Read kinyarwanda Icya kabiri cy'Amateka 24 Bible Online

Icya kabiri cy'Amateka 24 - kinyarwanda bible

Icya kabiri cy'Amateka 24

¹Yowasi yimitswe amaze imyaka irindwi avutse, kandi amara imyaka mirongo ine ari ku ngoma i Yeruzalemu. Nyina yitwaga Sibiya w’i Berisheba.

²Yowasi akora ibitunganiye Uhoraho mu gihe cyose umuherezabitambo Yehoyada yari akiriho.

³Yehoyada ashyingira Yowasi abagore babiri, babyarana abahungu n’abakobwa.

⁴Nyuma y’ibyo Yowasi ashaka gusana Ingoro y’Uhoraho.

⁵Akoranya abaherezabitambo n’abalevi, arababwira ati «Mujye mu migi yose yo muri Yuda, mwake Abayisraheli bose feza yo kuzajya musana Ingoro y’Imana yanyu uko umwaka utashye, kandi muzabigire vuba!» Ariko abalevi ntibabigira vuba.

⁶Umwami atumira umuherezabitambo Yehoyada, aramubaza ati «Kuki utategetse abalevi ngo bake Abayuda n’abaturage b’i Yeruzalemu umusoro ugenewe Ihema ry’ibonaniro, Musa, umugaragu w’Imana, n’ikoraniro ry’Abayisraheli bari bariyemeje gutanga?

⁷Kuko Ataliya, wa mugome, n’abahungu be bangije Ingoro y’Imana, ndetse n’ibintu byose byeguriwe Ingoro y’Uhoraho bakabitura Behali.»

⁸Umwami ategeka ko babaza isanduku bakayishyira imbere y’irembo ry’Ingoro y’Uhoraho.

⁹Nuko bagatangaza muri Yuda n’i Yeruzalemu ko bagomba kuzanira Uhoraho umusoro Musa, umugaragu w’Imana, yategetse Abayisraheli bari mu butayu.

¹⁰Abatware n’abantu bose barishima, bazana feza bayishyira mu isanduku kugeza ubwo bayuzuza.

¹¹Iyo igihe cyabaga kigeze, iyo sanduku abalevi barayizanaga bakayishyikiriza abagenzuzi b’umwami. Naho bo, iyo basangaga irimo feza nyinshi, umwanditsi w’umwami n’umufasha w’umuherezabitambo mukuru barazaga; feza yose bakayimaramo, hanyuma ya sanduku bakayijyana bakayisubiza mu mwanya wayo. Babigenzaga batyo buri munsi, nuko babona feza nyinshi.

¹²Umwami na Yehoyada baziha abakoreshaga imirimo yo ku Ngoro y’Uhoraho, kimwe n’abacuraga ibyuma n’imiringa bagira ngo basane Ingoro y’Uhoraho.

¹³Abo bakozi barakora, umurimo urabatunganira; nuko Ingoro y’Imana isubira uko yari imeze, barayikomeza.

¹⁴Barangije bazanira umwami na Yehoyada feza zari zisigaye, nuko baziguramo ibikoresho bigenewe Ingoro y’Uhoraho, ari na byo bifashishaga mu gutura ibitambo bitwikwa, banaziguramo inzabya n’ibindi bikozwe muri zahabu na feza. Nuko bakajya baturira ibitambo bitwikwa mu Ngoro y’Uhoraho ubutitsa, mu gihe cyose Yehoyada yari akiriho.

¹⁵[18] Yehoyada arasaza, agera mu zabukuru, hanyuma arapfa; yapfuye amaze imyaka ijana na mirongo itatu avutse.

¹⁶Bamushyingura mu Murwa wa Dawudi hamwe n’abami, kuko yari yarakoreye neza Abayisraheli, akubaha Imana n’Ingoro y’Uhoraho.

¹⁷Nyuma y’urupfu rwa Yehoyada, abatware b’Abayuda baraza baramya umwami, na we arabumva.

¹⁸Batererana Ingoro y’Uhoraho, Imana y’abasekuruza babo, maze baramya inkingi zeguriwe ibigirwamana n’amashusho yabyo. Icyo gicumuro gituma Uhoraho arakarira Abayuda na Yeruzalemu.

¹⁹Aboherereza abahanuzi ngo babumvishe ko bakwiye kugarukira Uhoraho, ariko babima amatwi.

²⁰Nuko umwuka w’Imana uza kuri Zekariya mwene Yehoyada, umuherezabitambo Zekariya ahagarara imbere ya rubanda, arababwira ati «Imana iravuze ngo: Ni iki cyatumye muca ku mategeko y’Uhoraho kandi mubona nta cyo bibagezaho? Kubera ko mwirengagije Uhoraho, na we arabatereranye!»

²¹Uwo muhanuzi baramugambanira, bamuterera amabuye ku muharuro w’Ingoro y’Uhoraho, babitegetswe n’umwami.

²²Umwami Yowasi yirengagiza atyo ineza Yehoyada yamugiriye, maze yica umuhungu[19] we! Mu isamba rye, Zekariya aravuga ati «Uhoraho nabirebe kandi azabikuryoze!»

²³Umwaka utashye, ingabo z’Abaramu zizamuka gutera Yowasi. Nuko zigera muri Yuda n’i Yeruzalemu, zica abatware bose ba rubanda, maze zoherereza umwami w’i Damasi iminyago yose.

²⁴N’ubwo ingabo z’Abaramu zari nke, Uhoraho azigabiza abazirushaga ubwinshi kuko bari baratereranye Uhoraho, Imana y’abasekuruza babo. Naho Yowasi, ingabo z’Abaramu zimugirira nkana,

²⁵zimusiga ameze nabi cyane. Abagaragu be baramugambanira kubera amaraso y’umuhungu w’umuherezabitambo Yehoyada yavushije, maze bamwicira ku buriri bwe. Amaze gutanga, umurambo we bawushyingura mu Murwa wa Dawudi ariko atari mu mva z’abami.

²⁶Abamugambaniye ni aba: ni Zabadi mwene Shimeyati w’Umuhamoni, na Yehozabadi mwene Shimirita w’Umumowabukazi.

²⁷Abana be, ibyo abahanuzi benshi bamwihanangirijeho, ibyerekeye isanwa ry’Ingoro y’Uhoraho, ibyo byose byanditswe mu gitabo cy’Ibyakozwe n’Abami. Nuko Umuhungu we Amasiya amuzungura ku ngoma.