Read kinyarwanda Iyimukamisiri 26 Bible Online

Iyimukamisiri 26 - kinyarwanda bible

Iyimukamisiri 26

¹[69] Ingoro ubwayo izabe igizwe n’imyenda cumi. Iyo myenda izadodwe n’abahanga bazi gukoresha hariri inetereye, n’ubudodo bw’ubwoya bw’isine, bw’umuhemba, n’ubutukura, maze bazatakeho Abakerubimu.

²Buri mwenda uzareshya n’imikono makumyabiri n’umunani mu burebure, n’imikono ine mu bugari.

³Muri iyo myenda bazateranya itanu ukwayo, n’indi itanu bibe uko, ku buryo izahinduka imyenda ibiri, minini cyane.

⁴Hanyuma uzakore imikondo igizwe n’utugozi tw’ubwoya butukura busobekeranye.

⁵Uzashyire imikondo mirongo itanu ku ruhande rumwe rw’urufatane rwa mbere, uzabigenze utyo no ku rufatane rwa kabiri. Iyo mikondo igomba kuba iteganye.

⁶Byongeye, uzakore n’ibifunga mirongo itanu bya zahabu, ari byo uzafungisha imikondo ifatanya ya myenda yombi minini, bityo Ingoro izakomere ku mpande zose.

⁷Ubundi, uzakore n’indi myenda y’ubwoya bw’ihene, igenewe na yo gutwikira Ingoro nk’uko amahema ameze. Uzakoremo cumi n’umwe.

⁸Iyo myenda yose uko ari cumi n’umwe izaba ingana: imikono mirongo itatu mu burebure, n’imikono ine mu bugari.

⁹Muri iyo myenda bazateranya itanu ukwayo, n’indi itandatu ukwayo, ku buryo izahinduka na yo imyenda ibiri minini. Umwenda uheruka ugasaguka iyindi, uzanagana imbere y’umuryango w’ihema.

¹⁰Uzashyire imikondo mirongo itanu ku ruhande rw’urufatane rwa mbere, maze uzabigenze utyo no ku rufatane rwa kabiri.

¹¹Uzakore n’ibifungo mirongo itanu by’umuringa, ari byo uzafungisha imikondo irebana. Bityo ihema rizatwikirwe neza.

¹²Kuko iyo myenda igizwe n’ubwoya bw’ihene isumba iya mbere mu burebure, ibizasagukaho bizanagana inyuma y’Ingoro

¹³no mu mpande zayo zombi. Bityo ihema ryose rizasakarwe neza.

¹⁴Ndetse uzaryongereho n’impu z’amasekurume n’iz’ibihura.

¹⁵Uzashinge kandi n’inkuta z’imbaho zibajwe mu biti by’umunyinya, zigenewe gushyigikira Ingoro.

¹⁶Buri rubaho ruzagire uburebure bw’imikono cumi, n’ubugari bw’umukono umwe n’igice.

¹⁷Kandi izo mbaho uzazifatanye zibe indumane, ukoresheje inkwikiriro ebyiri zegeranye.

¹⁸Imbaho makumyabiri zifatanye zizashyigikira Ingoro mu ruhande rwerekera muri Negevu, mu majyepfo.

¹⁹Mu nsi ya buri rubaho uko ari makumyabiri, uzahashyire ibishyigikizo bibiri bya feza, byose hamwe bizabe mirongo ine.

²⁰No ku rundi ruhande, mu majyaruguru, uzahashyire imbaho makumyabiri;

²¹hamwe n’ibishyigikizo byazo mirongo ine bya feza: ibishyigikizo bibiri mu nsi y’urubaho rumwe, n’ibishyigikizo bibiri mu nsi y’urundi.

²²Naho mu ruhande rw’uburengerazuba, inyuma y’Ingoro, uzahashyire imbaho esheshatu.

²³No mu maguni y’Ingoro, uzahashyire imbaho ebyiri,

²⁴zirusha izindi gufatana kubera inkwikiriro zazo nyinshi.

²⁵Inyuma y’Ingoro rero hazabe imbaho munani, hamwe n’ibishyigikizo bibiri bya feza mu nsi ya buri rubaho; ibishyigikizo byose hamwe bizaba cumi na bitandatu.

²⁶Uzakore kandi imitambiko mu biti by’iminyinya, itanu igenewe imbaho z’uruhande rumwe rw’Ingoro,

²⁷n’imitambiko itanu igenewe imbaho z’urundi ruhande rw’Ingoro n’imitambiko itanu igenewe imbaho z’uruhande rw’inyuma y’Ingoro, aherekeye iburengerazuba.

²⁸Hazabe umutambiko umwe wambukiranya imbaho zose, kuva ku rwa mbere kugeza ku rwa nyuma, unyuze hagati yazo.

²⁹Imbaho uzazomekeho zahabu, n’ibifunga byazo bizanyuzwamo iyo mitambiko, uzabigire zahabu, maze n’imitambiko uzayomekeho zahabu.

³⁰Uzubake Ingoro ukurikije urugero werekewe hejuru y’umusozi.

³¹Uzakore umubambiko w’umwenda w’isine, n’umuhemba, n’umutuku, kandi wa hariri ihotoye; hanyuma bazatakeho Abakerubimu, byose bikozwe n’abahanga.

³²Uzawumanike ku nkingi enye z’ibiti by’umunyinya zometseho zahabu, zikabaho intendekero za zahabu, kandi zishinze mu bishyigikizo bine bya feza.

³³Uzashyire umubambiko mu nsi ya bya bifunga; maze aho ngaho inyuma y’umubambiko, azabe ari ho winjiza Ubushyinguro bw’Isezerano. Uwo mubambiko uzababere urugabano rw’Ingoro nyirizina no mu mbere yayo.

³⁴Uzashyire urwicurizo hejuru y’Ubushyinguro bw’Isezerano mu mbere y’Ingoro.

³⁵Utereke ameza hino y’umubambiko mu ruhande rw’amajyaruguru y’Ingoro. Naho ikinyarumuri uzagishyire ku ruhande rw’amajyepfo, ahateganye n’ameza.

³⁶Umuryango w’ihema uzawukorere uwundi mubambiko mu bwoya bw’isine, bw’umuhemba, n’ubw’umutuku, na hariri ihotoye, byose bizakorwe n’umudozi w’umuhanga.

³⁷Uwo mubambiko uzawukorere inkingi eshanu z’ibiti by’iminyinya, maze uzazomekeho zahabu; zizagire intendekero za zahabu, kandi uzacure ibishyigikizo bitanu by’umuringa bizashyirwa mu nsi y’izo nkingi.