Read kinyarwanda Iyimukamisiri 23 Bible Online

Iyimukamisiri 23 - kinyarwanda bible

Iyimukamisiri 23

¹Ntugakwize impuha. Ntuzafashe umugiranabi, uhamya ibinyoma ngo umubere.

²Ntuzakurikire inzira ya ba nyamwinshi ngo ukore nabi, kandi ntuzabe umugabo mu rubanza ngo ubogamire kuri ba nyamwinshi banyuranya n’itegeko.

³Mu rubanza ntuzagire uwo ubera, n’ubwo yaba umukene.

⁴Nuhura n’inka y’umwanzi wawe cyangwa indogobe ye ibungera, ugomba kuyimugarurira.

⁵Nubona indogobe y’umuntu ukwanga urunuka yagwanye umuzigo wayo, uzirinde kuyitererana: uzayifashe kubyuka.

⁶Ntuzayobagize uburenganzira bw’umukene mu rubanza rwe.

⁷Uzitaze urubanza rw’amahugu. Ntuzice umuntu utacumuye n’intungane; kuko umugiranabi wese ntamwita umwere.

⁸Ntuzemere guhabwa ruswa, kuko ruswa ihuma amaso y’ababona ukuri, maze igatsindisha intungane mu rubanza.

⁹Ntuzakandamize umusuhuke; namwe muzi neza imibereho y’umusuhuke, kuko mwabaye abasuhuke mu gihugu cya Misiri.

¹⁰Mu myaka itandatu yose uzabibe imbuto mu mirima yawe, usarure ibyezemo.

¹¹Ariko mu mwaka wa karindwi, uzateme ibyezemo, ubirekere mu murima, kugira ngo abakene bo mu gihugu cyawe abe ari bo babirya, ibyo bashigaje biribwe n’inyamaswa zo mu gasozi; imizabibu yawe n’imizeti yawe, na byo uzabigenzereze utyo.

¹²Mu minsi itandatu uzakore imirimo wifuza, ariko ku munsi wa karindwi uzareke gukora, kugira ngo inka yawe n’indogobe yawe bibone na byo ikiruhuko, n’umuhungu w’umuja wawe cyangwa umusuhuke na bo bahumeke.

¹³[59] Muzitondere ibyo nababwiye byose: ntimuziyambaze izina ry’imana z’inyamahanga, ntihazagire n’uwumva muzivuga.

¹⁴Uzankorere umunsi mukuru gatatu mu mwaka.

¹⁵Mbere na mbere, uzubahirize iminsi mikuru y’imigati idasembuye. Mu minsi irindwi uzarye imigati idasembuye nk’uko nabitegetse; uzabigire mu gihe cyagenwe, mu kwezi kw’amahundo, kuko muri uko kwezi nyine ari bwo wasohotse mu Misiri. Kandi ntihazagire uhinguka amara masa imbere y’uruhanga rwanjye.

¹⁶Ubundi, uzatunganye umunsi mukuru w’Isarura, ari wo w’umuganura w’imirimo yawe, w’ibyo uzaba warateye mu mirima. Hanyuma uzatunganye umunsi mukuru w’Ihunika, mu ndunduro y’umwaka, igihe usarura mu mirima imyaka wejeje.

¹⁷Gatatu mu mwaka, ab’igitsinagabo bose bazahinguke imbere ya Nyagasani, Uhoraho.

¹⁸Ntuzanture igitambo cy’amaraso giherekejwe n’umugati usembuye, kandi ntuzabike ikinure cy’itungo untuye ngo kigeze mu gitondo.

¹⁹Uzazane mu Ngoro y’Uhoraho Imana yawe umuganura w’imbuto zeze mbere mu murima wawe. Ntuzateke umwana w’ihene mu mahenehene ya nyina.

²⁰Dore nohereje umumalayika imbere yawe, kugira ngo akurinde mu rugendo, maze azakwinjize mu gihugu naguteguriye.

²¹Witonde kandi wumve ijwi rye: ntuzamubere intumva, kuko atakwihanganira igicumuro cyawe, ubwo ambereye mu cyimbo.

²²Naho niwumva ijwi rye, ugakurikiza ibyo mvuze, nzaba umwanzi w’abanzi bawe, n’umubisha w’ababisha bawe.

²³Umumalayika wanjye azakugenda imbere, maze azakugeze mu gihugu cy’Abahemori, n’Abaheti, n’Abaperezi, n’Abakanahani, n’Abahivi n’Abayebuzi: abo nkazabatsemba.

²⁴Ntuzapfukame imbere y’imana zabo kandi ntuzaziyoboke; ntuzagenze uko bagenza, ahubwo uzasenye amashusho yazo kandi uhirike amabuye ashinze yazeguriwe.

²⁵Nimuyoboka Uhoraho Imana yanyu, ubwo azaha umugisha umugati wawe n’amazi yawe, kandi nzakurinda indwara.

²⁶Mu gihugu cyawe, nta mugore uzakuramo inda cyangwa uzaba ingumba; nzaguha kuramba iminsi myinshi.

²⁷Mu gihugu cyose uzahingukamo, nzakangaranya ab’aho, mbacemo igikuba, nuko abanzi bawe bose bazagutere umugongo baguhunga.

²⁸Nzohereza imbere yawe amavubi[60], yirukane kure yawe Abahivi, Abakanahani n’Abaheti, ndetse utaragera iwabo.

²⁹Nyamara sinzabirukana imbere yawe mu mwaka umwe, hato igihugu kidahinduka ikibira, maze inyamaswa z’ishyamba zikakigwiramo.

³⁰Nzabirukana buhoro buhoro, kugeza ubwo wororoka, maze ugashobora kwigarurira igihugu cyose.

³¹Nzagukebera igihugu guhera ku Nyanja y’Urufunzo kugeza ku Nyanja y’Abafilisiti, no guhera ku butayu kugeza ku Ruzi[61]. Nimara kukwegurira abaturage b’icyo gihugu, maze ukabanesha,

³²uramenye ntuzagirane amasezerano na bo, cyangwa n’imana zabo!

³³Ntibazongere gutura mu gihugu cyawe, hato batazabatera kuncumuraho; kuko wazayoboka imana zabo, maze bikaba byakubera umutego.»