Read kinyarwanda Yobu 13 Bible Online

Yobu 13 - kinyarwanda bible

Yobu 13

¹Ni koko, ibyo byose narabyiboneye n’amaso yanjye, amatwi yanjye arabyumva, arabisobanukirwa.

²Ibyo muzi, nanjye ndabizi, ndi umuntu nkamwe, ntimunduta!

³Ariko jyewe Imana ni yo mbwira, Nyir’ububasha ni we nshaka ko ansobanurira.

⁴Naho mwebwe, muri abanyamahomvu gusa, muri abavuzi ba magendu, mwese uko mungana!

⁵Ni kuki muticecekera? Ni byo byakwerekana ko muzi ubwenge.

⁶Nimwumve uko niregura, mutege amatwi ibyo mvuga.

⁷Uhoraho se ni we wabohereje kuvuga amahomvu, ni we se wabatumye kumbwira ibinyoma?

⁸Ni we se muvuganira, ni we se muburanira?

⁹Mbese none yaba abarora mu mutima? Muribwira ko mwamubeshya nk’uko bashuka umuntu?

¹⁰Nta shiti azabahana, niba mugamije kubera.

¹¹Nyir’icyubahiro ntimumukangwa, ese nta n’ubwo ajya abatera ubwoba?

¹²Impanuro zanyu ni nk’ivu, n’ibisubizo mumpa nta shingiro bifite.

¹³Nimuceceke, mundeke mvuge, maze igishaka kizabe!

¹⁴Jyewe naritanze, nahaze amagara, ubuzima bwanjye ndabuhebye.

¹⁵Nashaka anyice, n’ubundi ni rwo nari ndindiriye, cyakora ndashaka kwisobanura imbere ye,

¹⁶ndetse nyine ngibyo ibintera kwizera ko azankiza, kuko nta nkozi y’ibibi n’imwe itinyuka kumutunguka imbere.

¹⁷Nimwumve, nimutege amatwi amagambo yanjye, kandi mwite ku byo mbatangariza.

¹⁸Dore niteguye kuburana, kandi nzi ko mfite ukuri.

¹⁹Ese hari uwatinyuka kunshinja, ngo nicecekere maze mpfe?

²⁰Uzandinde ibintu bibiri gusa, maze noye kuzihisha mu maso yawe:

²¹Uzareke kunzibiranya, no kuntera ubwoba,

²²hanyuma ubanze uvuge ngusubize, cyangwa se umpe ijambo mbanze, nawe unsubize.

²³Ese mfite ibyaha n’ibicumuro bingahe? Nsobanurira ishyano nakoze, umbwire icyaha cyanjye.

²⁴Ni kuki unyihisha, ukangenzereza nk’umwanzi wawe?

²⁵Urashaka se gukanga akababi gatwawe n’umuyaga, no kwibasira akatsi kumye?

²⁶Ubwo rero wirirwe unyandikaho ibirego bikaze, unshinje ibyaha byo mu buto bwanjye,

²⁷unshandikire imitego impande zose, ungenzure aho nyuze hose, uronde aho nakandagiye hose!

²⁸None umubiri wanjye ushaje nk’igiti cyamunzwe, umeze nk’umwenda wariwe n’umuswa.