Read kinyarwanda Iyimukamisiri 7 Bible Online

Iyimukamisiri 7 - kinyarwanda bible

Iyimukamisiri 7

¹Uhoraho abwira Musa, ati «Dore wowe nakugize nk’imana imbere ya Farawo, naho Aroni mwene nyoko azavuga mu mwanya wawe.

²Wowe uzajye uvuga icyo ngutegetse cyose, naho Aroni mwene nyoko azajye avugana na Farawo, kugira ngo uwo mwami areke Abayisraheli basohoke mu gihugu cye.

³Jyewe rero nzatera umutima wa Farawo kunangira. Nzagwiza ibimenyetso byanjye n’ibitangaza byanjye mu gihugu cya Misiri,

⁴ariko Farawo nta bwo azabumva. Nzaramburira ukuboko kwanjye kuri Misiri, maze ku bubasha bwanjye mvane mu gihugu cya Misiri ingabo zanjye, umuryango wanjye, Abayisraheli.

⁵Abanyamisiri bazamenya ko ndi Uhoraho, ubwo nzaba naramburiye ukuboko kwanjye kuri Misiri, maze nkavanayo Abayisraheli.»

⁶Musa na Aroni bagenza batyo: uko Uhoraho yari yabategetse aba ari ko bakora.

⁷Musa yari amaze imyaka mirongo inani, na Aroni imyaka mirongo inani n’itatu igihe bavuganye na Farawo.

⁸Uhoraho abwira Musa na Aroni, ati

⁹«Farawo nababwira avuga ngo ’Nimubitangire icyemezo’, uzabwire Aroni uti ’Fata inkoni yawe maze uyijugunye imbere ya Farawo, ihinduke inzoka.’»

¹⁰Nuko rero Musa na Aroni baza kwa Farawo; bagenza uko Uhoraho yari yabategetse. Aroni ajugunya inkoni ye imbere ya Farawo n’imbere y’abagaragu be, ihinduka inzoka.

¹¹Ubwo Farawo atumiza abahanga n’abapfumu be; maze abapfumu ba Misiri na bo babigenza batyo, bakoresheje amayeri yabo:

¹²buri muntu ajugunya inkoni ye hasi, zihinduka inzoka. Ariko inkoni ya Aroni imira inkoni zabo.

¹³Nyamara umutima wa Farawo ugumya kunangira, maze ntiyumva Musa na Aroni, nk’uko Uhoraho yari yabivuze.

¹⁴[25] Uhoraho abwira Musa, ati «Farawo ntava ku izima; yanze kurekura imbaga yanjye.

¹⁵Usange rero Farawo mu gitondo, igihe agiye ku nkombe y’amazi, maze umutegerereze ku nkombe y’Uruzi; ube kandi ufite mu ntoki ya nkoni yahindukaga inzoka.

¹⁶Umubwire uti ’Uhoraho Imana y’Abahebureyi yakuntumyeho kukubwira, ngo: Rekura umuryango wanjye, kugira ngo bajye kunsengera mu butayu. None dore kugeza ubu ngubu nturabyumva!

¹⁷Uhoraho aravuze ati: ‘Dore icyo uzamenyeraho ko ndi Uhoraho: ngiye gukubitisha amazi yo mu Ruzi inkoni mfite mu ntoki, maze ahinduke amaraso.’

¹⁸Amafi y’uruzi ari bupfe, maze uruzi runuke, kugeza aho Abanyamisiri batazashobora kunywa amazi y’Uruzi.’»

¹⁹Uhoraho abwira Musa, ati «Bwira Aroni uti ’Fata inkoni yawe, maze werekeze ukuboko kwawe ku mazi yose yo mu Misiri, no ku migezi yabo, no ku miyoboro yabo, no ku biyaga byabo, no ku bireko byabo, kugira ngo bihinduke amaraso; maze hazabe amaraso hose mu gihugu cya Misiri kugeza no ku bivomesho by’ibibazanyo n’iby’amabuye!’»

²⁰Musa na Aroni bakora icyo Uhoraho yari ategetse. Aroni abangura inkoni ye, ayikubita amazi y’Uruzi, Farawo n’abagaragu be babyirebera n’amaso yabo; nuko amazi y’Uruzi yose ahinduka amaraso.

²¹Amafi yari mu Ruzi arapfa, uruzi rwose ruhinduka umunuko; Abanyamisiri ntibaba bagishoboye kunywa amazi y’Uruzi. Nuko mu gihugu cyose cya Misiri haba amaraso.

²²Nyamara abapfumu ba Misiri bagenza batyo na bo, ku mayeri yabo. Maze umutima wa Farawo ugumya kunangira, ntiyumva Musa na Aroni, nk’uko Uhoraho yari yabivuze.

²³Farawo arikubita aragenda, yisubirira iwe, ntiyirirwa anabyitaho.

²⁴Abanyamisiri bafukura ahegereye Uruzi ngo babone amazi yo kunywa, kuko batashoboraga kunywa amazi y’Uruzi.

²⁵Kuva igihe Uhoraho akubitiye Uruzi, haciyeho iminsi irindwi.

²⁶Uhoraho abwira Musa, ati «Sanga Farawo maze umubwire uti ‘Uhoraho aravuze ngo rekura umuryango wanjye kugira ngo ujye kunsenga.

²⁷Niba kandi wanze kuwurekura ngo ugende, dore igihugu cyawe cyose ngiye kugiteza icyago cy’imitubu.

²⁸Uruzi ruzajagatamo imitubu; izazamuka, maze yinjire mu ngoro yawe, mu cyumba uraramo no ku buriri bwawe, mu nzu y’abagarage bawe kandi no mu mazu y’abaturage bawe, kugeza no mu bikoni batekeramo imigati.

²⁹Imitubu izatondagira kuri wowe, ku baturage bawe, no ku bagaragu bawe bose.’»