Read kinyarwanda Iyimukamisiri 40 Bible Online

Iyimukamisiri 40 - kinyarwanda bible

Iyimukamisiri 40

¹Uhoraho abwira Musa aya magambo, ati

²«Ku munsi wa mbere w’ukwezi kwa mbere, uzashinge ihema ry’ibonaniro ribe Ingoro y’Uhoraho.

³Uzarishyiremo ubushyinguro bw’Isezerano, maze ubwo bushyinguro ubukingeho umubambiko.

⁴Uzazane ameza, maze uyashyireho ibiyagenewe; uzazane ikinyarumuri, maze ucane amatara yacyo.

⁵Urutambirourwa zahabu rugenewe imibavu uzarutereke imbere y’ubushyinguro bw’Isezerano, kandi uzabambike umwenda ku muryango w’Ingoro.

⁶Urutambiro rw’ibitambo bitwikwa uzarutereke imbere y’umuryango w’Ingoro, ari yo hema ry’ibonaniro.

⁷Igikarabiro uzagitereke hagati y’ihema ry’ibonaniro n’urutambiro, maze usukemo amazi.

⁸Uzatunganye urugo hirya no hino, maze uzabambike umwenda ku irembo ryarwo.

⁹Uzende amavuta yo gusiga, uyasige Ingoro n’ibiyirimo byose; uzayitagatifuze hamwe n’ibiyiteguwemo byose, maze ibe ntagatifu.

¹⁰Uzasige amavuta urutambiro rw’ibitambo bitwikwa, n’ibikoresho byarwo byose, maze urutambiro rube rutagatifu rwose.

¹¹Uzasige amavuta igikarabiro hamwe n’urugata rwacyo, maze ugitagatifuze.

¹²Uzigize Aroni n’abahungu be imbere y’umuryango w’ihema ry’ibonaniro, maze uzabuhagize amazi;

¹³hanyuma wambike Aroni imyambaro mitagatifu, umusige amavuta, maze umutagatifuze, ambere umuherezabitambo.

¹⁴N’abahungu be, numara kubigiza imbere, uzabambike amakanzu,

¹⁵ubasige amavuta nk’uko uzaba wasize se amavuta, nuko bazambere abaherezabitambo. Bityo, amavuta basizwe azabahesha kuba abaherezabitambo iteka ryose, uko ibisekuru bigenda biha ibindi.»

¹⁶Musa arumvira, akora ibyo Uhoraho yari yamutegetse byose.

¹⁷Ku munsi wa mbere w’ukwezi kwa mbere k’umwaka wa kabiri[83] Ingoro irashingwa.

¹⁸Musa ashinga Ingoro; ashinga ibishyigikizo byayo, ashyiraho imbaho n’imitambiko, ashinga n’imiganda.

¹⁹Arambura ihema hejuru y’Ingoro, maze agerekaho umutwikiro w’ihema, nk’uko Uhoraho yari yarabitegetse Musa.

²⁰Yenda amabuye y’Isezerano, maze ayashyira mu bushyinguro, asoheka imijishi mu bushyinguro, atereka n’urwicurizo hejuru y’ubushyinguro.

²¹Nuko ajyana ubushyinguro mu Ngoro; amanika umubambiko muri yo rwagati, ahisha ubushyinguro bw’Isezerano nk’uko Uhoraho yari yarabitegetse Musa.

²²Atereka ameza mu ihema ry’ibonaniro, mu ruhande rw’amajyaruguru y’Ingoro, imbere y’umubambiko,

²³maze ayateguraho urutonde rw’imigati imbere y’Uhoraho, nk’uko Uhoraho nyine yari yarabitegetse Musa.

²⁴Ashyira ikinyarumuri mu ihema ry’ibonaniro, akibangikanya n’ameza, mu ruhande rw’amajyepfo y’Ingoro;

²⁵nuko agishyiraho amatara imbere y’Uhoraho, nk’uko Uhoraho nyine yari yarabitegetse Musa.

²⁶Ashinga urutambiro rwa zahabu mu ihema ry’ibonaniro, imbere y’umubambiko;

²⁷nuko atwikiraho imibavu, nk’uko Uhoraho yari yarabitegetse Musa.

²⁸Abambika umwenda ku muryango w’ihema.

²⁹Ashinga urutambiro rw’ibitambo bitwikwa ku muryango w’Ingoro, ari yo hema ry’ibonaniro, maze aruturiraho igitambo gitwikwa n’amakoro y’ubuhoro, nk’uko Uhorho nyine yari yarabitegetse Musa.

³⁰Ashyira igikarabiro hagati y’ihema ry’ibonaniro n’urutambiro, maze asukamo amazi yo kwisukura.

³¹Musa, Aroni n’abahungu be bakarabiragamo, bakiyoza n’ibirenge.

³²Igihe cyose binjiraga mu ihema ry’ibonaniro, n’iyo begeraga urutambiro, bisukuzaga amazi, nk’uko Uhoraho yari yarabitegetse Musa.

³³Atunganya urugo ruzengurutse Ingoro n’urutambiro, kandi abambika umwenda ku irembo ry’urugo. Nuko Musa arangiza atyo imirimo yose.

³⁴Ubwo rero agacu kabudika ku ihema ry’ibonaniro, maze ikuzo ry’Uhoraho ryuzura mu Ngoro;

³⁵Musa ntiyashobora kwinjira mu ihema ry’ibonaniro, kubera ko agacu kari kayigumye hejuru, kandi n’ikuzo ry’Uhoraho ryagumye kuzura mu Ngoro.

³⁶Iyo agacu kavaga ku Ngoro, kakazamuka hejuru, Abayisraheli barahagurukaga, bagakomeza urugendo rwabo.

³⁷Naho iyo agacu kabaga katavuye ku Ngoro ngo kazamuke hejuru, ntibahagurukaga, kugeza umunsi kazazamukira.

³⁸Koko rero, agacu k’Uhoraho kagumaga hejuru y’Ingoro ku manywa, nijoro mu gacu hakakamo umuriro, ukabonwa n’inzu yose ya Israheli. Byagenze bityo igihe cyose, ku ndaro zose bagiye barara.