Read kinyarwanda Iyimukamisiri 27 Bible Online

Iyimukamisiri 27 - kinyarwanda bible

Iyimukamisiri 27

¹Uzubake urutambiro mu biti by’iminyinya, rufite uburebure bw’imikono itanu, n’ubugari bw’imikono itanu. Urutambiro ruzabe rufite impande zireshya, rugire n’ubuhagarike bw’imikono itatu.

²Ku nguni zarwo uko ari enye, uzahubake amahembe[70]. Ayo mahembe azakorwe mu giti gifatanye n’urutambiro, maze uzayomekeho icyuma cy’umuringa.

³Urutambiro uzarukorere ibyungo byo gukuburiramo ivu ryarwo, ibidahuzo byarwo, ibisukirizo byarwo, n’ibirahuzwa amakara byarwo, byose uzabikore mu cyuma cy’umuringa.

⁴Urutambiro uzarukorere uruzitiro mu twuma tw’umuringa, dushandikiranyije nk’urushundura, maze urwo rushundura uzarushyireho ibifunga bine by’umuringa ku mfuruka zarwo enye.

⁵Urwo ruzitiro ruzazenguruka urutambiro, ruhereye hasi rukageza mu cya kabiri cy’ubujyejuru bwarwo.

⁶Uzakorere urutambiro imijishi mu giti cy’umunyinya, uyomekeho icyuma cy’umuringa.

⁷Bazinjize iyo mijishi mu bifunga, maze izajye ihora mu mpande z’urutambiro igihe bazajya baruheka.

⁸Uzarukore mu mbaho, urugire umurangara mu nda, nk’uko wabyerekewe hejuru y’umusozi.

⁹Uzubake kandi urugo ruzengurutse Ingoro. Mu ruhande rw’amajyepfo yayo, urugo ruzakingirizwe n’imibambiko ya hariri ihotoye, ku burebure bw’imikono ijana.

¹⁰Iyo mibambiko izafatwe n’inkingi makumyabiri, zifite ibishyigikizo makumyabiri by’icyuma cy’umuringa; intendekero zo ku nkingi n’ibifunga byazo, bizabe bikozwe muri feza.

¹¹Bityo kandi, mu cyerekezo cy’amajyaruguru, hazabe imibambiko ku burebure bw’imikono ijana, ifatwe n’inkingi makumyabiri, n’ibishyigikizo makumyabiri by’icyuma cy’umuringa; intendekero zo ku nkingi n’ibifunga byazo, bizabe bikozwe muri feza.

¹²Mu ruhande rw’iburengerazuba, ku bugari bw’urugo, hazabe imibambiko y’imikono mirongo itanu, ifatwe n’inkingi cumi, n’ibishyigikizo cumi byazo.

¹³Mu ruhande rw’iburasirazuba, urugo ruzagire ubugari bw’imikono mirongo itanu,

¹⁴kandi mu ruhande rumwe hazabe imibambiko y’imikono cumi n’itanu, ifatwe n’inkingi eshatu, n’ibishyigikizo bitatu byazo.

¹⁵Mu rundi ruhande naho hazabe imibambiko y’imikono cumi n’itanu mu ruhande rwa kabiri, ifatwe n’inkingi eshatu, n’ibishyigikizo bitatu byazo.

¹⁶Naho irembo ry’urugo rizakingishwe umwenda w’imikono makumyabiri, ukozwe mu bwoya bw’isine, bw’umuhemba, n’ubutukura, na hariri ihotoye, byaboshywe n’umudozi w’umuhanga, ufatwe n’inkingi enye, n’ibishyigikizo bine byazo.

¹⁷Inkingi zose zizengurutse urugo zizafatanishwe imbariro za feza, zigire n’intendekero za feza, n’ibishyigikizo by’umuringa.

¹⁸Uburebure bw’urugo buzabe imikono ijana impande zombi, ubugari bwarwo buzabe imikono mirongo itanu impande zombi, n’ubuhagarike bw’urugo buzabe imikono itanu.

¹⁹Ibikoresho byose bigenewe imirimo y’Ingoro, inkingi zayo zose n’inkingi zose z’urugo, bizabe mu cyuma cy’umuringa.

²⁰Uzabwire na none Abayisraheli bakuzanire amavuta arongoroye y’imizeti isekuye, agenewe itara.

²¹Hahore iteka itara ryaka mu ihema ry’ibonaniro. Aroni n’abahungu be bazaryiteho ku buryo rimurika kuva ku mugoroba kugeza mu gitondo imbere y’Uhoraho. Ni itegeko ridakuka mu Bayisraheli, uko ibihe bigenda bisimburana.