Read kinyarwanda Iyimukamisiri 9 Bible Online

Iyimukamisiri 9 - kinyarwanda bible

Iyimukamisiri 9

¹Uhoraho abwira Musa, ati «Genda usange Farawo, umubwire uti ’Uhoraho Imana y’Abahebureyi aravuze ngo: Rekura umuryango wanjye kugira ngo ujye kunsenga;

²niba kandi wanze kubarekura ngo bagende, ugakomeza kubabuza,

³ngaha ukuboko kw’Uhoraho kugiye gushikama ku mashyo yawe ari mu gasozi, ku mafarasi, ku ndogobe, ku ngamiya, ku nka, no ku matungo magufi; byose umuze ubitsembe!

⁴Nyamara Uhoraho azarobanura amashyo ya Israheli mu mashyo y’Abanyamisiri, maze hekuzagira igipfa na kimwe mu matungo y’Abayisraheli.’»

⁵Nuko Uhoraho agena igihe, avuga ati «Ejo Uhoraho azakora ibyo ngibyo mu gihugu.»

⁶Uhoraho abigenza atyo kuva bukeye bwaho. Amatungo y’Abanyamisiri yose arapfa, ariko ntihagira itungo ripfa ryo mu mashyo y’Abayisraheli.

⁷Farawo arabaririza, asanga nta tungo na rimwe ryapfuye mu mashyo ya Israheli! Nyamara umutima wa Farawo wanga kuva ku izima, ntiyareka rubanda bagenda.

⁸Uhoraho abwira Musa na Aroni, ati «Nimuyore umurayi w’itanura, wuzuye ibiganza; Musa aze kuwujugunya mu kirere ari imbere ya Farawo.

⁹Uraza guhinduka urwavumba rutwarwe n’umuyaga hejuru y’igihugu cyose cya Misiri, utere abantu n’amatungo gupfuruta no gututumba ibibyimba ku mubiri, mu gihugu cyose cya Misiri.»

¹⁰Benda rero umurayi w’itanura, maze bahinguka imbere ya Farawo. Musa awujugunya hejuru, maze utera abantu n’inyamaswa gupfuruta no gututumba ibibyimba ku mubiri.

¹¹Na ba bapfumu[28] ntibashobora guhinguka imbere ya Musa ku mpamvu y’ibibyimba, kuko abo bapfumu bari buzuyeho ibibyimba nk’Abanyamisiri bandi.

¹²Nyamara Uhoraho atera umutima wa Farawo kunangira, maze Farawo ntiyumva Musa na Aroni, nk’uko Uhoraho yari yabibwiye Musa.

¹³Uhoraho abwira Musa, ati «Uhaguruke mu gitondo cya kare, maze uhinguke imbere ya Farawo; umubwire uti ’Uhoraho, Imana y’Abahebureyi, aravuze ngo: Rekura umuryango wanjye kugira ngo ujye kunsenga.

¹⁴Kuko ubu ngubu ho, ibyorezo byanjye byose ngiye kubiguteza, wowe n’abagaragu bawe n’abaturage bawe, kugira ngo umenyereho ko nta n’umwe ku isi duhwanye.

¹⁵Iyo mbishaka, mba nararambuye ukuboko kwanjye, maze nkaguteza umuze, wowe n’abaturage bawe, ukaba wararimbutse ku isi.

¹⁶Nyamara dore icyatumye nkureka ukagumaho: ni ukugira ngo nkwereke ububasha bwanjye, maze bazasingize izina ryanjye ku isi hose.

¹⁷Niba rero ukomeje kuziga umuryango wanjye, ukawubuza kugenda,

¹⁸dore ejo kuri aya magingo nzagusha urubura rw’urucukirane, rutigeze rubaho mu Misiri kuva aho yaremewe kugeza ubu ngubu.

¹⁹None rero, ubu ngubu ohereza intumwa, bahungishe amatungo yawe, n’icyo ufite cyose ku gasozi; kuko abantu bose n’inyamaswa zose bizaba byagumye ku gasozi, ntibizabe byugamishijwe mu mazu, bizahondagurwa n’urubura, maze bipfe.’»

²⁰Mu bagaragu ba Farawo, uwatinye ijambo ry’Uhoraho wese ahungishiriza mu mazu abagaragu be n’amatungo ye;

²¹naho abahinyuye ijambo ry’Uhoraho barekera abagaragu babo n’amatungo ku gasozi.

²²Uhoraho abwira Musa, ati «Rambura ukuboko kwawe werekeza ku ijuru, kugira ngo urubura rugwe mu gihugu cyose cya Misiri, ku bantu, no ku nyamaswa, no ku bimera byose mu mirima.»

²³Musa atunga inkoni ye hejuru, maze Uhoraho arekura inkuba n’urubura, imirabyo iracicikana ku isi; nuko Uhoraho agusha urubura mu gihugu cya Misiri.

²⁴Hagwa urubura ruvanze n’inkuba, urubura ruteye ubwoba, rutigeze rumera nk’urwo mu gihugu cya Misiri kuva aho cyitiwe igihugu.

²⁵Mu gihugu cyose cya Misiri, urubura ruhondagura ibyari ku gasozi byose, kuva ku bantu kugera ku nyamaswa; urubura ruhondagura ibimera byose mu mirima, kuva ku byatsi kugeza ku biti.

²⁶Ntihagira ahantu rutagwa, uretse mu gihugu cy Gosheni, aho Abayisraheli bari batuye.

²⁷Farawo ahamagaza Musa na Aroni, maze arababwira ati «Ubu ngubu ho nemeye ko nacumuye; Uhoraho ni we uri mu kuri, naho jyewe n’igihugu cyanjye tukaba mu cyaha.

²⁸Nimwinginge Uhoraho kugira ngo izo nkuba zikaze n’urubura bisigeho! Nzabareka mugende, mwekuguma hano ukundi.»

²⁹Musa aramubwira ati «Ninsohoka mu mugi, ndatega amaboko ntakambire Uhoraho, maze inkuba zirorere kandi n’urubura rureke kugwa, kugira ngo umenye ko isi yose ari iy’Uhoraho.

³⁰Nyamara wowe n’abagaragu bawe, nzi neza ko mutaragera aho gutinya Uhoraho Imana.»

³¹Ibiti byera ubudodo, n’ingano za bushoki bihinduka imirara. Koko rero za bushoki zari amahundo, n’ibiti byera ubudodo ari uruyange.

³²Ariko ingano zindi n’inganogaju ntibyononekara, kuko byo byera bitinze.

³³Musa ava kwa Farawo, asohoka mu mugi; atega amaboko atakambira Uhoraho, maze inkuba n’urubura birarorera, kandi imvura ntiyongera kwisuka ku isi.

³⁴Farawo ngo abone ko imvura n’urubura n’inkuba bihosheje, akomeza gucumura; we n’ibyegera bye banga kuva ku izima.

³⁵Umutima wa Farawo ugumya kunangira, maze ntiyareka Abayisraheli bagenda, nk’uko Uhoraho yari yabibwiye Musa.