Read kinyarwanda Iyimukamisiri 36 Bible Online

Iyimukamisiri 36 - kinyarwanda bible

Iyimukamisiri 36

¹Besaleli, Oholiyabu, n’abantu bose b’abanyabwenge, abo Uhoraho yashyizemo ubwenge n’ubuhanga bwo gutunganya imirimo yose igenewe imihango y’Ingoro, bazabirangize uko Uhoraho yabitegetse.»

²Musa ahamagaza Besaleli, na Oholiyabu, n’abantu bose b’abanyabwenge, abo Uhoraho yashyize ubwenge mu mutima; bashishikarira uwo murimo ngo bawurangize.

³Musa abaha amaturo yose Abayisraheli bari barazaniye gutunganya imirimo y’ubwubatsi bw’Ingoro kandi buri gitondo imbaga igakomeza kuzanira Musa amaturo yishakiye.

⁴Nuko abo bahanga bakoraga imirimo y’Ingoro, bahagarika akazi bari bashishikariye, buri wese aza kubwira Musa, ati

⁵«Imbaga iratura ibirengeje kure ibya ngombwa bigenewe kurangiza imirimo Uhoraho yategetse gukora!»

⁶Musa atanga itegeko, maze batangaza mu ngando hose ngo «Ntihagire umuntu, ari umugabo ari umugore, wongera guhihibikanira iby’amaturo y’Ingoro.» Nuko bahagarika rubanda,

⁷kuko ibyo bari bazanye byari bihagije ku mirimo yose yagombaga gukorwa, ndetse binarengejeho.

⁸Nuko abakozi bose barushaga abandi ubuhanga bashinga Ingoro. Bategura imyenda cumi muri hariri ihotoye, no mu bwoya bw’isine, bw’umuhemba n’ubutukura, hamwe n’Abakerubimu batatseho.

⁹Uburebure bw’umwenda bwari imikono makumyabiri n’umunani. Ubugari bw’umwenda bukaba imikono ine. Imyenda yose yaraeshyaga.

¹⁰Bafatanya itanu muri iyo myenda, umwe ku wundi; bafatanya n’iyindi itanu umwe ku wundi.

¹¹Bashyira utugozi tw’umuhemba w’ibihogo ku muguno w’umwenda waherukaga urufatane rwa mbere; babigenza batyo no ku mwenda wabanzirizaga urufatane rwa kabiri.

¹²Bapfundika utugozi mirongo itanu ku mwenda waherukaga urufatane rwa mbere; bapfundika n’utugozi mirongo itanu ku mwenda wabanzirizaga urufatane rwa kabiri, maze utwo tugozi tukagenda dutegana, kamwe ku kandi.

¹³Bakora ibifungo mirongo itanu bya zahabu bafungisha urufatane rwa mbere ku rundi, bityo Ingoro irakomera ku mpande zose.

¹⁴Bakora kandi n’indi myenda y’ubwoya bw’ihene, maze bayitwikiriza Ingoro, nk’uko amahema amera; bakora bene iyo myenda cumi n’umwe.

¹⁵Uburebure bw’umwenda bwari imikono mirongo itatu, n’ubugari bw’umwenda bukaba imikono ine. Iyo myenda cumi n’umwe yarareshyaga.

¹⁶Muri iyo myenda bateranya itanu ukwayo, n’indi itandatu ukwayo, (ku buryo na yo ihinduka ibifatane bibiri).

¹⁷Bashyira utugozi mirongo itanu ku musozo w’umwenda waherukaga urufatane rumwe; bashyira kandi utugozi mirongo itanu ku musozo w’umwenda wabanzirizaga urufatane rwa kabiri.

¹⁸Bakora n’ibifungo mirongo itanu by’umuringa byo gufungisha ibyo bifatane byombi. Bityo ihema ryose rikaba risakawe neza.

¹⁹Byongeye ihema barikorera umutwikiro w’impu z’amapfizi y’intama zirabyemo ikigina, barikorera n’umutwikiro w’impu z’ibihura wo kugereka hejuru.

²⁰Ingoro kandi bayikorera inkuta z’imbaho mu biti by’iminyinya zishinze impagarike.

²¹Uburebure bw’urubaho bwari imikono cumi, n’ubugari bw’urubaho bwari umukono umwe n’igice.

²²Kuri buri rubaho hari inkwikiriro ebyiri zifatanye rumwe ku rundi. Babigenza batyo ku mbaho zose z’Ingoro.

²³Bategurira Ingoro imbaho makumyabiri ku ruhande rw’amajyepfo.

²⁴Mu nsi y’izo mbaho makumyabiri, bahashyira ibishyigikizo mirongo ine bya feza, ibishyigikizo bi biri mu nsi ya buri rubaho, bigenewe inkwikiriro zarwo zombi.

²⁵Ku ruhande rwa kabiri rw’Ingoro rwerekeye amajyaruguru, bahategura imbaho makumyabiri,

²⁶kimwe n’ibishyigikizo byazo mirongo ine bya feza, ibishyigikizo bibiri mu nsi ya buri rubaho.

²⁷N’urukuta rw’inyuma y’Ingoro barutegurira imbaho esheshatu, aherekeye iburengerazuba;

²⁸bategura n’imbaho ebyiri zigenewe inguni z’inyuma y’Ingoro.

²⁹Izo zarushaga izindi gufatana kubera inkwikiriro zazo nyinshi.

³⁰Bityo hari imbaho munani kumwe n’ibishyigikizo byazo bya feza, ibishyigikizo cumi na bitandatu, ibishyigikizo bibiri mu nsi ya buri rubaho.

³¹Bakora n’imitambiko mu biti by’iminyinya: itanu igenewe imbaho o ku ruhande rwa mbere rw’Ingoro,

³²itanu igenewe imbaho zo ku ruhande rwa kabiri rw’Ingoro, n’indi itanu igenewe imbaho z’inyuma y’Ingoro aherekeye iburengerazuba.

³³Bategura umutambiko umwe wambukiranyaga imbaho, kuva ku rwa mbere kugeza ku rwa nyuma, unyuze hagati yazo.

³⁴Imbaho bazomekaho zahabu, n’ibifunga byazo bigenewe gushyirwamo imitambiko babikora muri zahabu, kandi n’imitambiko bayomekaho zahabu.

³⁵Bakora umubambiko mu bwoya bw’isine, bw’umuhemba n’ubw’umutuku, no muri hariri ihotoye; maze batakaho n’Abakerubimu.

³⁶Bawubariza inkingi enye z’umunyinya zometseho zahabu, n’intendekero zazo za zahabu; bazicurira ibishyigikizo bine bya feza.

³⁷Umuryango w’ihema bawudodera uwundi mubambiko watatswe n’umuhanga mu bwoya bw’isine, n’ubw’umuhemba, n’ubw’umutuku, no muri hariri ihotoye.

³⁸Uwo mubambiko bawukorera inkingi eshanu, n’intendekero zazo, n’amasonga yazo, n’ibifunga byazo, maze babyomekaho zahabu. Ibishyigikizo byazo bitanu byari bikozwe mu muringa.