Read kinyarwanda Icya kabiri cy'Amateka 34 Bible Online

Icya kabiri cy'Amateka 34 - kinyarwanda bible

Icya kabiri cy'Amateka 34

¹Yoziya yimitswe amaze imyaka munani avutse, amara imyaka mirongo itatu n’umwe ari ku ngoma i Yeruzalemu.

²Yakoze ibitunganiye Uhoraho kandi akurikiza inzira za sekuruza Dawudi, atagize icyo ateshukaho.

³Mu mwaka wa munani w’ingoma ye, akiri umusore, Yoziya yatangiye gushakashaka Imana ya sekuruza Dawudi, maze mu mwaka wa cumi n’ibiri atangira gukura muri Yuda n’i Yeruzalemu amasengero y’ahirengeye, inkingi zeguriwe ibigirwamana n’amashusho yabyo yabajwe cyangwa yacuzwe.

⁴Basenya intambiro za Behali abireba, kimwe n’ibyotezo by’imibavu byari hejuru yazo; atemagura inkingi za Ashera n’amashusho yabajwe cyangwa yacuzwe, abihindura ubushingwe, abunyanyagiza ku mva z’abahoze babisenga;

⁵atwikira amagufwa y’abaherezabitambo b’ibyo bigirwamana ku ntambiro zabyo. Asukura atyo Yuda na Yeruzalemu.

⁶Mu migi ya Manase, n’iya Efurayimu, iya Simewoni ndetse n’iya Nefutali no mu bihugu bihakikije,

⁷ahasenya intambiro, atema inkingi z’ibigirwamana, amashusho yabyo ayahindura ubushingwe, asenya n’intambiro zose z’imibavu zari mu gihugu cya Israheli. Hanyuma asubira i Yeruzalemu.

⁸Mu mwaka wa cumi n’umunani w’ingoma ye, amaze gusukura igihugu n’Ingoro y’Uhoraho, Yoziya yohereza Shafani mwene Asaliyahu, na Maseyahu, umutware w’umugi, na Yowa mwene Yowakazi umunyamabanga we, ngo bajye gusana Ingoro y’Uhoraho, Imana ye.

⁹Abo na bo basanga Hilikiyahu, umuherezabitambo mukuru, bamumurikira feza yazanywe mu Ngoro y’Imana, iyo abalevi barindaga irembo bari bahawe n’Abamanase, Abefurayimu n’abandi Bayisraheli, n’iyatanzwe n’Abayuda n’Ababenyamini bose, n’abaturage b’i Yeruzalemu.

¹⁰Nuko bayizanira abari bashinzwe gufata neza Ingoro y’Uhoraho, na bo bashyikiriza iyo feza abakozi bagombaga gusana Ingoro y’Uhoraho bakayikomeza,

¹¹Bayiha rero ababaji n’abubatsi kugira ngo bagure amabuye yo kubazwa n’ibiti byo gusakariraho, maze bagasubiranya amazu abami ba Yuda bari barononnye.

¹²Abakozi bakoranaga umurava umurimo wabo, bayobowe n’abalevi Yahati na Obadiyahu bene Merari, na Zekariya na Meshulamu bene Kehati. Hari n’abandi balevi bari bazi neza gucuranga ibyuma by’indirimbo,

¹³bategekaga abikorezi kandi bakayobora abakozi bose, buri wese mu mwuga we. Hari kandi n’abandi balevi b’abanditsi, ab’abagenzuzi, hakaba n’abanyanzugi.

¹⁴Mu gihe babikuraga feza yazanywe mu Ngoro y’Uhoraho, ni bwo umuherezabitambo mukuru Hilikiyahu yatahuye igitabo cy’Amategeko y’Uhoraho yatanzwe na Musa.

¹⁵Hilikiyahu abimenyesha umunyamabanga Shafani, amubwira ati «Natahuye igitabo cy’Amategeko mu Ngoro y’Uhoraho.» Hilikiyahu ahereza Shafani icyo gitabo,

¹⁶na we agishyira umwami, maze aramubwira ati «Ibyo wategetse byose, abagaragu bawe ubu barabikora:

¹⁷batanze feza basanze mu Ngoro y’Uhoraho bayishyikiriza abashinzwe gukoresha imirimo n’abayikora.»

¹⁸Hanyuma umunyamabanga Shafani yongera kubwira umwami ati «Umuherezabitambo Hilikiyahu yampaye iki gitabo.» Shafani agisomera umwami.

¹⁹Umwami amaze kumva amagambo yo mu gitabo cy’Amategeko ashishimura imyambaro ye,

²⁰hanyuma ategeka Hilikiyahu na Ahikamu mwene Shafani, na Abudoni mwene Mika, n’umunyamabanga Shafani, ndetse na Asaya, umugaragu w’umwami, ati

²¹«Nimugende mumbarize Uhoraho, jye n’Abayisraheli n’Abayuda basigaye, ibyerekeye amagambo yo muri iki gitabo cyatahuwe; kuko uburakari Uhoraho adufitiye ari bwinshi, bitewe n’abasekuruza bacu batakurikije amagambo y’Uhoraho, ntibite ku byanditswe muri iki gitabo byose.»

²²Hilikiyahu hamwe n’abo umwami yari yavuze bajya kwa Hulida w’umuhanuzikazi, umugore w’umugabo Shalumi wari ushinzwe kumenya imyambaro n’imihango yo mu Ngoro, akaba mwene Tokihati mwene Hasira. Uwo mugore yari atuye i Yeruzalemu mu rusisiro rwari rwubatswe vuba. Bamubwira uko batumwe,

²³maze arabasubiza ati

²⁴«Uhoraho, Imana ya Israheli, aravuze ngo: Mugende mubwire uwo muntu wabantumyeho, muti ’Uhoraho aravuze ngo agiye guteza ibyago n’imivumo aha hantu n’abahatuye nk’uko byanditswe mu gitabo basomeye umwami wa Yuda.

²⁵Kubera ko bantaye, bagatwikira imibavu izindi mana, bakansuzuguza ibikorwa by’amaboko yabo, uburakari mfitiye aha hantu ni bwinshi kandi ntibuzashira.’

²⁶Naho umwami wa Yuda wabatumye kubaza Uhoraho, mumubwire muti ’Uhoraho, Imana ya Israheli, aravuze ngo: Wumvise ayo magambo,

²⁷nuko umutima wawe uricuza, wicisha bugufi imbere y’Imana umaze kumva amagambo yavugiwe aha hantu n’abahatuye, usesa amarira imbere yanjye, ubu rero nanjye ubwanjye nakumvise! Ni ko Uhoraho avuze.

²⁸Dore nzakureka usange abasokuruza bawe uzigendere amahoro, uzahambwe utabonye na kimwe mu byago nzateza aha hantu n’abahatuye.’» Intumwa zishyira umwami icyo gisubizo.

²⁹Nuko umwami atumira abakuru bose ba Yuda n’ab’i Yeruzalemu, bateranira iruhande rwe.

³⁰Hanyuma azamuka mu Ngoro y’Uhoraho, aherekejwe n’Abayuda bose, n’abatuye i Yeruzalemu, ari abaherezabitambo, ari abalevi, ari n’abantu bose, abakuru n’abato. Yoziya abasomera mu ijwi riranguruye amagambo yose yo mu gitabo cy’Isezerano cyabonetse mu Ngoro y’Uhoraho.

³¹Umwami yari ahagaze mu mwanya we, nuko asezeranira Uhoraho ko azamukurikira, akubahiriza amategeko ye, amabwiriza ye n’amateka ye, n’umutima we wose, n’amagara ye yose, mbese nk’uko byari byanditswe muri icyo gitabo.

³²Yemeza iryo sezerano abari i Yeruzalemu bose n’Ababenyamini, nuko abaturage b’i Yeruzalemu bakurikiza isezerano ry’Imana, Imana ya basekuruza babo.

³³Hanyuma Yoziya aca ibiterasoni byose mu bihugu byose by’Abayisraheli kandi ategeka abari muri Israheli bose gukorera Uhoraho, Imana yabo. Mu gihe cyose yari akiriho, ntibateshutse ku Uhoraho, Imana y’abasekuruza babo.