Read kinyarwanda Icya kabiri cy'Amateka 36 Bible Online

Icya kabiri cy'Amateka 36 - kinyarwanda bible

Icya kabiri cy'Amateka 36

¹[28] Abaturage b’igihugu bafata Yowakazi mwene Yoziya, baramwimika ngo azungure se ku ngoma i Yeruzalemu.

²Yowakazi yimitswe amaze imyaka makumyabiri n’itatu avutse, amara amezi atatu ari ku ngoma i Yeruzalemu.

³Umwami wa Misiri amukura ku ngoma i Yeruzalemu kandi ategeka icyo gihugu gutanga umusoro w’amatalenta ijana ya feza n’italenta imwe ya zahabu.

⁴Umwami wa Misiri yimika umuvandimwe we Eliyakimu, amugira umwami wa Yuda i Yeruzalemu, maze amuhindura izina amwita Yoyakimu. Naho Yowakazi umuvandimwe we, Neko aramufata amujyana mu Misiri.

⁵Yoyakimu yimitswe amaze imyaka makumyabiri n’itanu avutse, amara imyaka cumi n’umwe ari ku ngoma i Yeruzalemu. Yakoze ibidatunganiye Uhoraho, Imana ye.

⁶Nebukadinetsari umwami w’i Babiloni, aramutera. Amubohesha umunyururu w’inyabubiri, amujyana i Babiloni.

⁷Nebukadinetsari ajyana i Babiloni n’ibintu byinshi byo mu Ngoro y’Uhoraho, abishyira mu ngoro ye i Babiloni.

⁸Ibindi Yoyakimu yakoze, n’amahano yose yakoze n’ingaruka zayo, byose byanditswe mu gitabo cy’Abami ba Israheli na Yuda. Umuhungu we Yoyakini amuzungura ku ngoma.

⁹Yoyakini yimitswe amaze imyaka cumi n’umunani avutse, amara amezi atatu n’iminsi cumi ari ku ngoma i Yeruzalemu. Yakoze ibidatunganiye Uhoraho.

¹⁰Umwaka utashye, umwami Nebukadinetsari yohereza abantu ngo bamuzane i Babiloni hamwe n’ibintu by’agaciro byo mu Ngoro y’Uhoraho, maze yimika umuvandimwe we Sedekiya ngo abe umwami wa Yuda i Yeruzalemu.

¹¹Sedekiya yimitswe amaze imyaka makumyabiri n’umwe avutse, amara imyaka cumi n’umwe ari ku ngoma i Yeruzalemu.

¹²Yakoze ibidatunganiye Uhoraho, Imana ye. Ntiyicishije bugufi imbere y’umuhanuzi Yeremiya wamubwiraga iby’Uhoraho.

¹³Ndetse agomera umwami Nebukadinetsari wari waramurahije Imana. Sedekiya ashinga ijosi kandi anangira umutima aho kugarukira Uhoraho, Imana ya Israheli.

¹⁴Abakuru b’abaherezabitambo na bo, n’abatware ba rubanda, barushaho gucumura bakurikiza imihango yose mibi y’abanyamahanga, ndetse bandavuza Ingoro Uhoraho yari yaratagatifurije i Yeruzalemu.

¹⁵Uhoraho, Imana y’abasekuruza babo, arabihanangiriza bikomeye kandi abatumaho kenshi intumwa ze, abitewe n’imbabazi yari afitiye umuryango we n’Ingoro ye bwite.

¹⁶Nyamara bo bagakubita intumwa z’Imana, bagasuzugura amagambo yazo kandi bagaseka abahanuzi bayo, bigeza aho Uhoraho yarakariye umuryango we ubuziraherezo.

¹⁷Nuko Uhoraho abateza umwami w’Abakalideya. Araza, maze abasore babo abicisha inkota mu Ngoro, nta kubabarira abahungu n’abakobwa, habe n’abasaza cyangwa abameze imvi; bose Uhoraho arabamugabiza!

¹⁸Ibintu byose, byaba ibikomeye cyangwa ibyoroheje, hamwe n’umutungo wo mu Ngoro y’Uhoraho n’umutungo w’umwami, n’uw’abanyacyubahiro be, byose abijyana i Babiloni.

¹⁹Batwika Ingoro y’Uhoraho, barimbura inkike z’amabuye z’i Yeruzalemu, amazu yaho barayatwika yose, maze ibintu byose by’agaciro barabitsemba.

²⁰Hanyuma umwami wabo ajyana bunyago i Babiloni abari basigaye bacitse ku icumu, abagira abacakara be n’ab’abahungu be kugeza ku ngoma y’Abaperisi.

²¹Nuko huzura ijambo Uhoraho yari yavugishije Yeremiya, agira ati «Igihugu kizamara imyaka mirongo irindwi nta muntu ucyitayeho kugira ngo bandihe ibiruhuko by’amasabato yose batubahirije.»

²²[29] Mu mwaka wa mbere w’ingoma ya Sirusi, umwami w’Abaperisi, Uhoraho yiyemeza kuzuza ijambo yari yaravugishije Yeremiya; nuko akangura umutima wa Sirusi, umwami w’Abaperisi, kugira ngo atangaze mu bihugu bye byose, ari mu mvugo, ari no mu nyandiko, iri teka:

²³«Sirusi, umwami w’Abaperisi, aravuze ngo: Abami bose bo ku isi, Uhoraho Imana Nyir’ijuru yarabangabije, kandi antegeka ubwe kumwubakira Ingoro i Yeruzalemu, yo muri Yuda. Muri mwebwe, umuntu wese wo mu muryango we nabane n’Imana ye, kandi nazamuke . . . »