Read kinyarwanda Iyimukamisiri 12 Bible Online

Iyimukamisiri 12 - kinyarwanda bible

Iyimukamisiri 12

¹[31] Uhoraho abwira Musa na Aroni bari mu gihugu cya Misiri, ati

²«Uku kwezi kuzababere intangiriro y’amezi, kuzabe ukwa mbere mu mezi y’umwaka wanyu.

³Nimubwire imbaga yose y’Abayisraheli, muti ’Ku munsi wa cumi w’uku kwezi, muzafate itungo rimwe muri buri muryango, itungo muri buri rugo.

⁴Niba urugo rurimo abantu bake kuri iryo tungo, bazarifatanye n’umuturanyi ubari hafi cyane, baringanize n’umubare w’abantu. Muzahitemo iryo tungo mukurikije icyo buri muntu ashobora kurya.

⁵Iryo tungo rizabe ridafite inenge, kandi ari isekurume imaze umwaka umwe. Muzaritoranye mu bana b’intama cyangwa mu bana b’ihene.

⁶Muzarigumane kugeza ku munsi wa cumi n’ine w’uku kwezi, maze ikoraniro ryose ry’imbaga y’Abayisraheli bazaribage mu mugoroba[32] w’akabwibwi.

⁷Bazende ku maraso y’iryo tungo, bayasige ku nkomanizo z’imiryango no ku mitambiko y’inzugi z’amazu bazaririramo.

⁸Bazarye inyama zaryo muri iryo joro. Bazazirye zokeje, bazirishe imigati idasembuye[33] n’imboga zisharira.

⁹Ntimuzagire icyo murya cyazo ari kibisi cyangwa se cyatetswe mu mazi: byose bizabe byokeje gusa, ari umutwe, ari amaguru n’amara.

¹⁰Mugomba kuzaba mwarangije butaracya; kandi nihagira ibisaguka mu gitondo, muzabitwike.

¹¹Iryo tungo muzarirya mutya: muzabe mukenyeje umukoba, mwambaye inkweto mu birenge, mufite inkoni mu ntoki; kandi muzarye mugira bwangu, kuko ari Pasika y’Uhoraho.

¹²Muri iryo joro, nzambukiranya igihugu cya Misiri, maze nice icyavutse uburiza cyose mu gihugu cya Misiri, guhera ku bantu kugeza ku nyamaswa; kandi n’ibigirwamana bya Misiri byose mbicire imanza. Ni jye Uhoraho!

¹³Amaraso azababera ikimenyetso ku mazu muzaba murimo. Nzabona amaraso, maze mbahiteho, mwoye kuzarimburwa igihe nzaba ndiho noreka igihugu cya Misiri.

¹⁴Uwo munsi uzababere urwibutso; buri mwaka muzajye mukora urugendo rwo kujya gusingiza Uhoraho. Muzajye muhimbaza uwo munsi uko ibihe bigenda bisimburana. Ngiryo itegeko ridakuka mbahaye.’»

¹⁵[34] Uhoraho yungamo ati «Mu minsi irindwi, muzajya murya imigati idasembuye. Guhera ku munsi wa mbere, muzavane mu mazu yanyu icyitwa umusemburo cyose. Kandi nihagira urya umugati usembuye, kuva ku munsi wa mbere kugeza ku munsi wa karindwi, uwo azaba aciwe muri Israheli.

¹⁶Ku munsi wa mbere muzagire ikoraniro ritagatifu, no ku munsi wa karindwi mugenze mutyo. Muri iyo minsi, nta murimo n’umwe bazakora, uretse gutegura ibyo kurya.

¹⁷Muzubahirize umunsi mukuru w’imigati idasembuye, kuko kuri uwo munsi nyine ari bwo navanye ingabo zanyu mu gihugu cya Misiri. Muzubahirize rero uwo munsi mukuru uko ibihe bigenda bisimburana. Ngiryo itegeko ridakuka mbahaye.

¹⁸Mu kwezi kwa mbere, ku munsi wa cumi n’ine w’ukwezi nimugoroba, muzajye murya imigati idasembuye kuzageza ku munsi wa makumyabiri n’umwe w’ukwezi nimugoroba.

¹⁹Mu minsi irindwi ntihazagire imisemburo iba mu mazu yanyu. Kandi nihagira urya umugati usembuye, uwo muntu azaba aciwe mu ikoraniro rya Israheli; yaba umusuhuke, yaba umwenegihugu.

²⁰Ntimuzagire icyo murya na kinzinya kirimo umusemburo. Aho muzaba mutuye hose, muzajye murya imigati idasembuye.»

²¹Musa atumiza abakuru bose b’imiryango ya Israheli, maze arababwira ati «Nimugende mutoranye itungo, murebe irikwiranye n’ingo zanyu, maze mutambe Pasika.

²²Muzende umushandiko w’icyuhagiro, mwinike mu maraso azaba ari ku ibesani; ayo maraso azaba ari ku ibesani muyasige ku mutambiko w’urugi no ku nkomanizo zombi. Naho mwebwe, ntihazagire umuntu urenga umuryango w’inzu ye, kugeza mu gitondo.

²³Igihe Uhoraho azambukiranya Misiri kugira ngo ayoreke, azabona amaraso ku mutambiko w’umuryango no ku nkomanizo zawo zombi, maze Uhoraho atambuke uwo muryango, yegutuma Umunyacyorezo[35] yinjira mu mazu yanyu ngo abarimbure.

²⁴Ibyo maze kubabwira ni itegeko muzakurikiza, wowe n’abana bawe, iteka ryose.

²⁵Igihe rero muzaba mwarinjiye mu gihugu Uhoraho azabaha nk’uko yabivuze mbere, muzubahirize uwo muhango.

²⁶Abana banyu nibababaza ngo: Uwo muhango mukoze uvuga iki?

²⁷muzabasubize muti ’Ni igitambo cya Pasika dutuye Uhoraho; kuko yahise imbere y’ingo z’Abayisraheli igihe bari mu Misiri, akica Abanyamisiri, nyamara akarokora ingo zacu.’» Nuko imbaga irapfukama, barasenga.

²⁸Hanyuma Abayisraheli barataha, maze ibyo Uhoraho yari yategetse Musa na Aroni, byose babigenza uko yabibabwiye.

²⁹Igicuku rero kinishye, Uhoraho yica icyavutse uburiza cyose mu gihugu cya Misiri, guhera ku mfura ya Farawo yari kumusimbura ku ngoma kugeza ku mfura y’umunyururu uri mu buroko, no ku buriza bwose bw’amatungo.

³⁰Muri iryo joro, Farawo arabyuka kimwe n’abagaragu be bose n’Abanyamisiri bose; maze mu Misiri hose hacura imiborogo, kuko nta rugo na rumwe rutari rufite intumbi.

³¹Nuko Farawo ahamagaza Musa na Aroni nijoro, arababwira ati «Nimuhaguruke mugende, mumvire mu gihugu, mwebwe n’Abayisraheli banyu, mujye gutura ibitambo Uhoraho nk’uko mwabishakaga.

³²Mushorere kandi n’amatungo yanyu, amagufi n’amaremare, nk’uko mwabisabye, maze mugende! Ariko nanjye munsabire umugisha.»

³³Abanyamisiri bashushubikanya Abayisraheli ngo babavire mu gihugu ako kanya. Koko rero baravugaga bati «Twese tugiye gupfira gushira!»

³⁴Imbaga y’Abayisraheli ihagurukana icyanga cy’imigati kitaratangira gututumba; ibyibo babipfunyika mu bishura byabo, maze babiterera ku ntugu.

³⁵Abayisraheli bari bagenjeje uko Musa yari yababwiye: bari batiye Abanyamisiri ibintu bya feza, ibintu bya zahabu, n’imyambaro,

³⁶kuko Uhoraho yari yatumye Abanyamisiri borohera imbaga ye, maze babemerera ibyo babasabaga. Nuko basahura batyo Abanyamisiri!

³⁷Abayisraheli bahaguruka i Ramusesi berekeza i Sukoti; bagenda ari abagabo nk’ibihumbi magana atandatu[36], utabariyemo abagore n’abana.

³⁸Byongeye, hari ikivange cy’abantu b’impunzi baturutse hirya no hino, bazamukana na bo, hamwe n’amashyo yabo menshi y’intama n’inka.

³⁹Icyanga cy’imigati bari bavanye mu Misiri baracyotsa, kivamo udusheshe tw’imigati idasembuye, kuko cyari kitaraganya gututumba igihe birukanwaga mu Misiri hutihuti. Bagiye ubudatindiganya, ndetse badateguye n’impamba.

⁴⁰Abayisraheli bamaze imyaka magana ane na mirongo itatu mu Misiri.

⁴¹Iyo myaka yose imaze gushira, kuri uwo munsi nyine, imbaga y’Uhoraho yose isohoka mu gihugu cya Misiri.

⁴²Ryabaye ijoro ryo gutaramira Uhoraho igihe abavanye mu Misiri. Kuva ubwo, iryo joro nyine Abayisraheli barigenera Uhoraho, maze buri mwaka bakarikoramo igitaramo, uko ibihe bigenda bisimburana.

⁴³Uhoraho abwira Musa na Aroni, ati «Dore amabwiriza yerekeye Pasika: Nta munyamahanga uzayiryaho.

⁴⁴Umucakara wese uzaba yaraguzwe ifeza, uzabanze umugenye, maze abone kuyiryaho.

⁴⁵Naho umushyitsi n’umucanshuro, bo ntibazayiryeho.

⁴⁶Muzayirire mu nzu nyirizina. Ntihazagire inyama zayo musohokana hanze, kandi ntihazagire igufwa ryayo muvuna.

⁴⁷Imbaga yose ya Israheli izahimbaze Pasika.

⁴⁸Nihagira umusuhuke ucumbitse iwawe, agashaka na we guhimbaza Pasika yo gusingiza Uhoraho, bizaba ngombwa ko uwitwa umuhungu wese umukomokaho abanza kugenywa; hanyuma azemererwe kuyihimbaza, kuko noneho azaba abaye nk’umwenegihugu. Ariko nta n’umwe uzayiryaho atabanje kugenywa.

⁴⁹Itegeko rero rizaba rimwe ku muturage no ku musuhuke uzaba abatuyemo.»

⁵⁰Abayisraheli bose bakora uko Uhoraho yari yategetse Musa na Aroni; babigenza batyo.

⁵¹Nuko kuri uwo munsi nyine, Uhoraho avana Abayisraheli mu gihugu cya Misiri, akurikije imitwe baremye.