Read kinyarwanda Ezira 10 Bible Online

Ezira 10 - kinyarwanda bible

Ezira 10

¹Uko Ezira yasengaga asaba imbabazi, akarira apfukamye imbere y’Ingoro y’Uhoraho, ni ko Abayisraheli benshi, abagabo, abagore n’abana, bakoraniraga iruhande rwe, kandi bose barariraga cyane.

²Nuko Shekaniya mwene Yehiyeli, wo muri bene Elamu, abwira Ezira ati «Twahemukiye Imana yacu, turongora abagore twakuye mu banyamahanga, batuye iki gihugu. Nyamara, n’ubwo ari uko bimeze, Israheli iracyafite icyizere.

³None rero, reka tugirane isezerano n’Imana yacu, tuyemerere ko tugiye kwirukana abo bagore bacu b’abanyamahanga n’abana babo, dukurikije inama y’umutegetsi wanjye n’iy’abatinya itegeko ry’Imana yacu. Dukwiye kugenza dutyo, dukurikije itegeko!

⁴Haguruka, kuko ibyo ari wowe bireba! Kandi natwe turaba turi kumwe; komera kandi ubikore!»

⁵Ezira ni ko guhaguruka, arahiza abatware b’abaherezabitambo, abalevi n’Abayisraheli bose ko bazabitunganya nk’uko byavuzwe; nuko bararahira.

⁶Ezira ahaguruka aho yahoze imbere y’Ingoro y’Uhoraho, ajya mu cyumba cya Yohanani mwene Eliyashibu. Ahageze ntiyarya umugati kandi ntiyanywa amazi, kuko yari mu kababaro kubera ubuhemu bw’abajyanywe bunyago.

⁷Hanyuma, babitangaza mu gihugu cyose cya Yuda n’i Yeruzalemu, bahamagaza abajyanywe bunyago bose, ngo bateranire i Yeruzalemu.

⁸Uzaba atarahagera mu minsi itatu nk’uko abatware bakuru babyemeje, azanyagwa ibintu bye byose kandi na we ubwe acibwe mu ikoraniro ry’abajyanywe bunyago.

⁹Nuko abantu bose ba Yuda n’aba Benyamini bagera i Yeruzalemu nyuma y’iminsi itatu, barahakoranira; hari ku munsi wa makumyabiri w’ukwezi kwa cyenda[25]. Imbaga yose iguma imbere y’Ingoro y’Imana, bahinda umushyitsi kubera icyo gikorwa, no kubera imvura nyinshi yagwaga.

¹⁰Ezira umuherezabitambo arahaguruka, maze arababwira ati «Mwarahemutse, mushaka abagore b’abanyamahanga, maze mwongera mutyo ibyaha bya Israheli.

¹¹None rero, nimuhe ikuzo Uhoraho, Imana y’abasokuruza banyu, kandi murangize ugushaka kwe: nimuce ukubiri n’abo banyamahanga batuye iki gihugu kandi mutandukane n’abagore mwabashatsemo!»

¹²Ikoraniro ryose rirasubiza mu ijwi riranguruye, riti «Ni byo koko! Tugomba kubikora uko ubivuze!

¹³Ariko kandi turi benshi kandi ni mu itumba; ntitwashobora kuguma hanze. Uretse n’ibyo, ntibyatunganywa mu munsi umwe cyangwa ibiri, kuko muri ibyo twacumuye turi benshi.

¹⁴None rero, abatware bacu nibagume hano mu izina ry’ikoraniro ryose, naho abo mu migi yacu bashatse abagore b’abanyamahanga bose, bazaze mu gihe kizaba cyabagenewe. Bazazane n’abakuru ba buri mugi n’abacamanza bawo, kugeza ubwo uburakari bw’Imana yacu bwatewe n’icyo cyaha twakoze, buzaba bumaze gucuba.»

¹⁵Nyamara Yonatani mwene Asaheli, na Yahizeya mwene Tikuwa barabirwanya, na Meshulamu na Shabatayi w’umulevi barabashyigikira.

¹⁶Ariko abari barajyanywe bunyago babigenza nk’uko byari byavuzwe. Ezira umuherezabitambo atoranya abatware b’amazu akurikije imiryango bavukamo, buri wese agahamagarwa mu izina rye. Nuko bateranira hamwe ku munsi wa mbere w’ukwezi kwa cumi, bagira ngo basuzume icyo kibazo.

¹⁷Ku munsi wa mbere w’ukwezi kwa mbere, ni ho bari barangije gusuzuma ibyerekeye abagabo bashatse abagore b’abanyamahanga.

¹⁸Mu bahungu b’abaherezabitambo, abo basanze barashatse abagore b’abanyamahanga ni aba: Muri bene Yozuwe, umuhungu wa Yosadaki, n’abavandimwe be ni Maseya, Eliyezeri, Yaribu na Gedaliya;

¹⁹barahirira ko bemeye kwirukana abagore babo, kandi bagatura na rugeyo imwe ho impongano y’icyaha cyabo;

²⁰muri bene Imeri ni Hamani na Zebadiya;

²¹muri bene Harimu ni Maseya, Eliya, Shemaya, Yehiyeli na Uziya;

²²muri bene Pashuru ni Eliyonayi, Maseya, Yishimayeli, Netaneli, Yozabadi na Eleyasa.

²³Mu balevi ni Yozabadi, Shimeyi, Kelaya ari we Kelita, Petahiya, Yehuda na Eliyezeri.

²⁴Mu baririmbyi ni Eliyashibu na Zakuri. Mu banyanzugi ni Shalumi, Telemi na Uri.

²⁵Naho mu Bayisraheli basanzwe ni aba: muri bene Parewoshi ni Ramiya, Yiziya, Malikiya, Miyamini, Eleyazari, Malikiya wundi na Benaya;

²⁶muri bene Elamu ni Mataniya, Zekariya, Yehiyeli, Abudi, Yeremoti na Eliya;

²⁷muri bene Zatu ni Eliyonayi, Eliyashibu, Mataniya, Yeremoti, Zabadi na Aziza;

²⁸muri bene Bebayi ni Yehohanani, Hananiya, Zabayi na Atilayi;

²⁹muri bene Bani ni Meshulamu, Maluki, Adaya, Yashubi, Sheyali na Yeramoti;

³⁰muri bene Pehati‐Mowabu ni Adina, Kelali, Benaya, Maseya, Mataniya, Besaleli, Binuwi na Manase;

³¹muri bene Harimu ni Eliyezeri, Yishiya, Malikiya, Shemaya, Simewoni,

³²Benyamini, Maluki na Shemariya;

³³muri bene Hashumi ni Matenayi, Matata, Zabadi, Elifeleti, Yeremayi, Manase na Shimeyi;

³⁴muri bene Bani ni Madayi, Amuramu, Uweli,

³⁵Benaya, Bediya, Keluhu,

³⁶Waniya, Meremoti, Eliyashibu,

³⁷Mataniya, Matenayi, na Yasayi;

³⁸muri bene Binuwi ni Shimeyi,

³⁹Shelemiya, Natani na Adaya;

⁴⁰muri bene Azuri, ni Shashayi, Sharayi,

⁴¹Azareli, Shelemiyahu, Shemariya,

⁴²Shalumi, Amariya, na Yozefu;

⁴³muri bene Nebo ni Yehiyeli, Matitiya, Zabadi, Zebina, Yadayi, Yoweli na Benaya.

⁴⁴Abo bose bari barashatse abagore b’abanyamahanga; nuko babirukanana n’abana babo.