Read kinyarwanda Iyimukamisiri 35 Bible Online

Iyimukamisiri 35 - kinyarwanda bible

Iyimukamisiri 35

¹[82] Musa ahamagaza imbaga yose y’Abayisraheli, arababwira ati «Nimwumve ibyo Uhoraho abategetse kujya mukora.

²Mu minsi itandatu muzakore imirimo, naho umunsi wa karindwi uzababere isabato ntagatifu, umunsi w’ikiruhuko weguriwe Uhoraho. Umuntu wese uzakora kuri uwo munsi azicwa.

³Ntimuzacana umuriro mu nzu yanyu n’imwe ku munsi w’isabato.»

⁴Musa abwira ikoraniro ryose ry’Abayisraheli aya magambo, ati «Nimwumve icyo Uhoraho yategetse.

⁵Nimugabanye ku bintu byanyu ituro ry’Uhoraho. Umuntu wese w’umutima utagundira azazanira Uhoraho imfashanyo ye: zahabu, na feza, n’umuringa,

⁶imyenda y’isine, n’iy’umuhemba, n’itukura, hariri inetereye, n’ubwoya bw’ihene,

⁷impu z’amapfizi y’intama zirabyemo ikigina, n’impu z’ibihura, n’ibiti by’iminyinya,

⁸n’amavuta y’imizeti yo gucana itara, imibavu igenewe kuvangwa n’amavuta yo gusiga, n’imibavu yo gutwika;

⁹amabuye y’agaciro, n’amabuye yo gutaka ku musanganyagihimba no ku musesuragituza.

¹⁰N’abakozi banyu bose b’abahanga nibaze, maze barangize icyo Uhoraho yategetse.

¹¹Ibyo ni Ingoro n’ihema ryayo, umutwikiro waryo, ibifunga byaryo, imbaho zaryo, imitambiko yaryo, imiganda yaryo, n’ibishyigikizo byaryo;

¹²ubushyinguro n’imijishi yabwo, urwicurizo n’umubambiko ubikingiye;

¹³ameza hamwe n’imijishi yayo n’ibikoresho byayo byose, hamwe n’imigati y’umumuriko;

¹⁴ikinyarumuri cyo kumurika, hamwe n’ibikoresho byacyo, amatara yacyo n’amavuta y’imizeti akigenewe;

¹⁵urutambiro rw’imibavu n’imijishi; amavuta yo gusiga n’imibavu yo gutwika; umubambiko ukinze ku muryango w’Ingoro;

¹⁶urutambiro rw’ibitambo bitwikwa n’uruzitiro rwarwo rw’umuringa, imijishi yarwo n’ibikoresho byarwo byose; igikarabiro n’urugata rwacyo;

¹⁷imibambiko ikingiye urugo, inkingi zayo, ibishyigikizo byayo, n’umubambiko ukingiye irembo ry’urugo rw’Ingoro;

¹⁸imiganda y’Ingoro, imiganda y’inkike z’Ingoro hamwe n’ibiziriko byazo;

¹⁹imyambaro y’ibirori igenewe imihango mu Ngoro, imyambaro mitagatifu y’umuherezabitambo Aroni, n’imyambaro abahungu be bazambara batunganya imirimo y’ubuherezabitambo.»

²⁰Nuko ikoraniro ryose ry’Abayisraheli rimaze kuva iruhande rwa Musa,

²¹ab’umutima ukeye kandi wuzuye ubuntu bose baraza, batanga umusanzu w’Uhoraho mu bwubatsi bw’ihema ry’ibonaniro, n’imirimo yaryo yose, n’imyambaro mitagatifu.

²²Haza abagabo kimwe n’abagore; ab’umutima ugira ubuntu bazana amaherena, n’impeta, n’inigi, n’ibintu bya zahabu by’amoko yose, maze buri muntu wabituraga Uhoraho, akabimuhereza nk’uko batura zahabu.

²³Bazana n’ibindi bafite imuhira: imyenda y’isine, n’iy’umuhemba n’itukura, hariri inetereye, n’ubwoya bw’ihene, impu z’amapfizi y’intama zirabyemo ikigina, n’impu z’ibihura.

²⁴Abari bateganyije bose ituro rya feza n’umuringa, babizanira Uhoraho. Abari bafite imuhira ibiti by’iminyinya bigenewe imirimo yose y’ubwubatsi, barabizana.

²⁵Abagore bose bari bafite ubuhanga bwo gukaraga ubudodo, barabuboha, barabuzana: ubw’isine, n’ubw’umuhemba n’ubw’umutuku, n’ubwa hariri inetereye.

²⁶Abagore bose bari babifitiye ubuhanga, bakaraga ubwoya bw’ihene.

²⁷Abatware b’imiryango bazana amabuye y’agaciro, n’amabuye yo gutaka ku musanganyagihimba no mu musesuragituza,

²⁸bazana imibavu n’amavuta y’imizeti bigenewe amatara, amavuta yo gusiga n’imibavu yo gutwika.

²⁹Mbese Abayisraheli bose, ari abagabo ari n’abagore, bafite umutima ukeye, bazanira Uhoraho amaturo bigeneye, kugira ngo batunganye imirimo yose Uhoraho yari yabategetse abitumye Musa.

³⁰Nyuma Musa abwira Abayisraheli, ati «Nimurebe, Uhoraho yihamagariye mu izina Besaleli mwene Uri, umwuzukuru wa Huri, wo mu nzu ya Yuda.

³¹Yamwujujemo umwuka w’Imana, kandi yamuhaye ubuhanga, ubwenge, n’ubumenyi bw’imyuga iyo ari yo yose,

³²kugira ngo ahimbe ibikoresho by’agaciro, bicuzwe muri zahabu, feza n’umuringa;

³³kugira ngo aconge amabuye y’indobanure, abaze ibiti, anatunganye imirimo iyo ari yo yose.

³⁴Yashyize kandi mu mutima we ingabire yo kubyigisha, nk’uko yayihaye na Oholiyabu mwene Ahisamaki, wo mu nzu ya Dani.

³⁵Bombi yabujujemo ubwenge bwo gukora imirimo yose yo gusharaga, gushushanya, gutaka amabara ku myenda y’isine, y’umuhemba n’itukura, kuri hariri inetereye, no kuboha imyenda; mbese gutunganya amoko yose y’imirimo no guhimba ibikorwa by’ubwenge.