Read kinyarwanda Iyimukamisiri 39 Bible Online

Iyimukamisiri 39 - kinyarwanda bible

Iyimukamisiri 39

¹Badoda imyambaro mu bwoya bw’isine, bw’umuhemba n’ubutukura, igenewe imihango yo mu Ngoro; maze bakorera Aroni imyambaro mitagatifu, nk’uko Uhoraho yari yarabitegetse Musa.

²Bakora umusanganyagihimba muri zahabu, mu bwoya bw’isine, bw’umuhemba n’ubutukura no muri hariri ihotoye.

³Zahabu bayihwahuza inyundo, maze bayisaturamo udukwege two gusobekeranya n’indodo z’isine, z’umuhemba, n’izitukura, na hariri inetereye: bikorwa n’umuhanga.

⁴Bakora n’imishumi ibiri iteye ku mitwe yombi y’umusanganyagihimba igenewe kuwufatisha ku ntugu.

⁵Umukandara wawo uciye hejuru, byari bidoze kimwe: muri zahabu, mu bwoya bw’isine, bw’umuhemba, n’ubutukura, no muri hariri ihotoye, nk’uko Uhoraho yari yarabitegetse Musa.

⁶Batunganya amabuye y’agaciro, afungiye mu tugotesho twa zahabu, bayasharagamo amazina y’abana ba Israheli, nk’uko basharaga za kashe.

⁷Bashyira ayo mabuye ku mishumi y’intugu ifata umusanganyagihimba, kugira ngo ajye ababera iteka urwibutso rw’abana ba Israheli nk’uko Uhoraho yari yarabitegetse Musa.

⁸Hanyuma bakora umusesuragituza wahimbanywe ubuhanga, ukorwa kimwe n’umusanganyagituza muri zahabu, mu bwoya bw’isine, bw’umuhemba n’ubutukura, no muri hariri ihotoye.

⁹Wari ufite impande zireshya, kandi umeze nk’uruhago. Uburebure bwawo bwari igice cy’umukono, n’ubugari bwawo ari igice cy’umukono; wari inkubirane.

¹⁰Bawutakaho imisitari ine y’amabuye. Umusitari wa mbere wariho isarudoni, itopazi, na emerodi;

¹¹umusitari wa kabiri wariho malakita, isafiri na diyama;

¹²umusitari wa gatatu wariho opali, agate, na emetisita;

¹³umusitari wa kane wariho ikirizoliti, imboneranyi, na jasipi. Ayo mabuye yari mu tugotesho twa zahabu twari tuyafunze.

¹⁴Amabuye yari ahwanye n’amazina y’abana ba Israheli uko ari cumi na babiri. Yari asharazwe nko muri kashe, buri buye rifite izina ryaryo, rimwe mu mazina y’imiryango cumi n’ibiri.

¹⁵Umusesuragituza bawucurira imikufi ya zahabu iyunguruye iboshye nk’utuziriko.

¹⁶Bakora utugotesho tubiri twa zahabu n’ibifunga bibiri bya zahabu, maze ibyo bifunga byombi babishyira mu mitwe yombi y’umusesuragituza.

¹⁷Imitwe ya ya mikufi ibiri ya zahabu bayinjiza mu tugotesho twombi.

¹⁸Nuko babishyira hejuru y’imishumi y’intugu z’umusanganyagihimba, ahareba imbere.

¹⁹Bakora ibifunga bibiri bya zahabu, babishyira mu nsi y’imishumi y’intugu y’umusesuragituza, ku ruhande rukora ku musanganyagihimba.

²⁰Barongera bakora ibifunga bibiri bya zahabu, ahareba imbere, hafi y’ipfundikiro ryawo, hejuru y’umukandara w’umusanganyagihimba.

²¹Umusesuragituza bawupfundikisha ibifunga byawo ku bifunga by’umusanganyagihimba, bacishijemo injishi y’umuhemba w’ibihogo, ku buryo umusesuragituza uba hejuru y’umukandara w’umusanganyagihimba. Bityo umusesuragituza ntiwashoboraga kwitandukanyan’umusanganyagihimba, uko Uhoraho yari yarabitegetse Musa.

²²Bakora igishura cy’umusanganyagituza, gikozwe n’umuboshyi kikaba umuhemba w’ibihogo.

²³Mu gishura rwagati, harimo umwenge unyuramo umutwe, nk’uw’ikoti ry’intambara; maze uwo mwenge ukazengurutswaho umuguno w’umubohano, kugira ngo igishura kitazatanyuka.

²⁴Ku musozo wo hasi batendekaho amapfundo y’ubwoya bw’isine, bw’umuhemba n’ubutukura, na hariri inetereye.

²⁵Bakora amayugi ya zahabu iyunguruye, maze bayashyira ku musozo w’igishura hasi, arawuzenguruka. Impande zose ku musozo wo hasi, amayugi n’amapfundo bikagenda bikurikirana:

²⁶iyugi rimwe n’ipfundo rimwe, iyugi rimwe n’ipfundo rimwe, ku musozo w’igishura, kugira ngo batunganye imihango nk’uko Uhoraho yari yarabitegetse Musa.

²⁷Baboha n’amakanzu ya hariri, agenewe Aroni n’abahungu be.

²⁸Bakora igitambaro cy’umutwe muri hariri, n’imitako y’ingofero za hariri, amakabutura ya hariri ihotoye;

²⁹imikandara ya hariri ihotoye n’ubwoya bw’isine, bw’umuhemba n’ubutukura; byose byatatswe mu buhanga, uko Uhoraho yari yarabitegetse Musa.

³⁰Bakora ikamba muri zahabu iyunguruye, ritatswe n’ururabo imbere, maze basharagamo aya magambo ngo «Uweguriwe Uhoraho».

³¹Bashyiraho injishi y’umuhemba w’ibihogo yo kurifunga ku gitambaro cyo mu mutwe, uko Uhoraho yari yarabitegetse Musa.

³²Nguko uko imirimo yose y’Ingoro n’iy’ihema ry’ibonaniro yarangiye. Abayisraheli batunganyije byose, bakurikije ibyo Uhoraho yari yarategetse Musa.

³³Bamurikira Musa ibigize Ingoro ari byo ibi ngibi: ihema n’ibikoresho byaryo, ibifungo byaryo, imbaho zaryo, imitambiko yaryo, inkingi zaryo n’ibishyigikizo byaryo;

³⁴umutwikiro w’impu z’amapfizi y’intama zirabyemo ikigina, umutwikiro w’impu z’ibihura, n’umubambiko ugabanya Ingoro mo kabiri;

³⁵ubushyinguro bw’Isezerano hamwe n’imijishi yabwo, n’urwicurizo;

³⁶ameza hamwe n’ibikoresho byayo n’imigati y’umumuriko;

³⁷ikinyarumuri cya zahabu iyunguruye, amatara yo kugitondekanyaho, ibigendana na cyo byose, n’amavuta yo gucana;

³⁸urutambiro rwa zahabu, amavuta yo gusiga, n’imibavu yo gutwika, umwenda ugenewe gukinga umuryango w’ihema;

³⁹urutambiro rw’umuringa, uruzitiro rwarwo rw’umuringa, imijishi yarwo n’ibikoresho byarwo byose; igikarabiro hamwe n’urugata rwacyo;

⁴⁰imibambiko y’urugo rukikije Ingoro, inkingi zarwo, ibishyigikizo byarwo; umwenda ugenewe irembo ry’urugo, injishi zawo, inkingi zawo, n’ibikoresho byose bigenewe imirimo y’Ingoro, ari yo hema ry’ibonaniro;

⁴¹imyambaro mitagatifu igenewe imihango yo mu Ngoro, imyambaro ya Aroni umuherezabitambo n’imyambaro y’abahungu be bazambara batunganya imirimo y’ubuherezabitambo.

⁴²Abayisraheli bakoze iyo mirimo yose bakurikije ibyo Uhoraho yari yarategetse Musa.

⁴³Musa areba ibyakozwe byose, maze asanga barabitunganyije; babikora uko Uhoraho yari yarabitegetse. Nuko Musa abasabira umugisha.