Read kinyarwanda Yobu 20 Bible Online

Yobu 20 - kinyarwanda bible

Yobu 20

¹Sofari w’i Nahama[30] afata ijambo, agira ati

²«Ni koko, ibitekerezo byanjye birashyugumbwa kugusubiza, ku buryo ntagishoboye kwihangana.

³Numvise inyigisho zawe zintuka, none ubwenge bwanjye bunyunguye icyo ngusubiza.

⁴Aho uzi neza ko kuva kera na kare, kuva umuntu yaremwa ku isi,

⁵umunezero w’abagome utamara kabiri, kandi ibyishimo by’abagomeramana ntibimare igihe.

⁶N’iyo yaba areshya n’aho bwakereye, umutwe we ugakora ku ijuru,

⁷ntazabura kuzimira burundu nka baringa; abamubonaga bagire bati ’Arigitiye he?’

⁸Azayoyoka nk’inzozi zidafatika, azimire nk’ibyo umuntu arota nijoro;

⁹ijisho ryamubonaga, ntirizamurabukwa ukundi, n’ahantu yabaga ntihazaba hakimumenya.

¹⁰Abana be bazatanga indishyi z’abakene, bazishyure bazikura mu mutungo we.

¹¹Amagufa ye yarangwaga n’imbaraga za gisore, none aryamanye na we mu gitaka.

¹²Akanwa ke kari karyohewe n’icyaha, akagihisha mu nsi y’ururimi rwe,

¹³akagitsimbararaho ntakireke, agakomeza kukijundika mu matama ye,

¹⁴nyamara bene iyo ndyo igaga ikigera mu nda, igahinduka indurwe y’uburozi ikimugeramo!

¹⁵Umutungo w’abandi yamiraguye, agomba kuwuruka, Imana ni yo iwuryoza inda ye.

¹⁶Yanyunyuje ubumara bw’inzoka, none reka yicwe n’ururimi rw’impiri!

¹⁷Ntakibona ya migezi y’amavuta, n’inzuzi z’ubuki n’ikivuguto.

¹⁸Inyungu ye asigaye ayitanga aho kuyimira, ntakishimira ibyo yiyuhiye akuya.

¹⁹Koko rero, yatoteje abakene arabatsikamira, asahura inzu atubatse;

²⁰ntiyigeze ashira ipfa, bityo nta cyo azaramura mu byo atunze,

²¹kandi nta muntu n’umwe atambuye. Ni yo mpamvu umunezero we utazaramba,

²²azatunga byinshi ariko ahangayike, ibyago byose bizamugwira.

²³Kandi, n’ubwo yujuje inda ye, Imana izamuterereza uburakari bwayo, bumusabagire mu mubiri nk’ibiryo.

²⁴Nanizibukira inkota y’icyuma, umuheto ucuze mu muringa uzamuhinguranya;

²⁵umwambi uzamutunguka mu bitugu, undi uhinguke mu mara, wahindutse urugina, maze amakuba yose amuteranireho.

²⁶Umwijima w’icuraburindi uramutegereje, umuriro w’inkonkobotsi uzamuyogoza, ukongeze n’ibyari bisigaye mu ihema rye.

²⁷Ijuru ryashyize ahagaragara icyaha cye, n’isi yahagurukiye kumurwanya.

²⁸Icyorezo kizatsemba inzu ye, aterwe n’umwuzure ku munsi w’uburakari bw’umutegereje.

²⁹Urwo ni rwo ruhare Imana igenera umugome, ni wo mugabane imuteganyiriza.»