Read kinyarwanda Nehemiya 2 Bible Online

Nehemiya 2 - kinyarwanda bible

Nehemiya 2

¹Bigeze mu kwezi kwa Nisani k’umwaka wa makumyabiri w’ingoma y’umwami Aritashuweru, kuko nari nshinzwe divayi, mfata divayi njya guhereza umwami. Kuva mbere, nta na rimwe nari nigeze ngira agahinda imbere ye.

²Umwami ni ko kumbaza ati «Ni kuki ureba nk’ubabaye? Aho nturwaye? Waba se hari ikindi ufite kikubabaje ku mutima?» Mbyumvise ntahwa n’ubwoba bwinshi.

³Nuko mbwira umwami, nti «Umwami arakarama! Nabura nte kurebana agahinda, kandi umurwa urimo imva z’abasokuruza banjye warasenyutse, n’amarembo yawo agatwikwa?»

⁴Umwami arambaza ati «Icyo ushaka se ni iki?» Ako kanya nambaza Imana Nyir’ijuru,

⁵maze nsubiza umwami, nti «Niba ibyo bitunganiye umwami, kandi umugaragu wawe akakugiraho ubutoni, unyohereze mu gihugu cya Yuda, mu murwa urimo imva z’abasokuruza banjye, kugira ngo nongere nywubake.»

⁶Ubwo umwami yari yicaranye n’umwamikazi, ni ko kumbaza ati «Urugendo rwawe ruzamara igihe kingana iki? Uzagaruka ryari?» Umwami muha igihe nzamarayo[3], nuko arabishima, ni ko kubinyemerera.

⁷Ndongera mbwira umwami, nti «Niba ibyo bitunganiye umwami, bampe inzandiko nshyira abategetsi b’ibihugu by’iburengerazuba bwa Efurati, kugira ngo bazandeke mpite, ngere mu gihugu cya Yuda.

⁸Nibanyandikire kandi n’urundi rwandiko rwo gushyira Asafu umurinzi w’ishyamba ry’umwami, kugira ngo azampe ibiti byo kubazamo ibikingi by’amarembo yegereye Ingoro, iby’inkike z’umugi, ndetse n’iby’inzu nzabamo.» Umwami arabinyemerera byose, kuko Imana yari kumwe nanjye.

⁹Ndagenda nsanga abategetsi b’iburengerazuba bwa Efurati, maze mbashyikiriza inzandiko z’umwami. Ubwo kandi umwami yari yampaye bamwe mu bakuru b’ingabo no mu banyamafarasi be ngo bamperekeze.

¹⁰Sanabalati w’Umuhoroni, na Tobiya[4], umugaragu w’Umuhamoni, barabimenya kandi bababazwa cyane n’uko haje umuntu uzanywe no gushakira Abayisraheli ibyiza.

¹¹Ngeze i Yeruzalemu, nahamaze iminsi itatu.

¹²Hanyuma nkabyuka nijoro, jye n’abantu bake mu bo twari kumwe, ariko nari ntaragira uwo mpishurira umugambi werekeye Yeruzalemu Imana yanjye yanshyize mu mutima. Nta yandi mafarasi twari dufite, uretse iyaje impetse.

¹³Nuko muri iryo joro, nsohokera mu Irembo ryo ku Kibaya[5], ngenda nerekeje ku iriba ry’Ikiyoka no ku Irembo ry’Imyanda. Nitegereza nitonze inkike za Yeruzalemu zari zaratengaguritse, n’amarembo yayo yari yarakongotse.

¹⁴Ndakomeza ngera ku Irembo ry’Iriba n’ahagana ku kidendezi cy’umwami, hanyuma mbura aho nyuza ifarasi yari impetse.

¹⁵Nuko muri uwo mwijima, nzamuka iruhande rw’umugezi[6], nitegereza nitonze inkike, hanyuma nsubiza inzira najemo, ntahana mu Irembo ryo ku Kibaya.

¹⁶Ariko abatware ntibari bamenye aho nagiye, n’icyo nakoze; koko rero, kugeza ubwo nta cyo nari narahishuriye Abayahudi, abaherezabitambo, abanyacyubahiro, abacamanza, habe n’abandi bose bari bashinzwe imirimo.

¹⁷Noneho ndababwira nti «Murabona aya makuba turimo: Yeruzalemu yarasenyutse, n’amarembo yayo arashya. Nimuze, twubake inkike za Yeruzalemu, maze bareke kudusuzugura!»

¹⁸Nuko mbahishurira ubuntu Imana yanjye yari yangiriye ikanshyigikira, n’ibyo umwami yari yarambwiye byose. Nuko bavugira icyarimwe bati «Duhaguruke maze twubake!» Ni ko gutangirana umwete icyo gikorwa cyiza.

¹⁹Sanabalati w’Umuhoroni, Tobiya umugaragu w’Umuhamoni na Geshemu w’Umwarabu, ngo babyumve, baraduseka kandi baradusuzugura, bavuga bati «Ibyo mukora ni ibiki? Mbese mugiye kugomera umwami[7]?»

²⁰Ndabasubiza nti «Imana Nyir’ijuru ubwayo izaduha kubigeraho; twebwe abagaragu bayo, tugiye guhaguruka twubake. Ariko mwebwe, nta mugabane, nta munani, nta n’urwibutso mufite muri Yeruzalemu!»