Read kinyarwanda Iyimukamisiri 31 Bible Online

Iyimukamisiri 31 - kinyarwanda bible

Iyimukamisiri 31

¹Uhoraho abwira Musa, ati

²«Dore mpamagaye mu izina rye Besaleli, mwene Uri, umwuzukuru wa Huri, wo mu nzu ya Yuda.

³Namwujujemo umwuka w’Imana, maze muha ubuhanga, ubwenge n’ubumenyi bw’imyuga iyo ari yo yose,

⁴kugira ngo ahimbe ibikoresho by’agaciro, bicuzwe muri zahabu, feza, n’umuringa;

⁵kandi aconge amabuye y’indobanure, abaze ibiti, anatunganye imirimo iyo ari yo yose.

⁶Kandi dore nashyize Oholiyabu, mwene Ahisamaki wo mu nzu ya Dani, hamwe na we. Umutima wa buri muhanzi nawushyizemo ubuhanga, kugira ngo bazakore ibyo nagutegetse byose:

⁷ihema ry’ibonaniro n’ubushyinguro bw’Isezerano, urwicurizo ruri hejuru yabwo, n’ibintu byose byo mu ihema,

⁸nk’ameza n’ibikoresho byayo, ikinyarumuri cya zahabu iyunguruye n’ibigendana na cyo byose, kimwe n’urutambiro rw’imibavu,

⁹urutambiro rw’ibitambo bitwikwa n’ibikoresho byarwo byose, igikarabiro n’urugata rwacyo,

¹⁰imyambaro y’imihango n’imyambaro mitagatifu ya Aroni umuherezabitambo, kimwe n’imyambaro abahungu be bambara bakora iby’ubuherezabitambo,

¹¹amavuta yo gusiga n’imibavu ihumura igenewe Ingoro. Ibyo byose bazabirangize bakurikije ayo mabwiriza yose naguhaye.»

¹²Uhoraho abwira Musa aya magambo, ati

¹³«Ubwire Abayisraheli, uti ’Muzubahirize amasabato yanjye mubishishikariye, kuko ari cyo kimenyetso nashyize hagati yanjye namwe, uko ibisekuru byanyu bikurikirana, kugira ngo bamenye ko ari jye Uhoraho ubatagatifuza.

¹⁴Muzakurikize rero isabato, kuko ari umunsi mutagatifu kuri mwe. Utazayubahiriza wese, azicwe.’ Umuntu wese uzakora umurimo kuri uwo munsi, azacibwe mu bo bava inda imwe.

¹⁵Mu minsi itandatu bazajye bakora imirimo, maze umunsi wa karindwi ube uw’ikiruhuko cy’isabato, umunsi mutagatifu wagenewe Uhoraho. Umuntu wese uzakora umurimo ku munsi w’isabato, azicwe.

¹⁶Abayisraheli bazakurikize rero isabato, maze isabato izababere Isezerano ry’indahinduka kuva mu gisekuru kujya mu kindi.

¹⁷Ni ikimenyetso kizahoraho iteka ryose hagati yanjye n’Abayisraheli, kuko Uhoraho yaremye ijuru n’isi mu minsi itandatu, ariko ku munsi wa karindwi agahagarika imirimo, akaruhuka.»

¹⁸Uhoraho amaze kuvuganira na Musa ku musozi wa Sinayi, amuha ibimanyu bibiri by’amabuye y’urwibutso rw’Isezerano. Ayo mabuye yari abaje, kandi yandikishijweho urutoki rw’Imana.