Read kinyarwanda Yobu 15 Bible Online

Yobu 15 - kinyarwanda bible

Yobu 15

¹Elifazi w’i Temani[22] afata ijambo, agira ati

²«Umuntu uzi ubwenge yasubizanya amahomvu ate, yavuga ate amagambo atagira ishingiro?

³Yaburanisha amagambo y’amanjwe, cyangwa imvugo itagira icyo imaze?

⁴Wowe ariko urakabya, utambamira iyobokamana, ubuzanya ibyo kuyizirikana.

⁵Ubucumuzi bwawe ni bwo bugutera kuvuga utyo, ukiha kuvuga nk’inkozi z’ibibi.

⁶Ntumpfane, urashinjwa n’umunwa wawe, akarimi kawe ni ko kakurega.

⁷Waba se ari wowe wavutse mbere y’abantu bose, ugatanga imisozi yose kubaho.

⁸Waba se waremerewe mu nama nkuru y’Imana kugira ngo ube warikubiye ubuhanga bwose?

⁹Icyo uzi, twe tutazi ni iki? Icyo usobanukiwe twe kitwihishe ni iki?

¹⁰Iwacu na ho, hari abasheshe akanguhe b’inararibonye, ndetse baruta so mu myaka.

¹¹Ese waba usuzugura ihumure ry’Imana, n’amagambo meza tukubwira?

¹²Ni kuki uzengana uburakari bwinshi, ugahumbaguza n’amaso?

¹³Ni kuki utura Imana umujinya wawe, kandi ugasukiranya amagambo aterekeranye?

¹⁴Ugenewe gupfa yashobora ate kuba umwere; uwabyawe n’umugore se, yaba intungane ate?

¹⁵Ndetse n’abo Imana yatonesheje nta bwo ijya ibizera, n’ikirere ubwacyo ibona kitabuze inenge,

¹⁶nkanswe cya kiremwa cyandavuye, kinateye ishozi, ari cyo muntu, ugotomera icyaha nk’amazi!

¹⁷Ntega amatwi, ngiye kukwigisha, ibyo nabonye, ngiye kubigutekerereza;

¹⁸nkubwire ibyo abanyabuhanga bazi, ntibabihishe, kandi bakabikomora ku basekuru babo.

¹⁹Ni bo bonyine bari barahawe igihugu, kandi nta munyamahanga wabivanzemo.

²⁰Umugiranabi arahangayika igihe cyose akiriho, kandi imyaka y’umugome irabaze,

²¹induru igira itya ikamumena amatwi, umwanzi akamugwa gitumo, kandi amahoro ari yose.

²²Ntajya yizera ko ibyago byamucaho, kuko asa n’uwagabijwe inkota,

²³akamera nk’uzaribwa n’inkongoro. Azi neza ko yavukiye gusenyuka. Iyo umunsi w’amakuba ugeze, arahangayika;

²⁴umubabaro n’ubwoba bikamutahirana, uboshye umwami wenda kugaba igitero.

²⁵Koko rero, aba yarwanije Imana, agashaka kwirata kuri Nyir’ububasha!

²⁶Yamwiyahuragaho, areze ijosi, yikingiye ingabo nini y’isuri.

²⁷Mbega ibinure yari amaze gutekera mu maso, n’ukuntu ibyaziha bye byavunwaga n’ibicece!

²⁸Yari atuye mu migi yasenyutse, aba mu mazu beneyo bataye, kuko yari hafi kurunduka.

²⁹Nta bwo azakira, n’umutungo we ntuzaramba, ndetse na we ubwe ntazatinda ku isi.

³⁰Nta ho azahungira umwijima, indimi z’umuriro zizatwika urubyaro rwe, ibye byose bitwarwe n’umuyaga.

³¹Niyiringira ikinyoma, azarindagira, kuko igihembo cye ari ukuzakorwa n’isoni.

³²Amababi ye azagwengera imbura gihe, amashami ye ye kuzashibuka ukundi.

³³Imbuto ze zizahubuka ziteze nk’iz’umuzabibu, ururabo rwe ruhunguke nk’urw’umutini.

³⁴Ni ko bigenda, inyoko y’abanyabyaha iragumbaha! Kandi umuriro uzayogoza amahema y’inkozi z’ibibi.

³⁵Umuntu wasamye ikibi, azabyara ishyano, kandi icyo ahatse, kizavemo ubusa.»