Read kinyarwanda Yobu 12 Bible Online

Yobu 12 - kinyarwanda bible

Yobu 12

¹Yobu afata ijambo[21], agira ati

²«Mu by’ukuri, ni mwebwe muhagarariye rubanda, kandi nimupfa, ubuhanga bwanyu muzajyana!

³Nanjye mfite ubwenge, nta bwo mubundusha; none se muribwira ko ibyo hari utabizi?

⁴Iyo umuntu yiyambaje Imana ngo imwumve, incuti ze zimuhindura urw’amenyo; uw’intungane n’inyangamugayo, ni we basigaye baseka.

⁵Abagwiririwe n’ibyago, ibyo ni akazi kabo — nguko uko abagashize bavuga — niba adandabiranye ni ukumuhirikisha umugeri.

⁶Nyamara ariko, abajura bafite amahoro mu mahema yabo, abashavuza Imana bari mu ituze, imana biringiye ni imbaraga zabo.

⁷Ngaho, uzibarize inyamaswa, zizakumenyeshe, n’inyoni zo mu kirere zizagusobanurire,

⁸ibikurura inda hasi bizakwigishe, n’amafi yo mu nyanja azakurondorere.

⁹Muri izo nyamaswa zose, nta n’imwe itazi ko Nyir’ububasha ari we wahanze byose.

¹⁰Ni we uhagaritse ikinyabuzima cyose, akabumbatira ubugingo bw’abantu!

¹¹Ese amagambo si yo anogera ugutwi, naho ibiryo bikaryohera akanwa?

¹²Ubwenge bubarizwa mu basheshe akanguhe, kandi abasaza ni bo bamenya gushyira mu gaciro.

¹³Ariko we, ni Nyir’ubuhanga n’ububasha, ni we mujyanama w’ukuri, agashyira mu gaciro koko!

¹⁴Icyo ashenye, nta we ugisana, uwo akingiranye, nta we umukingurira,

¹⁵iyo agomeye amazi, amapfa aratera, yayagomorora, agakundura ubutaka.

¹⁶Ni we Nyir’imbaraga n’ubwitonzi, ahashya inkozi z’ibibi n’abazibyoheje.

¹⁷Arindagiza abajyanama, abacamanza akabateza ibisazi;

¹⁸abohora ingoyi z’abami, akaba ari bo ata muri yombi.

¹⁹Abaherezabitambo abahindura abatindi, ibikomerezwa akabihanantura ku ngoma.

²⁰Ab’intyoza abagira ibiragi, abasaza akabambura ubushishozi;

²¹asuzuguza ibikomangoma, abakomeye akabagira ibigwari.

²²Umwijima awuzikura mu kuzimu, icuraburindi rigatangaza umwezi.

²³Ni we werereza amahanga, kandi akayoreka. Ni we uha abantu kororoka, kandi akabatsemba.

²⁴Abatware b’igihugu abahindura ibihungetwe, bakabungagira mu bigunda,

²⁵bakarindagira mu mwijima, nta rumuri, bakagenda bagwira inzira nk’abasinzi.