Read kinyarwanda Yobu 10 Bible Online

Yobu 10 - kinyarwanda bible

Yobu 10

¹Ubwo nazinutswe ubuzima bwanjye, nimundeke, nta kimbuza kwiganyira, ngo mvuge ishavu rishengura umutima.

²Nzabwira Nyir’ububasha nti ’Wincira urubanza, ahubwo mbwira icyaha unshinja.

³Ese ushimishwa no kunkandamiza, cyangwa kwandavuza ikiremwa cyawe, ukanezezwa n’imigambi y’abagome?

⁴Waba se ufite amaso nk’ayacu, byatuma ureba nk’uko abantu bareba?

⁵Ese ubuzima bwawe bwaba ari nk’ubw’abagenewe gupfa, cyangwa se imyaka yawe yaba ihita nk’iminsi yabo,

⁶ku buryo wakurikirana ibyaha byanjye, ukabaririza hose amakosa yanjye?

⁷Nyamara uzi neza ko nta gicumuro kindangwaho, kandi nta n’ushobora kunkura mu maboko yawe!

⁸Ibiganza byawe ni byo byandemye, none se washimishwa no kunkuraho!

⁹Wibuke ko wandemye unkura mu gitaka, kandi ko uzakinsubizamo.

¹⁰Wambuganije mu nda ya mama nk’uko babuganiza amata, umbumbabumbiramo nk’uko babumba isoro ry’amavuta.

¹¹Wanyambitse umubiri n’inyama, kandi unsobekamo amagufa n’imitsi.

¹²Wampaye ubuzima urantonesha, kandi kubera ineza yawe, urinda ubugingo bwanjye.

¹³Nyamara, icyo wari wahishe mu mutima wawe, ubu urakingaragarije; menye neza ko ari cyo wari ugambiriye!

¹⁴Iyo ncumuye uba undeba, kandi nta kosa ryanjye rigusoba.

¹⁵Naba rero nacumuye, ubwo akanjye kakaba kageze! Cyangwa se naba ndi umwere, na bwo sinubure umutwe; none nuzuyemo ikimwaro n’agahinda.

¹⁶Iyo ngize ngo ndashingashinga, urampiga nk’intare, maze si ukunyigambaho, ukivayo.

¹⁷Uhora ushaka uko wantera, uburakari umfitiye bukiyongera, maze ingabo zawe z’inkwakuzi ukazinterereza.

¹⁸Ni kuki watumye mvuka? Ubu simba narapfuye, nta wigeze ambona?

¹⁹Mba narabaye nk’utigeze abaho, nkava mu nda bahita bahamba.

²⁰Ese iminsi y’ukubaho kwanjye ntibaze! Ba unyihoreye gato, maze nyuzemo mpumeke,

²¹mbere yo kugenda ubutazagaruka, mboneje mu gihugu cy’umwijima w’igicuku,

²²igihugu cy’umwanda n’akajagari, aho n’amanywa ubwayo ari umwijima musa.»