Read kinyarwanda Iyimukamisiri 5 Bible Online

Iyimukamisiri 5 - kinyarwanda bible

Iyimukamisiri 5

¹Hanyuma Musa na Aroni basanga Farawo, baramubwira bati «Uhoraho Imana ya Israheli aravuze ngo ’Rekura umuryango wanjye kugira ngo bagende bajye mu butayu kunkorera umunsi mukuru, bansenga!’»

²Farawo arabasubiza ati «Uhoraho ni nde byo kugira ngo numvire ijwi rye, maze ndekure Abayisraheli bagende? Uhoraho simuzi, kandi sinzareka Abayisraheli bagenda!»

³Baravuga bati «Imana y’Abahebureyi yaratubonekeye. Duhe uruhusa rwo gukora urugendo rw’iminsi itatu mu butayu, kugira ngo duture ibitambo Uhoraho Imana yacu, maze yekuduteza umuze cyangwa inkota.»

⁴Naho umwami wa Misiri arababwira ati «Mwebwe, Musa na Aroni, ni iki gituma mutesha rubanda imirimo? Nimujye ku kazi kanyu!»

⁵Farawo arongera ati «Dore ubu bene wanyu babaye ishyano ryose mu gihugu, maze mwebwe mugashaka kubatesha akazi!»

⁶Muri icyo gihe Farawo aha abakoresha n’abagenzuzi[20] b’imirimo ya rubanda itegeko, avuga ati

⁷«Mwikomeza guha rubanda ibyatsi byo kubumbisha amatafari, nk’uko mwabigenzaga ejo n’ejo bundi: nibajye ubwabo kwitoragurira ibyatsi[21]!

⁸Nyamara muzabace umubare w’amatafari ungana n’uwo basanzwe babumba, mutagize icyo mugeruraho. Ni abanebwe! Ni na cyo gituma batera amahane bavuga ngo ‘Turashaka kujya gutura Imana yacu ibitambo!’

⁹Abo bantu nimubicishe uburetwa, bakore badahumeka; bareke kwita ku magambo y’abanyabinyoma!»

¹⁰Abakoresha n’abagenzuzi baraza babwira rubanda, bati «Farawo aravuze ngo ’Sinzongera kubaha ibyatsi ukundi’;

¹¹ngo ‘Nimugende ubwanyu, mushake ubwatsi aho muzabusanga, nyamara ariko ntakizagerurwa ku cyate cyanyu.’»

¹²Rubanda banyanyagira mu gihugu cya Misiri batoragura udufunzo two gukekaguramo ibyatsi.

¹³Abakoresha barabatotaga bavuga bati «Nimurangize icyate cyanyu, murangize icyategetswe buri munsi, nk’uko mwagenzaga igihe mwahabwaga ibyatsi!»

¹⁴Abanyamisiri bakubita abagenzuzi b’Abayisraheli bari barashyizweho n’abakoresha ba Farawo. Bakavuga bati «Ni iki cyatumye ari ejo ari na none mutarangiza umubare w’amatafari utegetswe nk’uko mwabigenzaga mbere?»

¹⁵Abagenzuzi b’Abayisraheli bajya kuregera Farawo, bavuga bati «Ni iki gituma ugenzereza utyo abagaragu bawe?

¹⁶Ntibagiha abagaragu bawe ibyatsi, kandi bakatubwira ngo ‘Nimubumbe amatafari!’ None dore abagaragu bawe barakubitwa, imbaga yawe ikarengana!»

¹⁷Farawo arabasubiza ati «Hoshi muri abanebwe! Ni yo mpamvu ituma muvuga ngo ‘Turashaka kujya gutura Uhoraho ibitambo!’

¹⁸Noneho ubu ngubu nimujye gukora. Ntibazabaha ibyatsi, kandi muzatanga umubare utegetswe w’amatafari.»

¹⁹Abagenzuzi b’Abayisraheli basanga bari mu kaga, ubwo bababwiraga bati «Ntimuzagerura na busa ku matafari ategetswe; buri munsi ugire icyate cyawo!»

²⁰Bagisohoka kwa Farawo, bahubirana na Musa na Aroni bari babategereje.

²¹Barababwira bati «Uhoraho narebe, ace urubanza! Ni mwebwe mwatumye duhinduka ba ruvumwa mu maso ya Farawo no mu y’abagaragu be. Dore mwabashyize mu ntoki inkota yo kutwica.»

²²Ubwo Musa yongera gusanga Uhoraho, aramubwira ati «Nyagasani, ni iki cyatuma ugirira inabi iyi mbaga? Ni iki cyatumye untuma?

²³Kuva aho nagiriye kuvugana na Farawo mu izina ryawe, arica iyi mbaga urubozo, ariko woweho nta bwo urokora imbaga yawe!»