Read kinyarwanda Icya kabiri cy'Amateka 33 Bible Online

Icya kabiri cy'Amateka 33 - kinyarwanda bible

Icya kabiri cy'Amateka 33

¹Manase yimye ingoma amaze imyaka cumi n’ibiri avutse, amara imyaka mirongo itanu n’itanu ari ku ngoma i Yeruzalemu.

²Yakoze ibidatunganiye Uhoraho, akurikiza ibiterasoni by’abanyamahanga Uhoraho yari yarirukanye imbere y’Abayisraheli.

³Yongeye kubaka amasengero y’ahirengeye yari yarashenywe na se Hezekiya; yubaka intambiro za Behali, ashinga inkingi zeguriwe ikigirwamana Ashera, aramya izuba, ukwezi n’inyenyeri byo mu kirere arabikorera.

⁴Yubaka intambiro mu Ngoro y’Uhoraho, kandi Uhoraho yaravuze, ati «I Yeruzalemu ni ho nzashyira izina ryanjye.»

⁵Ibinyarumuri byo mu kirere Manase abyubakira intambiro mu bikari byombi by’Ingoro y’Uhoraho.

⁶Ndetse n’abahungu be abatwikira mu kabande ka bene Hinomi; akoresha uburyo bwinshi bwo gutongera no gushika; ashyiraho abashitsi n’abapfumu; mbese arakaza Uhoraho, arakabya mu gukora ibitamutunganiye.

⁷Ashyira mu Ngoro y’Uhoraho ishusho ry’ikigirwamana yari yarakoresheje; kandi Imana yari yabwiye Dawudi n’umuhungu we Salomoni, iti «Muri iyi Ngoro n’i Yeruzalemu ni ho natoranyije mu miryango yose ya Israheli kugira ngo mpashyire izina ryanjye iteka ryose.

⁸Byongeye kandi sinzongera kwirukana Abayisraheli mu gihugu nahaye abasekuruza babo, nibubahiriza ibyo nabategetse byose mbivugishije Musa, byerekeye amategeko, amateka, n’amabwiriza yanjye.»

⁹Manase ayobya Abayuda n’ab’i Yeruzalemu bituma bakora nabi kurusha amahanga Uhoraho yarimburiye imbere y’Abayisraheli.

¹⁰Uhoraho aburira Manase n’abantu be, ariko ntibabyitaho.

¹¹Uhoraho abateza abatware b’ingabo z’Umwami wa Ashuru: bafata Manase bamukuruza ingobe, bamubohesha umunyururu w’inyabubiri, bamujyana i Babiloni[27].

¹²Ageze mu kaga, Manase yinginga Uhoraho Imana ye, yicisha bugufi cyane imbere y’Imana y’abasekuruza be.

¹³Arayisaba, Imana yiyemeza kugira impuhwe, yumva ugutakamba kwe maze imusubiza i Yeruzalemu kugira ngo akomeze ubwami bwe. Nuko Manase amenya ko Uhoraho ari we Mana.

¹⁴Nyuma y’ibyo, yubaka inyuma y’umurwa wa Dawudi inkike z’amabuye zanyuraga mu burengerazuba bwa Gihoni mu kabande, zikagera ku irembo ry’Amafi kandi zari zikikije Ofeli; azigira ndende cyane. Ashyira abatware b’abasirikare mu migi yose ikomeye ya Yuda.

¹⁵Avana mu Ngoro y’Uhoraho imana z’abanyamahanga n’amashusho yazo, kandi ajugunya hirya y’umugi intambiro zose yari yarubatse ku musozi w’Ingoro y’Uhoraho i Yeruzalemu.

¹⁶Yongera kubaka urutambiro rw’Uhoraho, aruturiraho ibitambo by’ubuhoro n’iby’ibisingizo, kandi ategeka Abayuda bose gukorera Uhoraho Imana ya Israheli.

¹⁷Nyamara abantu bakomeje gutura ibitambo mu masengero y’ahirengeye, ariko babigirira kubahiriza Uhoraho Imana yabo gusa.

¹⁸Ibindi bigwi bya Manase, amasengesho yabwiye Imana ye, n’amagambo abashishozi bamugejejeho mu izina ry’Uhoraho, Imana ya Israheli, ibyo byanditswe mu gitabo cy’Ibyakozwe n’Abami ba Israheli.

¹⁹Naho ugusenga kwe n’ukuntu Imana yamwumvise, ibyaha bye byose n’ubuhemu bwe, hamwe n’ahantu hirengeye yubatse amasengero kandi akahashyira inkingi za Ashera n’amashusho mbere y’uko yicisha bugufi, byose byanditswe mu gitabo cy’Ibyakozwe na Hozayi.

²⁰Manase aratanga asanga abasekuruza be; umurambo we bawushyingura mu ngoro ye. Umuhungu we Amoni amuzungura ku ngoma.

²¹Amoni yimitswe amaze imyaka makumyabiri n’ibiri avutse, amara imyaka ibiri ari ku ngoma i Yeruzalemu.

²²Yakoze ibidatunganiye Uhoraho nk’uko se Manase yabigenje. Amoni yatuye ibitambo kandi akorera amashusho yose yari yarabajwe na se Manase.

²³Icyakora we ntiyicisha bugufi imbere y’Uhoraho nk’uko se Manase yari yaricishije bugufi, ahubwo arushaho guhemuka.

²⁴Abagaragu be baramugambanira, bamwicira mu ngoro ye.

²⁵Abaturage bose b’igihugu na bo bica abagambaniye umwami Amoni bose, maze bimika umuhungu we Yoziya ngo amuzungure ku ngoma.