Read kinyarwanda Yobu 1 Bible Online

Yobu 1 - kinyarwanda bible

Yobu 1

¹Habayeho umugabo mu gihugu cya Usi[1], akitwa Yobu; yari umuntu w’inyangamugayo n’umunyamurava, agatinya Imana, kandi akanga ikibi.

²Yari yarabyaye abahungu barindwi n’abakobwa batatu.

³Yari atunze umukumbi w’intama ibihumbi birindwi, hamwe n’ingamiya ibihumbi bitatu, ibimasa by’inkone igihumbi, n’indogobe z’amanyagazi magana atanu, hamwe n’abagaragu benshi cyane. Uwo mugabo yarushaga ubukire abaturage bose b’iburasirazuba.

⁴Abahungu be bajyaga ibihe mu guteranira mu rugo rw’umwe muri bo, ibirori bikaba byose, kandi bagatumira bashiki babo batatu ngo baze basangire ibiryo n’ibinyobwa.

⁵Iyo bamaraga guhetura ingo zabo zose, Yobu yabatumiriraga kubasukura; maze akazinduka mu gitondo, agaturira buri wese igitambo gitwikwa. Koko rero, Yobu yaribwiraga ati «Wenda ahari abahungu banjye baba baracumuye, maze bakavuma Uhoraho mu mutima wabo.» Nguko uko Yobu yabigenzaga buri gihe.

⁶Umunsi umwe, abamalayika b’Imana baza gutaramira Uhoraho, Sekibi azana na bo.

⁷Uhoraho abaza Sekibi ati «Uturutse he?» Sekibi aramusubiza ati «Mvuye kuzerera isi no kuyitambagira.»

⁸Uhoraho abwira Sekibi ati «Ese witegereje umugaragu wanjye Yobu? Nta wundi usa na we ku isi; ni umuntu w’inyangamugayo n’umunyamurava, atinya Imana, kandi yirinda ikibi.»

⁹Sekibi asubiza Uhoraho, ati «Ese kugira ngo Yobu atinye Imana, ni ku busa?

¹⁰None se ntiwamuhaye uruzitiro rumurinda, rukazenguruka inzu ye n’ibyo atunze byose? Ibikorwa bye byose wabihaye umugisha, none amatungo ye yuzuye igihugu.

¹¹Ariko, urambuye ukuboko kwawe, ugatsemba ibyo atunze byose, nta kabuza, azakuvuma urora.»

¹²Uhoraho abwira Sekibi, ati «Ndabyemeye, ibye byose ndabikweguriye; gusa we ubwe ntugire icyo umutwara.» Nuko Sekibi arikubura aragenda.

¹³Umunsi umwe rero, abahungu n’abakobwa ba Yobu bari bateraniye kwa mukuru wabo, barya kandi banywa,

¹⁴nuko intumwa iza kubwira Yobu iti «Ibimasa byarimo bihinga, n’indogobe zirisha iruhande rwabyo,

¹⁵nuko Abanyesaba[2] barahuruduka barabinyaga, bicisha inkota abagaragu bawe; ncika ku icumu jyenyine, ndahunga nza kubikumenyesha.»

¹⁶Umwanya akibivuga, undi aba ashinze aho, ati «Inkongi y’umuriro w’Imana yamanutse ku ijuru, itwika intama n’abagaragu iratsemba; ni jye jyenyine warokotse, nza kubikumenyesha!»

¹⁷Umwanya akivuga ibyo, undi aba aratungutse, ati «Abakalideya[3] biciyemo ingamba eshatu, birara mu ngamiya zawe barazinyaga, bicisha abagaragu bawe inkota; ni jye jyenyine warokotse, nza kubikumenyesha!»

¹⁸Igihe akivuga, undi aba ageze aho, ati «Abahungu n’abakobwa bawe bari mu nzu ya mukuru wabo, barya kandi banywa divayi,

¹⁹nuko inkubi y’umuyaga ituruka hakurya y’ubutayu, ihirika inkuta z’inzu zose uko ari enye, na yo irarindimuka ibagwa hejuru barapfa; ni jye jyenyine warokotse, nza kubikumenyesha!»

²⁰Yobu arahaguruka, ashishimura igishura cye, yikomboza umutwe, arambarara hasi,

²¹aramya agira ati «Navuye mu nda ya mama nambaye ubusa, kandi nzasubirayo[4] nambaye ubundi. Uhoraho ni we wampaye, Uhoraho ni we wishubije; nihasingizwe izina ry’Uhoraho!»

²²Muri ayo makuba yose, Yobu ntiyigeze acumura; nta n’ijambo risebya Imana yigeze avuga.