹uw’abo kwa Zabuloni ni Yishimayahu mwene Obadiyahu; uw’abo kwa Nefutali ni Yerimoti mwene Aziriyeli;

²⁰uw’abo kwa Efurayimu ni Hosheya mwene Azariyahu; uw’ab’igice kimwe cy’umuryango wa Manase ni Yoweli mwene Pedayahu;

²¹uw’ab’ikindi gice cy’umuryango wa Manase bo muri Gilihadi ni Ido mwene Zekariyahu; uw’abo kwa Benyamini ni Yasiyeli mwene Abuneri;

²²uw’abo kwa Dani ni Azareli mwene Yerohamu. Abo ni bo bari abatware b’imiryango y’Abayisraheli.

²³Dawudi ntiyabaruye abatararenza imyaka makumyabiri y’ubuvuke, kuko Uhoraho yari yaravuze ko azagwiza Abayisraheli akabanganya n’inyenyeri zo mu kirere.

²⁴Yowabu mwene Seruya yari yatangiye kubabarura ariko ntiyarangiza, kuko uburakari bw’Uhoraho bwari bwageze ku Bayisraheli; nuko umubare wabo ntiwandikwa mu gitabo cy’Amateka y’umwami Dawudi.

²⁵Azimaweti mwene Adiyeli yari ashinzwe umutungo w’umwami. Yehonatani mwene Uziyahu ni we wacungaga ibibitswe mu mirima, mu migi, mu byaro no mu minara.

²⁶Eziri mwene Kelubi yari ashinzwe abahinzi bo mu mirima.

²⁷Shimeyi w’i Rama yari ashinzwe imizabibu. Zabudi w’i Shefamu yategekaga abengaga divayi mu mizabibu bakanayishyingura.

²⁸Behalihanani w’i Gederi yari ashinzwe ibiti by’imizeti n’iby’imitini byari mu kibaya. Yowashi yari ashinzwe ububiko bw’amavuta.

²⁹Shiturayi w’i Saroni yari ashinzwe amatungo maremare yarishaga mu mibande.

³⁰Obili wo muri bene Ismaheli yari ashinzwe ingamiya. Yedeyahu w’i Meranoti yari ashinzwe indogobe z’ingore.

³¹Yazizi muri bene Haguri yari ashinzwe amatungo magufi. Abo bose bacungaga ibintu by’umwami Dawudi.

³²Yehonatani, se wabo wa Dawudi, yari umujyanama, akaba n’umwanditsi uciye akenge. Yehiyeli mwene Hakumoni yitaga ku bana b’umwami.

³³Ahitofeli yari umujyanama w’umwami, naho Hushayi w’Umwaruki yari incuti y’umwami.

³⁴Ahitofeli yazunguwe na Yehoyada, mwene Benayahu, na Abiyatari. Umugaba w’ingabo zose z’umwami yari Yowabu.