Read kinyarwanda Icya kabiri cy'Amateka 35 Bible Online

Icya kabiri cy'Amateka 35 - kinyarwanda bible

Icya kabiri cy'Amateka 35

¹Yoziya akorera i Yeruzalemu Pasika y’Uhoraho, nuko babaga abana b’intama za Pasika ku munsi wa cumi n’ine w’ukwezi kwa mbere.

²Yoziya ashyira abaherezabitambo mu mirimo yabo kandi abatera inkunga mu kazi ko mu Ngoro y’Uhoraho.

³Abalevi bari bashinzwe kwigisha Abayisraheli bose kandi bareguriwe Uhoraho, arababwira ati «Kuva igihe bashyize Ubushyinguro butagatifu mu Ngoro y’Uhoraho, Salomoni mwene Dawudi, umwami wa Israheli, yari yarubatse, ntimwongeye kubuheka ku ntugu zanyu. Ubu ngubu rero nimukorere Uhoraho Imana yanyu n’umuryango wayo Israheli.

⁴Nimwigabanyemo imitwe mukurikije amazu yanyu, nk’uko inyandiko ya Dawudi, umwami wa Israheli, yabigennye, n’umuhungu we Salomoni akabibategeka.

⁵Mwebwe abalevi rero, mujye muhagarara ahantu hatagatifu, buri wese ari mu cyiciro cye kandi mwiteguye gufasha abavandimwe banyu bo muri rubanda, mukurikije inzu ya buri muntu.

⁶Nimubage intama za Pasika, mwitagatifuze kandi muzitegurire abavandimwe banyu kugira ngo bubahirize uyu munsi mukuru, bakurikije ijambo ry’Uhoraho ryavuzwe na Musa.»

⁷Mu matungo magufi Yoziya aha rubanda abana b’intama n’abana b’ihene bagera ku bihumbi mirongo itatu, kugira ngo babibagire Pasika, yongeraho impfizi ibihumbi bitatu zivuye mu mutungo w’umwami.

⁸Abanyacyubahiro be, na bo babyishakiye, bafata mu matungo yabo, bayaha rubanda, abaherezabitambo n’abalevi. Hilikiyahu, Zekariyahu na Yehiyeli, abatware b’Ingoro y’Uhoraho, ni ko gutanga abana b’intama ibihumbi bibiri na magana atandatu, n’impfizi magana atatu, babiha abaherezabitambo ngo babibagire Pasika.

⁹Konaniyahu n’abavandimwe be Shemayahu, Netaneli, Hashabiyahu, Yehiyeli na Yozabadi bari abatware b’abalevi batanga abana b’intama ibihumbi bitanu n’impfizi magana atanu, babiha abalevi kugira ngo babibagire Pasika.

¹⁰Dore uko babigenjeje: abaherezabitambo kimwe n’abalevi bari bahagaze mu myanya yabo, buri muntu ari mu cyiciro cye, nk’uko byategetswe n’umwami.

¹¹Babaga intama za Pasika, abaherezabitambo bagahabwa amaraso bakayamisha, naho abalevi bagakuraho uruhu.

¹²Amatungo maremare yari agenewe gutwikwa, yo bayashyira ukwayo, bayagabanya bakurikije amazu ya rubanda bari aho, kugira ngo bayature Uhoraho, nk’uko byanditswe mu gitabo cya Musa.

¹³Botsa intama za Pasika, naho ibindi biribwa bitagatifu babiteka mu byungo, mu masafuriya no mu nkono, maze bihutira kubigaburira rubanda rwose.

¹⁴Hanyuma abalevi bitegurira ibyabo n’iby’abaherezabitambo, kuko abaherezabitambo, bene Aroni, bari bakomeje guhereza ibitambo bitwikwa n’ingimbu kugera bwije; nuko abalevi bategura ibya Pasika, bateganya ibyabo ndetse n’iby’abaherezabitambo bene Aroni.

¹⁵Abaririmbyi bene Asafu bari bahagaze mu myanya yabo, nk’uko byari byarategetswe na Dawudi, ari na ho Asafu, na Henani, na Yedutuni, umushishozi w’umwami, bari baberetse; na none abarinzi b’amarembo baguma kuri buri rembo. Ntibagombye guhagarika imirimo yabo kuko abavandimwe babo b’abalevi bari babateguriye ibibagenewe.

¹⁶Uwo munsi imihango yo gusingiza Uhoraho iratungana; bahimbaza Pasika kandi baturira ibitambo bitwikwa ku rutambiro rw’Uhoraho nk’uko byategetswe n’umwami Yoziya.

¹⁷Bityo Abayisraheli bari aho icyo gihe bahimbaza Pasika n’umunsi mukuru w’imigati idasembuwe mu minsi irindwi.

¹⁸Ntibari barigeze bakora umunsi mukuru wa Pasika muri Israheli kuva igihe cy’umuhanuzi Samweli, kandi nta mwami n’umwe w’Abayisraheli wigeze ahimbaza Pasika nk’uko Yoziya, abaherezabitambo, abalevi, Abayuda bose n’Abayisraheli bari aho, n’abaturage b’i Yeruzalemu bayizihije.

¹⁹Iyo Pasika yabaye mu mwaka wa cumi n’umunani w’ingoma ya Yoziya.

²⁰Nyuma y’ibyo byose, Yoziya amaze gusana Ingoro y’Uhoraho, Neko, umwami wa Misiri, azamuka agana kuri Efurati agiye kurwanira i Karikemishi, nuko Yoziya aramusanganira.

²¹Neko amutumaho intumwa kumubaza ziti «Turapfa iki, Mwami wa Yuda? Nta bwo ari wowe nje gutera uyu munsi, ahubwo ni undi wundi nteye, kandi Imana yantegetse kwihuta. Reka kwiteranya n’Imana iri kumwe nanjye, hato itakurimbura.»

²²Nyamara Yoziya ntiyahindura igitekerezo cye, kuko yari yiyemeje kurwana na we. Nuko ntiyita ku magambo ya Neko, kandi yari avuye ku Mana; nuko ashoreza urugamba mu kibaya cy’i Megido.

²³Abanyamiheto barasa umwami Yoziya maze abwira abagaragu be, ati «Nimunjyane kuko numva merewe nabi.»

²⁴Abagaragu be bamukura mu igare rye ry’intambara bamushyira mu rindi gare, maze bamujyana i Yeruzalemu, aba ari ho agwa. Umurambo we ushyingurwa mu irimbi ryarimo abasekuruza be, nuko Abayuda bose n’ab’i Yeruzalemu baririra Yoziya.

²⁵Yeremiya ahimbira Yoziya indirimbo y’amaganya; ndetse abaririmbyi n’abaririmbyikazi na bo bahimbira Yoziya indirimbo z’amaganya ku buryo uwo muhango ukiriho n’ubu muri Israheli. Nuko izo ndirimbo bazandika mu bitabo by’Amaganya.

²⁶Ibindi bigwi bya Yoziya n’ibikorwa bye by’ubugiraneza bihuje n’ibyanditswe mu Mategeko y’Uhoraho,

²⁷mbese ibikorwa bye kuva ku byabanje kugera ku byaherutse, byose byanditswe mu gitabo cy’Abami ba Israheli na Yuda.