Read kinyarwanda Iyimukamisiri 25 Bible Online

Iyimukamisiri 25 - kinyarwanda bible

Iyimukamisiri 25

¹[64] Uhoraho abwira Musa muri aya magambo, ati

²«Ubwire Abayisraheli banzanire umusanzu, muzakire ibyo umuntu wese azatangana umutima ukeye.

³Dore umusanzu bazaguha: ni zahabu, feza, imiringa,

⁴imyenda y’isine, iy’umuhemba, n’itukura; hariri inetereye, n’ubwoya bw’ihene;

⁵impu z’amapfizi y’intama zivanzemo ikigina, impu z’ibihura n’ibiti by’iminyinya;

⁶amavuta y’imizeti yo gucana mu itara, imibavu igenewe kuvangwa n’amavuta yo gusiga, n’imibavu yo gutwikwa;

⁷amoko yose y’amabuye y’agaciro yo gutaka ku mwenda w’umusanganyagihimba no ku mwenda w’umusesuragituza.

⁸Bazanyubakire Ingoro, maze nzature muri bo rwagati.

⁹Ngaho nkwereke igipimo cy’iyo ngoro, n’igipimo cy’ibintu bizayijyamo byose: muzabe ari ko mubikora.

¹⁰[65] Bazabaza ubushyinguro mu giti cy’umunyinya, bufite uburebure bw’imikono ibiri n’igice, umukono n’igice by’ubugari, n’umukono n’igice by’ubuhagarike.

¹¹Imbere n’inyuma uzomekeho zahabu iyunguruye, unabuzengurutseho umusozo wa zahabu.

¹²Uzashongeshe zahabu, uyikoremo ibifunga bine, ubishyire ku maguru yabwo ane; ibifunga bibiri mu ruhande rumwe n’ibindi bibiri mu rundi.

¹³Uzabaze imijishi mu giti cy’umunyinya, maze uyomekeho zahabu.

¹⁴Uzinjize iyo mijishi mu bifunga biri mu mpande z’ubushyinguro, ikazakoreshwa mu kubuheka.

¹⁵Imijishi izagume mu bifunga by’ubushyinguro, yekujya isohorokamo.

¹⁶Uzashyire mu bushyinguro urwibutso nzaguha.

¹⁷Uzakore urwicurizo[66] muri zahabu iyunguruye, rufite uburebure bw’imikono ibiri n’igice, n’umukono n’igice by’ubugari.

¹⁸Uzakore n’Abakerubimu[67] babiri muri zahabu, uzabacure muri zahabu itsitse, ku mitwe yombi y’urwicurizo.

¹⁹Abo Bakerubimu uzabashyire umwe ku ruhande rumwe, n’undi ku rundi; kandi bakozwe mu cyuma kimwe n’urwicurizo.

²⁰Abakerubimu bazagire amababa aramburiye hejuru, ku buryo urwicurizo barutwikiriza amababa yabo. Bazabe berekeranye, ku buryo uruhanga rwabo ruzaba rwunamiye ku rwicurizo.

²¹Uzashyire urwicurizo hejuru y’ubushyinguro, hanyuma ushyire mu bushyinguro urwibutso nzaguha.

²²Aho ngaho nzajya mpabonanira nawe, maze hejuru y’urwicurizo, hagati y’Abakerubimu bazaba bari hejuru y’ubushyinguro bw’urwibutso, nzahakubwirire ibyo ntegeka Abayisraheli byose.

²³Uzakore ameza mu giti cy’umunyinya, afite uburebure bw’imikono ibiri, umukono umwe mu bugari, n’umukono umwe n’igice mu buhagarike.

²⁴Uzayomekeho zahabu iyunguruye hanyuma uzayazengurutseho umusozo wa zahabu.

²⁵Hagati y’amaguru y’ameza uzatambikeho utubaho tungana no mu kiganza, maze utwo tubaho uzadutakeho zahabu.

²⁶Uzakore ibifunga bine bya zahabu, maze ubishyire ku nkokora enye zizaba ziri ku maguru ane y’ameza.

²⁷Ibifunga bizaba hafi y’utubaho dutambitse ku maguru, kugira ngo bishyirwemo imijishi bazakoresha baheka ameza.

²⁸Imijishi uzayikore mu biti by’iminyinya, maze uyomekeho zahabu, kugira ngo bayikoreshe baheka ameza.

²⁹Uzakore kandi amasahani yayo, imbehe zayo n’ibikopo byayo, n’udukombe twayo, byo gukoreshwa igihe cy’ibitambo biseswa; uzabikore muri zahabu iyunguruye.

³⁰Hejuru y’ameza uzateguraho imigati y’umumuriko, ihore imbere yanjye ubudahwema.

³¹Uzakore ikinyarumuri muri zahabu iyunguruye. Ibice byose by’icyo kinyarumuri bazabicure bifatanye: ikirenge n’uruti byacyo, hamwe n’amababi n’indabo bigitatse, byose bizabe bifatanye.

³²Amashami atandatu azashingira ku mpande: amashami atatu y’ikinyarumuri ku ruhande rumwe rwacyo, n’andi mashami atatu ku rundi ruhande rwacyo.

³³Kuri buri shami hazabe imitako ishushanya umubumburo w’ururabo. Bizagende bityo kuri ya mashami atandatu y’ikinyarumuri.

³⁴Uruti rw’ikinyarumuri ubwarwo ruzagire imitako ine ishushanya umubumburo w’ururabo.

³⁵Hazabe umutako mu nsi y’amashami abiri ya mbere ashingiye ku ruti rwacyo, n’umutako mu nsi y’amashami abiri akurikiyeho ashingiye kuri cyo, n’umutako mu nsi y’amashami abiri aheruka ashingiye kuri cyo. Bityo kuri ya mashami atandatu ashingiye ku kinyarumuri.

³⁶Ibice byose by’icyo kinyarumuri, ari amashami, ari imitako, byose bazabicure muri zahabu iyunguruye, bifatanye.

³⁷Uzakore amatara yacyo arindwi, maze uzayagishyireho ku buryo amurika imbere yacyo.

³⁸Ibikoresho bigenewe gutunganya ayo matara bizabe bikozwe muri zahabu iyunguruye.

³⁹Ikinyarumuri kizakorwe n’italenta[68] imwe ya zahabu iyunguruye, hamwe n’ibikoresho byacyo byose.

⁴⁰Itegereze, maze uzakore ukurikije urugero werekewe hejuru y’umusozi.