Read kinyarwanda Iyimukamisiri 28 Bible Online

Iyimukamisiri 28 - kinyarwanda bible

Iyimukamisiri 28

¹Ikindi kandi, wigize hafi yawe Aroni umuvandimwe wawe, kugira ngo abe umuherezabitambo wanjye; unahamagare mu Bayisraheli abahungu ba Aroni, ari bo Nadabu, Abihu, Eleyazari na Itamari.

²Umuvandimwe wawe Aroni, umudodeshereze imyambaro y’ubuherezabitambo imuhesha ikuzo n’icyubahiro.

³Uzabwire rero abadozi b’abahanga, abo nahaye ububasha bukomeye, maze bazadodere Aroni imyambaro imugenewe, kugira ngo abe intore ntagatifu, ashingwe umurimo w’ubuherezabitambo bwanjye.

⁴Dore imyambaro bazakora: umusesuragituza, umusanganyagihimba, igishura, ikanzu itatse, igitambaro batamiriza, n’umukandara. Iyo myambaro mitagatifu bazayikorere Aroni umuvandimwe wawe, n’abahungu be, kugira ngo babe abaherezabitambo banjye.

⁵Bazabikore muri zahabu, mu bwoya bw’isine, bw’umuhemba, n’ubutukura, na hariri inetereye.

⁶Umusanganyagihimba bazawukoreshe zahabu, ubwoya bw’isine, bw’umuhemba n’ubutukura, na hariri ihotoye: uzadodwe n’umuhanga.

⁷Uwo mwambaro uzafatwe n’imishumi ibiri iteye ku mitwe yawo yombi.

⁸Umukandara wo kuwukenyeza na wo uzakorwe muri zahabu, ubwoya bw’isine, bw’umuhemba, n’ubutukura, na hariri ihotoye.

⁹Uzende amabuye abiri y’imboneranyi, maze uyandikeho amazina y’abana ba Israheli:

¹⁰uzandike amazina atandatu ku ibuye rya mbere, yandi atandatu asigaye ku ibuye rya kabiri, uko bakurikirana mu mavuka yabo.

¹¹Umubaji w’amabuye, uzi gucura za kashe, azabe ari we usharaga amazina y’abana ba Israheli kuri ayo mabuye yombi, maze uyafungire mu tugotesho twa zahabu.

¹²Uzashyire ayo mabuye yombi ku mishumi y’intugu ifata umusanganyagihimba, kugira ngo mujye mwibuka iteka abana ba Israheli. Bityo Aroni ajye ajyana amazina yabo ho urwibutso ku ntugu ze, imbere y’Uhoraho.

¹³Umaze gukora utwo tugotesho twa zahabu,

¹⁴uzanakore imikufi ibiri ya zahabu iyunguruye, kandi yacuranywe ubuhanga, maze azabe ari yo uzatakisha utwo tugotesho.

¹⁵[71] Uzakore umusesuragituza ugenewe kumara impaka, ukorwe n’abahanga, bawutake kimwe n’umusanganyagihimba. Uzawukoreshe zahabu, ubwoya bw’isine, bw’umuhemba, n’ubutukura, na hariri ihotoye.

¹⁶Uzamere nk’uruhago rufite impande zireshya; uburebure bwawo buzabe igice cy’umukono, n’ubugari bwawo bube igice cy’umukono.

¹⁷Uzawutakeho imisitari ine y’amabuye y’agaciro. Mu musitari wa mbere hashyirwe isarudoni, itopazi na emerodi[72].

¹⁸Mu musitari wa kabiri hashyirwe malakita, isafiri na diyama.

¹⁹Mu musitari wa gatatu hashyirwe opali, agate na emetista.

²⁰Mu musitari wa kane hashyirwe: ikrizoliti, imboneranyi na jasipi. Ayo mabuye azabe afungiye mu tugotesho twa zahabu.

²¹Amabuye azahwane n’amazina y’abana ba Israheli; azabe cumi n’abiri nk’amazina yabo bazayasharage nka za kashe, maze buri buye rizagire izina ryaryo, rimwe mu mazina y’imiryango cumi n’ibiri.

²²Umusesuragituza uzawukorere imikufi ya zahabu iyunguruye, iboshye nk’utuziriko.

²³Uzanakorere umusesuragituza ibifunga bibiri bya zahabu, maze uzashyire bya bifunga byombi ku mitwe yombi y’umusesuragituza.

²⁴Uzafunge ya mikufi ibiri ya zahabu mu bifunga byombi, ku mitwe yombi y’umusesuragituza:

²⁵maze uzapfundike imisozo yombi y’imikufi mu tugotesho twombi dutatse imishumi y’intugu y’umusanganyagihimba, ahareba imbere.

²⁶Uzakore n’ibindi bifunga bibiri bya zahabu; uzabishyire ku mitwe yombi yo hepfo y’umusesuragituza, ku ruhande rukora ku musanganyagihimba.

²⁷Uzongere ukore ibifunga bibiri bya zahabu; uzabishyire mu nsi y’imishumi yombi y’intugu y’umusanganyagihimba, aherekera imbere hejuru y’umukandara.

²⁸Umusesuragituza bazawupfundikishe ibyo bifunga ku bifunga by’umusanganyagituza bacishijemo injishi y’isine, kugira ngo ube hejuru y’umukandara wo ku musanganyagituza, maze umusesuragituza wekuzashobora gutandukana n’umusanganyagihimba.

²⁹Aroni rero igihe azinjira mu Ngoro nyirizina, azajye ajyana ku mutima we amazina y’abana ba Israheli, ku musesuragituza ugenewe gukemura impaka, bibe urwibutso rw’iteka imbere y’Uhoraho.

³⁰Kandi mu musesuragituza, uzashyiremo Urimu na Tumimu[73], maze bizahore ku mutima wa Aroni, igihe azajya ahinguka imbere y’Uhoraho. Bityo, Aroni azahorane iteka ku mutima we ubucamanza bw’abana ba Israheli.

³¹Uzakore igishura cy’umusanganyagituza mu bwoya bw’isine bwihariye.

³²Muri cyo rwagati, hazabemo umwenge banyuzamo umutwe, kandi uwo mwenge uzazengurukwe n’umusozo w’umubohano, nk’umuguno w’ikoti ry’intambara, kugira ngo igishura kitazatanyuka.

³³Ku musozo wo hasi uzashyireho amapfundo y’ubwoya bw’isine, bw’umuhemba, n’ubutukura, kandi uzongereho n’amayugi ya zahabu awuzengurutse.

³⁴Impande zose ku musozo wo hasi y’igishura, iyugi rya zahabu rizakurikirane n’ipfundo ry’umuhemba, bityo bityo.

³⁵Aroni azajye acyambarira gukora umurimo w’Uhoraho, maze bajye bamwumva ajegeza amayugi igihe azaba yinjiye mu Ngoro nyirizina imbere y’Uhoraho, n’igihe azasohokamo, bityo nta bwo azapfa.

³⁶Kandi uzakore n’ikamba rya zahabu iyunguruye, ritatswe n’ururabo imbere, maze uzasharageho aya magambo uti «Uweguriwe Uhoraho.»

³⁷Uzarifungishe umushumi w’isine, uzabe ku gitambaro cyo mu mutwe. Uwo mutako ugomba kuba imbere ku gitambaro cyo mu mutwe.

³⁸Uzahore mu ruhanga rwa Aroni, kugira ngo yigerekeho ibyaha byakozwe n’Abayisraheli mu bintu bitagatifu: uzahore iteka mu ruhanga rwe kugira ngo babone ubutoni imbere y’Uhoraho.

³⁹Hanyuma, uzadodeshe ikanzu mu budodo bwa hariri inetereye, kandi ukore n’igitambaro cyo mu mutwe, n’umukandara; byose bizakorwe n’umuhanga uzi gutaka.

⁴⁰Abahungu ba Aroni na bo uzabakorere amakanzu n’imikandara, ubakorere n’ingofero zibahesha ikuzo n’icyubahiro.

⁴¹Iyo myambaro yose uzayambike Aroni umuvandimwe wawe, hamwe n’abahungu be. Uzabasige amavuta, maze ubahe ububasha bwo gutunganya imihango mitagatifu; uzabanyegurira, babe abaherezabitambo banjye.

⁴²Uzabakorere amakabutura ya hariri kugira ngo boye kwambara ubusa; azahera mu rukenyerero kugeza ku bibero.

⁴³Aroni n’abahungu be bazajya bayambara igihe bazaba binjiye mu ihema ry’ibonaniro, cyangwa igihe bagiye ku rutambiro gukora imirimo yo mu Ngoro nyirizina, kugira ngo batazikururira igicumuro maze bagapfa. Iryo tegeko ni indakuka, kuri we no ku bazamukomokaho.