Read kinyarwanda Yobu 11 Bible Online

Yobu 11 - kinyarwanda bible

Yobu 11

¹Sofari w’i Nahama[20] afata ijambo, agira ati

²«Harya ngo imvuzi ya cyane ntivuguruzwa! None se gusukiranya amagambo ni ko kuvuga ukuri?

³Amahomvu yawe se azacecekesha abandi, ukomeze kurocangwa nta we ukuvuguruza?

⁴Waravuze ngo ’Ndi indakemwa, n’imyifatire yanjye iraboneye mu maso y’Imana.’

⁵Nyamara Nyir’ububasha ashatse kubumbura umunwa, akagusubiza akweruriye;

⁶aramutse aguhishuriye amabanga y’ubuhanga bwe, butambutse kure icyitwa ubumenyi cyose, ni ho wamenya ko akuryoje icyaha cyawe.

⁷Ese wibwira ko washobora gucengera amabanga y’Imana, ku buryo wakumva ubwiza bwa Nyir’ububasha?

⁸Ko uzasanga busumba kure ijuru, uzabigenza ute? Ko bujya kure y’ikuzimu, uzabumenya ute?

⁹Busumba isi mu burebure, bukarusha inyanja ubugari!

¹⁰Igize uwo icakira, ikamufunga, ni nde wayibuza kumucira urubanza?

¹¹Koko rero, yo izi abantu b’abanyabinyoma; ibona icyaha, ikacyitegereza.

¹²Ab’ibicucu bakurizaho kwitonda, n’indogobe y’igihubutsi, igacisha make.

¹³Wowe rero, nukomeza umutima wawe kuri Nyir’ububasha, ukarambura amaboko uyamwerekejeho,

¹⁴nurinda ibiganza byawe gukora nabi, kandi ntube icyitso cy’abagome,

¹⁵ni bwo uzaba umuziranenge, ukagira umutima ukomeye, utagira ikiwukanga.

¹⁶Koko rero, ntuzongera kwibuka umuruho wawe, uzawibagirwa nk’amazi yatembye kera.

¹⁷Ubuzima bwawe buzarabagirana kurusha umucyo w’amanywa, ahari mu gicuku, hakubere nko mu gitondo.

¹⁸Icyizere cyawe kizatuma utuza, uzasinzira umudendezo, kuko uhagarikiwe.

¹⁹Uziruhukira nta we ugusagarira, rubanda benshi bamaranire kugutonaho.

²⁰Naho abagiranabi bo, bazumirwa, babure ubuhungiro, amizero bazasigarana, abe ayo gupfa.»