Read kinyarwanda Yobu 14 Bible Online

Yobu 14 - kinyarwanda bible

Yobu 14

¹Umuntu wabyawe n’umugore abaho igihe gito kandi na cyo cyuzuyemo imiruho.

²Ameze nk’ururabo, rurabya hanyuma rukuma; cyangwa igihu gihita nyuma kikayoyoka.

³None uwo ni we uhozaho ijisho, ni we ushinja mu rukiko!

⁴Ikintu kibi se ni nde wakibyaza icyiza? Arakajya!

⁵Ubwo rero iminsi ye ibaze, ukaba uzi amezi azamara ariho, kandi waramugeneye igihe ntarengwa,

⁶mukureho amaso umwihorere, yirwanire n’iminsi nk’umucancuro.

⁷Koko rero, igiti nticyakwiheba, kuko n’iyo bagitemye, cyongera kigatoha, kigashibukaho imimero.

⁸Iyo imizi yacyo yasaziye mu butaka, igihimba cyacyo kikarengwaho n’igitaka,

⁹gipfa gusa kwikanga amazi, maze kigatoha, kigashamika nk’urugemwe.

¹⁰Umuntu we ariko, arapfa, akagagara; iyo apfuye se, hari ikiba gisigaye?

¹¹Nk’uko amazi ashira mu nyanja, inzuzi zikuma zigakama,

¹²ni na ko umuntu aryama ntabyuke; n’ijuru ubwaryo rizarinda rizimira, we atarakanguka, ngo ashiguke muri ibyo bitotsi.

¹³Ndakwinginze, ba umpishe mu nyenga, nikingeyo kugeza igihe umujinya wawe uzashirira. Iyaba wari umbwiye ko hari igihe uzanyibuka,

¹⁴— ariko se, iyo umuntu yapfuye, yakongera kubaho? — nzihangana mu minsi nkiri ku gihe, kugeza ubwo hazaza unkura.

¹⁵Icyo gihe wampamagara, nkakwitaba, wenda waba ushaka kureba ikiremwa cyawe.

¹⁶Aho kuba nk’ubu ungenza aho nyuze hose, waba utakitaye ku byaha byanjye

¹⁷ibicumuro byanjye wabyirengagiza, ukampindura umwere.

¹⁸Ndishunga ariko: nk’uko umusozi ushyira ukariduka, n’urutare rukimuka,

¹⁹nk’uko amazi avungura amabuye, ubutaka bugatwarwa n’isuri, ni na ko upfobya amizero y’umuntu!

²⁰Koko uramukindura, akagenda burundu; ukamwandavuza, ahasigaye ukamwohera.

²¹Abana be baratengamara, ntabimenye, basuzugurwa, ntababone;

²²aba yibabarijwe n’umubiri we, hamwe n’umutima we uri mu gahinda.»