Read kinyarwanda Icya mbere cy'Amateka 28 Bible Online

Icya mbere cy'Amateka 28 - kinyarwanda bible

Icya mbere cy'Amateka 28

¹[20] Umwami Dawudi akoranyiriza i Yeruzalemu abatware b’Abayisraheli bose, ab’imiryango n’ab’imitwe y’ingabo zakoreraga umwami, hamwe n’abategekaga igihumbi n’abategekaga ijana, n’abashinzwe ibintu byose n’amatungo yose by’umwami n’iby’abahungu be, akoranya n’abakone, ingabo ze z’imena, n’izindi ntwari zose.

²Umwami Dawudi arahaguruka maze arababwira ati «Nimunyumve, bavandimwe kandi muryango wanjye. Nari mfite ku mutima igitekerezo cyo kubaka Ingoro y’Ubushyinguro bw’Isezerano ry’Uhoraho, bwo ntebe y’ibirenge by’Imana yacu, ndetse nteganya ibya ngombwa.

³Ariko Imana yarambwiye iti ’Ntuzubaka Ingoro ikwiye izina ryanjye kuko uri umurwanyi kandi ukaba waravushije amaraso.’

⁴Uhoraho, Imana ya Israheli, yantoranyije mu muryango wanjye wose ngo mbe umwami w’Abayisraheli ubuziraherezo. Koko yatoye Yuda ho umutware kandi mu muryango wa Yuda atoranyamo inzu ya data, no mu bana ba data, aba ari jye yishimira kugira umwami w’Abayisraheli.

⁵Mu bahungu banjye bose, — kuko Uhoraho yampaye abahungu benshi — yatoranyije umuhungu wanjye Salomoni ngo yicare ku ntebe y’ubwami muri Israheli.

⁶Hanyuma arambwira ati ’Umuhungu wawe Salomoni ni we uzubaka Ingoro yanjye n’ingo zanjye, kuko namutoranyije ngo ambere umwana nanjye mubere umubyeyi.

⁷Nzakomeza ubwami bwe ubuziraherezo ariko niba na we akomeje gukurikiza amategeko yanjye n’amateka yanjye nk’uko ubu abigenza.’

⁸None rero, imbere y’Abayisraheli bose baduhanze amaso, imbere y’ikoraniro ryose ry’Uhoraho, n’imbere y’Imana yacu iduteze amatwi, ndabihanangirije: nimwubahirize amategeko yose y’Uhoraho Imana yacu, muyazirikane, kugira ngo mutunge iki gihugu cyiza kandi muzakirage abana banyu, bazagitunge ubuziraherezo.

⁹Nawe, mwana wanjye Salomoni, menya Imana ya so, uyikorere n’umutima utaryarya kandi utunganye kuko Uhoraho agenzura imitima yose, akamenya ibitekerezo biyirimo. Numushakashaka azakwiyereka, ariko numwirengagizaazakujugunya bidasubirwaho.

¹⁰Ubu ngubu bimenye: Uhoraho yaragutoranyije kugira ngo umwubakire Ingoro, komera maze ukore!»

¹¹[21] Dawudi asobanurira umuhungu we Salomoni uburyo azubaka urwinjiriro rw’Ingoro, amazu yayo, ububiko bwayo, ibyumba byayo byo hejuru, ibyumba byayo by’imbere n’icyumba cy’urwicurizo.

¹²Anamwereka igishushanyo cy’ibikari by’Ingoro y’Imana, n’icy’amazu yose azayikikiza, n’icy’amazu bazabikamo umutungo w’Ingoro y’Imana n’ibintu byose byayeguriwe.

¹³Amusobanurira kandi ibyerekeye imitwe y’abaherezabitambo n’iy’abalevi, n’ibyerekeye ibizakorerwa mu Ngoro y’Uhoraho.

¹⁴Amubwira n’uburemere bwa zahabu na feza bizagenerwa buri gikoresho cyo mu Ngoro.

¹⁵Amusobanurira uburemere bwa zahabu n’ubwa feza bizagenerwa ibitereko n’amatara bya zahabu n’ibya feza,

¹⁶n’uburemere bwa zahabu na feza bizagenerwa ameza y’umumuriko,

¹⁷n’uburemere bwa zahabu na feza bizagenerwa amakanya, ibikombe, amabesani ya zahabu n’aya feza, amasahani ya zahabu n’aya feza,

¹⁸n’uburemere bwa zahabu iyunguruye izagenerwa urutambiro rw’imibavu. Hanyuma amuha n’igishushanyo cy’Igare, n’icy’abakerubimu ba zahabu bazaramburira amababa yabo hejuru y’Ubushyinguro bw’Isezerano ry’Uhoraho.

¹⁹Nuko Dawudi abwira Salomoni, ati «Ibyo byose biri mu nyandiko Uhoraho yangejejeho, ansobanurira uburyo iyo mirimo yose izakorwa.»

²⁰Nuko Dawudi yongera kubwira umuhungu we Salomoni, ati «Komera, ube intwari, maze ukore! Ntugire ubwoba kandi ntukuke umutima, kuko Uhoraho Imana yanjye ari kumwe nawe. Ntazagusiga kandi ntazagutererana kugeza igihe uzarangiriza ibikorwa byose byo ku Ngoro y’Uhoraho.

²¹Dore imitwe y’abaherezabitambo n’iy’abalevi bashinzwe umurimo w’Ingoro, kandi muri ibyo bikorwa byose uzaba uri kumwe n’abantu b’abanyamwete kandi b’abahanga muri buri murimo, ndetse abatware na rubanda rwose bazumvira amategeko yawe.»