Read kinyarwanda Iyimukamisiri 11 Bible Online

Iyimukamisiri 11 - kinyarwanda bible

Iyimukamisiri 11

¹Uhoraho abwira Musa, ati «Nshigaje koherereza Farawo na Misiri icyago kimwe gusa; hanyuma akabarekura mukava ino, ndetse ari byo akabirukana mukagenda burundu.

²Ubwire rubanda, buri mugabo asange umuturanyi we, na buri mugore asange mugenzi we baturanye, maze babasabe ibintu bya feza n’ibintu bya zahabu.»

³Nuko Uhoraho atera Abanyamisiri kubakira neza. Na Musa kandi ubwe yarebwagaho igihangange mu gihugu cya Misiri, mu bagaragu ba Farawo no muri rubanda.

⁴Musa aravuga ati «Uhoraho aravuze ngo: Mu ijoro rishyira igicuku, nzambukiranya Misiri;

⁵maze icyavutse uburiza cyose mu gihugu cya Misiri kizapfe, kuva ku mfura ya Farawo yari kuzamusimbura ku ngoma kugeza ku mfura yavutse ku muja upfukamye inyuma y’urusyo, no kugeza ku buriza bwose bw’amatungo.

⁶Mu gihugu cya Misiri hose hazacura imiborogo, batigeze bumva mbere kandi batazongera kumva ukundi.

⁷Nyamara mu Bayisraheli bose nta n’imbwa izamokera umuntu cyangwa inyamaswa, kugira ngo mumenyereho ko Uhoraho atandukanya Misiri na Israheli.

⁸Icyo gihe aba bagaragu bawe bazamanuka bansange, bampfukame imbere, banyinginge bati ’Sohoka ugende, wowe n’imbaga yose uyobora’. Hanyuma rero nzagende.» Nuko Musa asohoka kwa Farawo afite uburakari bwinshi.

⁹Uhoraho yungamo abwira Musa, ati «Farawo nta bwo azakumva, kugira ngo ibitangaza byanjye byigwize mu gihugu cya Misiri.»

¹⁰Musa na Aroni bari bakoreye ibyo bitangaza byose imbere ya Farawo, ariko Uhoraho atera umutima wa Farawo kunangira, maze ntiyarekura Abayisraheli ngo bagende bave mu gihugu cye.