Read kinyarwanda Nehemiya 11 Bible Online

Nehemiya 11 - kinyarwanda bible

Nehemiya 11

¹Nuko abatware b’umuryango wose baraza batura i Yeruzalemu. Rubanda basigaye bo, hakoreshwa ubufindo kugira ngo ku bantu icumi, umwe aze ature muri Yeruzalemu, umugi mutagatifu, naho icyenda bandi bagume mu migi yabo.

²Imbaga ishimira abantu bose bari biyemeje kuza gutura i Yeruzalemu, babyishakiye[23].

³Dore amazina y’abatware bo muri ako karere biyemeje gutura i Yeruzalemu. Naho Abayisraheli bandi, baba abaherezabitambo, abalevi, abahereza cyangwa se abahungu b’abagaragu ba Salomoni, bo bakwiriye imigi ya Yuda, buri wese atura mu isambu ye.

⁴I Yeruzalemu hatuwe na bene Yuda hamwe na bene Benyamini: Muri bene Yuda ni: Ataya mwene Uziya, mwene Zekariya, mwene Amariya, mwene Shefatiya, mwene Mahalaleli wo muri bene Pereshi;

⁵na Maseya mwene Baruki, mwene Kolihoze, mwene Hazaya, mwene Adaya, mwene Yoyaribu, mwene Zekariya, mwene Shela.

⁶Bene Pereshi bose batuye i Yeruzalemu, bari abagabo 468 b’intwari.

⁷Naho bene Benyamini, ni Salu mwene Meshulamu, mwene Yowedi, mwene Pedaya, mwene Kolaya, mwene Maseya, mwene Itiyeli, mwene Yeshaya,

⁸hamwe n’abavandimwe be Gabayi na Salayi; bose hamwe bakaba 928.

⁹Yoweli mwene Zikuri yari umutegeka wabo, naho Yehuda mwene Hasenuwa akaba uwa kabiri mu butegetsi bw’umugi.

¹⁰Mu baherezabitambo, ni Yedaya mwene Yoyaribu, Yakini,

¹¹Seraya mwene Hilikiya, mwene Meshulamu, mwene Sadoki, mwene Merayoti, mwene Ahitubi wategekaga Ingoro y’Imana,

¹²hamwe n’abavandimwe babo bakoraga mu Ngoro y’Imana; bose hamwe bakaba 822. Hari Adaya mwene Yerohamu, mwene Pelaliya, mwene Amisi, mwene Zekariya, mwene Pashuru, mwene Malikiya,

¹³n’abavandimwe be b’abatware b’amazu; bose hamwe bari 242. Hari na Amasayi mwene Azareli, mwene Ahizayi, mwene Meshilemoti, mwene Imeri,

¹⁴n’abavandimwe be, bose hamwe bari abagabo 128 b’intwari. Umutegeka wabo yari Zabadiyeli mwene Hagadoli.

¹⁵Mu Balevi, ni Shemaya mwene Hashubi, mwene Azirikamu, mwene Hashabiya, mwene Buni,

¹⁶hamwe na Shabatayi na Yozabadi, bari abatware b’abalevi, bashinzwe imirimo yo hanze ku Ngoro y’Imana.

¹⁷Hari Mataniya mwene Mika, mwene Zabadi, mwene Asafu wayoboraga indirimbo, agatera isengesho ryo gushimira. Hari na Bakibukiya uwa kabiri mu bavandimwe be, na Abuda mwene Shamuwa, mwene Galali, mwene Yedutuni.

¹⁸Abalevi bose bari batuye mu Murwa Mutagatifu ni 284.

¹⁹Mu banyanzugi, ni Akubu, Talimoni hamwe n’abavandimwe babo barindaga amarembo, bose hamwe bari 172.

²⁰Naho abandi Bayisraheli basigaye, abaherezabitambo n’abalevi, bo bakwiriye mu migi ya Yuda, buri wese atura mu munani we.

²¹Abahereza bari batuye muri Ofeli; Siha na Gishipa bakaba abatware babo.

²²Umutware w’abalevi b’i Yeruzalemu yari Uzi, mwene Bani, mwene Hashabiya, mwene Mataniya, mwene Mika; yari umwe muri bene Asafu, baririmbaga mu Ngoro y’Imana.

²³Koko kandi umwami yari yarabahaye amategeko n’amabwiriza kugira ngo buri munsi bashobore kurangiza neza uwo murimo wabo w’abaririmbyi.

²⁴Petahiya mwene Meshezabeli wo muri bene Zerahi, mwene Yehuda, ni we wahagarariraga umwami, agakemura ibibazo byose byerekeye imbaga.

²⁵Naho mu nsisiro zo ku misozi, Abayuda batuye i Kiriyati‐Araba no mu midugudu yaho; i Diboni no mu midugudu yaho, i Yekabuseli no mu nsisiro zaho;

²⁶i Yeshuwa, i Molada, i Betipeleti,

²⁷i Hasari‐Shuwali, i Berisheba no mu midugudu yaho;

²⁸i Sikilage, i Mekona no mu nsisiro zaho;

²⁹i Eni‐Rimoni, i Soreya, i Yarimuti,

³⁰i Zanowa, i Adulamu no mu midugudu yaho; i Lakishi no mu misozi yaho; i Azeka no mu midugudu yaho. Batura kuva i Berisheba kugeza ku kabande ka Hinomu.

³¹Ababenyamini bo batuye bahereye i Geba, i Mikimasi, i Aya, i Beteli no mu midugudu yaho;

³²i Anatoti, i Nobu, i Ananiya,

³³i Hasori, i Rama, i Gitayimu,

³⁴i Hadidi, i Seboyimu, i Nebalati,

³⁵i Lodi n’i Ono, ku kibaya cy’abashongesha ibyuma.

³⁶Bamwe mu balevi bo mu turere twa Yuda, bajya guturana n’Ababenyamini.