Read kinyarwanda Yobu 18 Bible Online

Yobu 18 - kinyarwanda bible

Yobu 18

¹Bilidadi w’i Shuwa[25] afata ijambo, agira ati

²«Muzizimba mu magambo mugeze ryari? Mwitonde mutekereze, hanyuma tuganire.

³Ni kuki waduhindura ibiburabwenge, mbese urabona turi ibicucu?

⁴Dore wowe urasebwa n’umujinya, urakeka se ko biri buhindure igihugu itongo, cyangwa ko biri bwimure amabuye aho ari?

⁵Ni koko, urumuri rw’umugome rurazima, n’ibishashi by’umuriro we bikayoyoka,

⁶urumuri rwo mu nzu ye rurakendera, n’itara rye rikamuzimiraho.

⁷Intambwe yateraga akataje, azazihina, n’imigambi yigiraga izabe ari yo imuroha.

⁸Koko rero, ni we wishora mu mutego, atambagira hejuru yawo.

⁹Umushibuka umufata akaguru, ipfundo rikaba ngiri ryikoze,

¹⁰umugozi wihishe mu butaka uba umutegereje, umutego uri bumufate uri mu nzira ye.

¹¹Ubwoba bukamutangatanga impande zose, bukamusatira buhoro buhoro;

¹²imbaraga ze zigashonga, maze ubutindi bukamwugariza.

¹³Indwara ikamukemba uruhu, intumwa y’urupfu ikamuguguna ingingo zose.

¹⁴Bakamuturumbura mu ituze ry’ihema rye, bakamujyana ku Mutegetsi uteye ubwoba.

¹⁵Ihema rishobora kongera guturwa, n’inzu ye bayikuyeho imiziro.

¹⁶Imizi ye yanambiye mu butaka, naho amashami ye yumira hejuru;

¹⁷yaribagiranye mu gihugu cyose, ahantu hose, izina rye ryarasibanganye.

¹⁸Bamukuye mu rumuri bamuhirikira mu mwijima, maze acibwa ku isi.

¹⁹Nta ba sekuru, nta n’abuzukuru agira mu muryango we, n’aho aba, nta muntu uharangwa;

²⁰amakuba ye yatangaje ab’iburasirazuba, naho ab’iburengero bwaryo barumirwa.

²¹Ni koko, ayo ni yo maherezo y’inzu y’abanyabyaha, uwo ni wo mwanya wahariwe abatazi Imana.»