Read kinyarwanda Icya kabiri cy'Amateka 28 Bible Online

Icya kabiri cy'Amateka 28 - kinyarwanda bible

Icya kabiri cy'Amateka 28

¹Akhazi yimitswe amaze imyaka makumyabiri avutse, amara imyaka cumi n’itandatu ari ku ngoma i Yeruzalemu. Ntiyakoze ibitunganiye Uhoraho nk’uko sekuruza Dawudi yabikoze.

²Ahubwo yakurikije inzira mbi z’abami ba Israheli, ndetse acurisha amashusho yo kubahiriza za Behali.

³We ubwe yatwikiye imibavu mu kibaya cya Bene‐Hinomi kandi atwika n’abahungu be ho igitambo akurikije amahano y’abanyamahanga Uhoraho yari yarirukanye imbere y’Abayisraheli.

⁴Aturira ibitambo kandi atwikira imibavu mu masengero y’ahirengeye, ku misozi, no mu nsi y’igiti cyose kibisi.

⁵Uhoraho, Imana ye, amugabiza umwami w’Abaramu, baramunesha, bamunyaga abantu benshi babajyana ari imbohe i Damasi. Agabizwa kandi umwami wa Israheli, na we aramutsinda bikomeye.

⁶Peka, mwene Remaliyahu, yica mu munsi umwe Abayuda ibihumbi makumyabiri b’intwari ku rugamba, kuko bari bataye Uhoraho, Imana y’abasekuruza babo.

⁷Zikuri, umugabo w’imbaraga wo muri bene Efurayimu, yica Maseyahu umwana w’umwami, na Azurikamu, umunyarugo we, na Elikana, wari wungirije umwami.

⁸Abayisraheli banyaga mu bavandimwe babo abantu ibihumbi magana abiri, barimo abagore, abahungu n’abakobwa, babanyaga n’ibindi byinshi babijyana i Samariya.

⁹Aho hari umuhanuzi w’Uhoraho witwaga Odedi. Nuko arasohoka asanganira ingabo zari zigeze i Samariya, araziburira ati «Dore Uhoraho, Imana y’abasokuruza banyu, yarakariye Abayuda bituma ababagabiza, kandi mwabishemo benshi, murabarakarira cyane, bigera mu ijuru!

¹⁰None ubu murashaka ko abo Bayuda n’ab’i Yeruzalemu bababera abagaragu n’abaja! Ntimwiyumvira se ko ubu ari mwebwe mucumura kuri Uhoraho, Imana yanyu?

¹¹Nimunyumvire nonaha, murekure imfungwa mwafashe mu bavandimwe banyu, kuko Uhoraho abarakariye birushijeho.»

¹²Mu batware b’Abefurayimu hahaguruka abantu bamwe, ari bo Azariyahu mwene Yehohanani, Berekiyahu mwene Meshilemoti, Yehizikiyahu mwene Shalumi na Amasa mwene Hadulayi, nuko batangira gutonganya abari bavuye mu ntambara,

¹³barababwira bati «Izo mfungwa ntimuzizane hano, kuko twaba ducumuye kuri Uhoraho! Murashaka se kongera ibyaha byacu n’amakosa yacu, kandi twarakoze ibitabarika bigatuma Uhoraho arakarira Israheli bikomeye?»

¹⁴Ingabo zirekura imfungwa, ndetse n’ibyo zanyaze zibirekera aho imbere y’abatware n’ikoraniro ryose.

¹⁵Hanyuma bashyiraho abantu bamwe kugira ngo bite ku mfungwa: bafata ku minyago; abari bambaye ubusa babaha imyambaro, n’inkweto, bose barabagaburira, babaha icyo banywa n’imiti ibavura, hanyuma baheka ku ndogobe abanyantege nke, barabajyana babageza kwa bene wabo i Yeriko, umugi w’imikindo. Hanyuma basubira i Samariya.

¹⁶Muri icyo gihe umwami Akhazi atuma ku mwami w’Abanyashuru ngo amutabare.

¹⁷Koko rero Abanyedomu bari bongeye gutera Yuda, barabanesha babajyana ari imfungwa.

¹⁸Abafilisiti na bo bari bateye imigi yo mu Kibaya n’iy’i Negevu ya Yuda; bayifatamo Betishemeshi, Ayaloni, Gederoti, Soko n’insisiro zayo, Timuna n’insisiro zayo, Gimuzo n’insisiro zayo, maze barahatura.

¹⁹Koko rero Uhoraho yacishije bugufi Abayuda kubera Akhazi, umwami wabo wabateraga gusuzugura Uhoraho, na we ubwe akamucumurira.

²⁰Tegalati‐Falazari, umwami w’Abanyashuru, araza ariko atazanywe no gutabara Akhazi, ahubwo agira ngo amutere.

²¹Nuko Akhazi afata ku mutungo w’Ingoro y’Uhoraho, n’uwo mu ngoro y’umwami, n’uw’ibikomangoma, abyoherereza umwami w’Abanyashuru, ariko biba imfabusa.

²²Umwami Akhazi, amaze gushoberwa, arushaho gucumura kuri Uhoraho:

²³atura ibitambo imana z’i Damasi zari zaramunesheje, avuga ati «Kubera ko imana z’abami ba Aramu zibafashije, ni zo ngiye gutura ibitambo kugira ngo zimfashe.» Mu by’ukuri, ni zo zatumye arimburwa, we, na Israheli yose.

²⁴Akhazi akoranya ibikoresho byari mu Ngoro y’Uhoraho, arabimenagura, akinga inzugi z’Ingoro y’Uhoraho, kandi yiyubakira intambiro muri Yeruzalemu yose.

²⁵Muri buri mugi wa Yuda yubakamo amasengero y’ahirengeye yo gutwikira imibavu imana z’amahanga, nuko arakaza Uhoraho, Imana y’abasekuruza be.

²⁶Ibindi bikorwa bye n’imigirire ye yose, guhera ku byabanje kugera ku byaherutse, byanditswe mu gitabo cy’Abami ba Yuda na Israheli.

²⁷Akhazi aratanga, asanga abasekuruza be; umurambo we bawushyingura mu Murwa, i Yeruzalemu, ariko ntibawushyira mu mva z’abami ba Israheli. Umuhungu we Hezekiya amuzungura ku ngoma.