Read kinyarwanda Icya kabiri cy'Amateka 23 Bible Online

Icya kabiri cy'Amateka 23 - kinyarwanda bible

Icya kabiri cy'Amateka 23

¹Mu mwaka wa karindwi, Yehoyada yiyemeza gukoranya abatware b’abasirikare, ari bo Azariyahu mwene Yerohamu, Yishumaheli mwene Yehohanani, Azariyahu mwene Obedi, Maseyahu mwene Adayahu, na Elishafati mwene Zikuri, kugira ngo bagirane isezerano.

²Bazenguruka igihugu cya Yuda kandi bakoranya abalevi bo mu migi yose ya Yuda, hamwe n’abatware b’amazu y’Abayisraheli, hanyuma basubirana na bo i Yeruzalemu.

³Ikoraniro ryose rigirana isezerano n’umwami mu Ngoro y’Imana. Nuko Yehoyada arababwira ati «Nguyu umwana w’umwami! Agomba kwima ingoma nk’uko Uhoraho yabivuze ku byerekeye bene Dawudi.

⁴Dore ibyo mugiye gukora: kimwe cya gatatu cyanyu, abaherezabitambo n’abalevi mushinzwe imirimo yo ku isabato, muzacunga amarembo;

⁵ikindi kimwe cya gatatu kizarinda ingoro y’umwami, n’icya gatatu gisigaye kizabe ku irembo ry’urufatiro; naho rubanda rwose, bo bazaba mu bikari by’Ingoro y’Uhoraho.

⁶Ntihazagire umuntu winjira mu Ngoro y’Uhoraho uretse abaherezabitambo n’abalevi bari ku kazi; bo bazashobora kuyinjiramo kuko batagatifujwe; naho abandi bose bazubahiriza itegeko ry’Uhoraho ribibabuza.

⁷Abalevi bazakikiza umwami, buri wese afite intwaro mu ntoki; uzashaka kwinjira mu Ngoro y’Uhoraho muzamwice. Muzahore mushagaye umwami aho agiye hose.»

⁸Abalevi n’Abayuda bose bubahiriza ibyo bategetswe n’umuherezabitambo Yehoyada byose. Buri wese afata abantu be, ari abashinzwe imirimo yo ku isabato, ari n’abayivaho, kuko umuherezabitambo Yehoyada nta cyiciro yari yarasezereye.

⁹Hanyuma Yehoyada aha abatware b’abasirikare amacumu n’ingabo nini n’intoya umwami Dawudi yari yarabitse mu Ngoro y’Imana.

¹⁰Ashyiraho abantu bose bo gukikiza umwami, buri wese afite intwaro mu ntoki, kuva mu ruhande rw’iburyo rw’Ingoro y’Uhoraho kugera ku urw’ibumoso, imbere y’urutambiro n’imbere y’Ingoro, kugira ngo baze gukikiza umwami.

¹¹Nuko basohora umwana w’umwami, bamwambika ikamba ry’ubwami n’ibindi biburanga maze baramwimika. Yehoyada n’abahungu be bamusiga amavuta biyamirira, bavuga bati «Umwami aragahoraho!»

¹²Ataliya yumvise urusaku rw’abantu birukaga kandi basingiza umwami, agenda abasanga aho bari mu Ngoro y’Uhoraho.

¹³Aritegereza, abona umwami ahagaze hafi y’inkingi yo ku rwinjiriro; abona abatware n’abavuza amakondera bari iruhande rw’umwami, ndetse n’abantu bose bishimye kandi bavuza amakondera, naho abaririmbyi bacuranga ibyuma byabo kandi bayobora indirimbo zo gushimira. Nuko Ataliya ashishimura imyambaro ye asakuza, ati «Ubugambanyi! Ubugambanyi!»

¹⁴Umuherezabitambo Yehoyada ategeka abatware b’abasirikare bafite intwaro, agira ati «Nimumusohore mumucishe hagati muri rubanda! Kandi nihagira umukurikira yicishwe inkota!» Koko rero, umuherezabitambo yari yaravuze ati «Ntimumwicire mu Ngoro y’Uhoraho.»

¹⁵Bafata Ataliya, bamunyuza mu irembo amafarasi yanyuragamo, bamugejeje ku ngoro y’umwami, bamutsinda aho.

¹⁶Yehoyada yifatanyije n’umwami n’umuryango wose, agirana isezerano n’Uhoraho kugira ngo umuryango uzabe uw’Uhoraho.

¹⁷Nuko imbaga yose y’abantu ijya ku ngoro ya Behali, barayisenya, bamenagura intambiro ze n’amashusho ye, na Mataniya, umuherezabitambo wa Behali, bamwicira imbere y’intambiro.

¹⁸Hanyuma Ingoro y’Uhoraho, Yehoyada ayirindisha abaherezabitambo n’abalevi. Koko kandi, ni bo Dawudi yari yarashinze gutunganya imirimo yo mu Ngoro y’Uhoraho kugira ngo bajye bahaturira ibitambo bitwikwa bishimye, kandi baharirimbire bakurikije ibyanditswe mu mategeko ya Musa, n’ibyo Dawudi yababwirije.

¹⁹Yehoyada ashyira abarinzi ku marembo y’Ingoro y’Uhoraho kugira ngo hatazagira uyinjiramo atisukuye.

²⁰Afata abatware b’abasirikare, abanyacyubahiro n’abategekaga rubanda, n’abaturage bose, nuko bavana umwami mu Ngoro y’Uhoraho, binjira mu ngoro y’umwami banyuze mu irembo rikuru, maze bamwicaza ku ntebe y’ubwami.

²¹Abantu bose baranezerwa kandi umurwa uguma mu ituze. Ataliya we bari bamwicishije inkota.